11
1 “Erlagi, O Boni Israil, tumra nizor Mabud Allare mohobbot ḳorio, ar tan morzi zugaia solio, tan deoa shoriot, hoḳol niom-ḳanun, hukum-ahkam hor-hamesha manio. 2 Tumra oḳon mono rakio, ita ami tumrar huruttaintore na ḳoia ḳali tumrar gese ḳoiar, tara to tumrar Mabud Allar hedaeot deḳse na, ita sineo na. Tumrar gese tan afon mohima, tan kudroti ator bahaduri, 3 ar Mishoror bashsha Feraunor ufre, tar asta deshor ufre tain zoto nomunar kudroti lila-ḳela deḳaisoin ita to tara deḳse na. 4 Tara Mishoror sifai dol, itar guṛa, guṛar gaṛin ar itare tain kila Nil doriat buṛ maria ekkere binash ḳorsoin, itao to deḳse na, 5 ou zagat aia tumra fousibar age morubumir maze tain tumrar ufre zotota goṭaisoin, tumrar huruttainte itao deḳse na. 6 Tain Ruben ḳandanor Iliabor fua Daton ar Abiramre ze shaza disoin mani, duniar maṭi faṭia a ḳoria asta Boni Israilor mazḳan taki tarare gilililo, tarar bou-baichchain shudda asta foribar, tarar gor-duar, ar heman-zanuar shoho hoḳol mal-samana maṭir tole hamaigelo, itao era deḳse na. 7 Oile tumra nizor souke Mabudor hoḳol kudroti lila-ḳela deḳso.Allar hukum-ahkam manle deshor lab
8 “Te oḳon ami tumrare zela hukum diram, tumra ita hokkolta manio, teu Zordan gang far oia ze desh doḳolor lagi zairae, tumra bolala bonia honor doḳoldari faibae. 9 Mabude tumrar moe-murobbi oḳolre ar tarar aolad oḳolre ze desh dibar lagi ḳosom ḳaisla, dud ar mour banḍar ala hou aramor desho tumrar haeati lamba oibo. 10 I deshḳan to hou Mishor deshor laḳan nae zeḳan taki tumra bar oia aiso, mono or ni, hag-torḳarir ḳet zela fani dein, hou desho bisi bain dia harle tumra faor naoṛa dia ola fani hisitae? 11 Oile gang far oia ze desh tumra doḳol ḳorat zairae, i desho faṛia tol zaga ar faṛ-forbote bora, i zomine Allar deoa megor fani ḳae. 12 Tumrar Mabud Allae i deshor kial raḳoin. Bosoror foela taki hesh forzonto tan doya nozor taḳe i zominor ufre.
13 “Te ami aiz tumrare zela hukum diar, ita tumra kub kiali oia manio, tumrar Mabud Allare mohobbot ḳorio, ar furafur dile-zane tan ebadot-bondegi ḳorio. 14 Teu Mabude zorur mafik bosoror foela ar shesheo rohomoti meg dia, tumrar ḳetor foshol, anguror rosh, zoetunor tel hokkolta zugan diba. 15 Tumrar foshur falor lagi zomino gash diba, tumra tusṭo oia ḳani-fani ḳaibae.
16 “Ta-o tumra hushiar roio, arnae tumrar mon ku-fote zaibogi, ar tumra be-foti bonia deb-debir fuza ḳorbae, itare boḳti ḳorbae. 17 Ila ḳorle tumrar ufre Mabudor gusar aguin gorom oibo, tain asmanor rohomoti duar bond ḳoriliba, teu meg-fani bond oia zomino ar foshol folito nae, ar Mabude tumrare ze desh dan ḳorra, hou aramor desh taki tumrare zoldi ḳori fusia falail oibo. 18 Erlagi tumrar monor maze, tumrar dilor bitre amar ou hukum ḳan gatia rakio, tumrar duio ato ita nishana hishabe bandia toio, ar ḳofalor mazeo lagaio. 19 Tumrar huruttaintoreo ita hokkolta talim dio. Tumra goro roar shomoe, fote-gaṭe aṭibar shomoe, hutibar shomoe ar hutono taki uṭia harle hamesha ota befare batchit ḳorio. 20 Ita lekia tumrar baṛir geiṭo ar duaror soukaṭo lagaio. 21 Ita manle Mabude tumrar moe-murobbir gese ze desh dibar ḳosom ḳaisla, hou desho tumra ar tumrar aolador haeati otodin roibo, zotodin i duniar ufre asman roibo.
22 “Aiz ami tumrare zeta hukum-ahkam diar, tumra zudi kub kiali oia ita mano, tumrar Mabud Allare mohobbot ḳoro, tan batail fote solo ar tan ashik bonia ro, 23 te Mabude tumrar samne taki hou deshor hoḳol zatire bar ḳori diba, teu tumra nizor taki aro boṛo boṛo ar bolala zatire ḳedaia honor doḳoldari faibae. 24 Tumrar faodi zeta zagar ufre aṭibae, ita hoḳol zaga tumrar doḳolo aibo. Douknor morubumi taki Lebanon forzonto, Furat gang taki foismor doria forzonto doḳoldari faibae. 25 Kunu beṭa tumrar samne ubanir takkot oito nae, tumra hou deshor zeḳano zaibae, oḳanor mansheu tumrare ḍoraiba, tarar bitre ḳafibo, ita tumrar Mabud Allae tan nizor oada mafiku ḳoraiba.
26 “Huno, aiz ami tumrar samne rohomot ar lannot duiota deḳailam. 27 Ami oḳon tumrare zela hukum dilam, tumrar Mabud Allar ou hukum-ahkam zudi tumra mano, te tumra ou rohomot faibae. 28 Ar ita na mania tumra zudi tumrar Mabud Allar hukumor ulṭa solo, i fot taki horia kunu deb-debir ḳore ḳore zao, te tumra lannoti oibae.
29 “Tumra ze desh doḳol ḳorar lagi zairae, tumrar Mabud Allae zebla tumrare hou desho nia haraiba, haraia harle tumra ou rohomotor ḳota Gorisim faṛor ufre uṭia elan ḳorbae, ar ou lannotor ḳota elan ḳorbae Ibal faṛor ufre uṭia. 30 Tumra to sino, Zordan gang far oia fotor foismedi Gilgolor daro ou duio faṛ ase, Araba namor tol zagar bashinda Kenani oḳolor deshor Murir elon bonor ḳandar ou duio faṛ sino na ni? 31 Mono rakio, tumrar Mabud Allae tumrare ze deshor doḳoldari dira, Zordan gang far oia hou desho hamaia hari tumra zebla hono boshot ḳorbae, 32 hou shomoe tumra ou hukum-ahkam ar niom-ḳanun kub kial ḳoria amol ḳorio, zeta oḳon tumrare ḳoilam.