Boni Israilor ḳaijja ar naformani
9
1 Hozrot Musae aro ḳoila, “O Boni Israil huno, tumra taki bout bolala ar forimane bout beshi, boṛo boṛo zatir deshre doḳol ḳorar lagi oḳon Zordan gang far oia zaibae, tarar ṭaun oḳolo boṛo boṛo, ou ṭaunor baunḍorir oal asmano soilise. 2 Tara oila usa-muṭa foeluan, era hoḳolu Anaki bongshor manush. Tumra to ageu tarar befare huncho, Anaki oḳolor loge lagar takkot ḳar ase? 3 Oile tumra oḳan mono rakio, tumrar Mabud Alla to tumrar age age zaira, tain zalaia sarḳar ḳorra agunir laḳan. Tainu itare domaia tumrar tolua banaiba. Teu Mabude age zelaḳan ḳoisla, tumra olau tarare ḳedai dia zoldi ḳori binash ḳorbae.4 “Tumrar Mabud Allae zebla tumrar samne taki tarare ḳedaia diba, hou shomoe tumra mone mone ḳoio na, amrar forezgarir fol hishabe Mabude amrare ou desh doḳol ḳorar lagi anchoin. Ashole hou zati oḳolor naformanir lagiu Mabude tarare tumrar samne taki ḳedai diba. 5 Tumrar forezgari ba shototar lagi to hi deshor doḳoldari fairae na, borong hou zatir naformanir lagi, ar tumrar Mabud Allae tumrar moe-murobbi Ibrahim, Isʼhak ar Iakubor gese ze oada ḳorsla, oḳan furon ḳorar lagi, tainu tumrar samne taki itare ḳedaia diba. 6 Erlagi tumra zania rakio, tumrar forezgari dekia to tumrar Mabud Allae ou aramor deshor doḳoldari tumrare dira na, tumra oilae gaṛteṛa-ekguia zati.
Shunar basuror fuza
7 “Ar hou morubumir maze tumra kila nizor Mabud Allar gusa tulaislae, ikan mono rakio, kunudin faurio na. Mishor desh saṛia aoar din taki oḳano aoa forzonto, hamesha tumrar monor bitre Mabudor birudita ase. 8 Tur faṛor mazeo tumra Mabudor gusa tulaislae, erlagi tain tumrare binash ḳorilta saila. 9 Mabude tumrar loge ze apush-chukti boail ḳorsoin, ou chukti nama leḳa duio ḳan fattor anar lagi ami faṛo uṭislam, sallish din sallish rait kunu dana-fani na ḳaia ami ruza aslam. 10 Ar Mabude tan fobitro ator anguildi leḳa hou duio ḳan fattor amare dila. Tumra hoḳol zedin Tur faṛo aia dola oilae, ou din Mabude zalail agunir maz taki tumrare zeta bataisla, ou duio fattoror maze to ota leḳa asil.
11 “Hou sallish din ar sallish raitor bade Mabude ou chukti nama leḳa fattor duio ḳan amar ato dila. 12 Dia ḳoila, zao, tumi zoldi ḳori lamat zao, ḳaron tumi zeta manshore Mishor taki bar ḳoria ancho, ita ku-fote gesoingi. Amar batail fot taki tara oto zoldi be-foti oigese, tara fuza ḳorar lagi shuna golaia eḳ murti banaise. 13 Mabude amare aro ḳoila, ami to ita manshore deḳlam, ita boṛo gaṛteṛa-ekguia zati. 14 Oḳon tumi amar ges taki hori zao, kunu bada dio na, ami itare binash ḳorilimu, dunia taki itar nam miṭailimu. Ar tumar maz taki eḳ noea zati foeda ḳormu, ita aro boṛo aro bolala zati oibo.
15 “Teu ami faṛ taki lamia ailam, faṛor ufre aguin zoler, ar amar ato asil chukti nama leḳa hou duio ḳan fattor. 16 Bade ami sailam, saia deki tumra nizor Mabud Allar dorbaro guna ḳorrae. Tumra fuza ḳorar lagi shuna golaia format ḍalia eḳ gorur basur banailae. Mabudor batail fot saṛia tumra oto zoldi be-fote gelaegi! 17 Erlagi ami ou duio ḳan fattor amar at taki falai dilam, teu ita bangia tumrar sokur samne ṭukra ṭukra oigelo.
18 “Mabude zetare nafosond ḳoroin, olaḳan guna ḳoria tumra tan gusa tulailae, erlagi ami agor laḳan hirbar sallish din sallish rait kunu dana-fani na ḳaia, tan samne soizdat foṛi roilam. 19 Mabudor bezuita gusare ami kub ḍorailam, tain gusae aguin oia tumrare binash ḳorilta saila, oile oubaro tain amar foriad hunla. 20 Mabude Harunor ufreo kub gusa oia tanre shesh ḳorilta saila, teu ami Harunor lagio tan dorbaro minoti ḳorlam. 21 Ar tumrar gunar atiar mani tumrar banail hou basuror murtire agunit falaia zalaia sarḳar ḳorlam. Ogur zalail ṭukrare fishia sali banaia faṛia gangor fanir futor maze falailam.
22 “Tumra to Taberat, Masat ar Kibrut-Hutaba namor zagat Mabudor gusa tulaislae. 23 Erbade Kadesh-Bornea taki roana oar ḳalo Mabude zebla ḳoila, ami tumrare aramor ze desh dan ḳorsi, tumra gia oḳan doḳol ḳoro, hou shomoyo tumra nizor Mabud Allar hukumor birudita ḳorlae, tanre manlae na, tan ḳotareo ekin ḳorlae na. 24 Ashole ami zedin taki tumrare sini, hou din takiu dekiar, tumra hamesha Mabudor hukumor ulṭa solrae.
25 “Zai ouk, Mabude tumrare binash ḳorar ḳota ḳoae ami sallish din sallish rait, tan samne soizdat foṛi roilam. 26 Ami tan dorbaro minot ḳori ḳoilam, O Mabud Moula, tumi erare binash ḳorio na, era to tumaru bonda, tumaru ḳas shompod. Tumar kudroti ḳam dia, tumar nizor bolala atdi zetare Mishor desh taki bar ḳori ancho, itare mario na. 27 Itar boitolgiri, naformani ar gunar bae na saia, tumi ḳali tumar gulam Ibrahim, Isʼhak ar Iakubor ḳota mono ḳoro. 28 Oḳon tumi zudi itare marilao, te tumi ze desh taki amrare bar ḳoria ancho, hou deshor manshe ḳoibo, Mabude tan oada ḳora desho itare nita farsoin na, ba tarare ingsha ḳoria zane marar lagi ou morubumit nisoin. 29 Ashole era to tumaru bonda, tumar nizor shompod. Tumar afon kudroti at lagaia, tumar bol-takkot ḳaṭaia erare Mishor taki bar ḳoria ancho.”