Allai chukti namar fattor hirbar dila
10
1 Hozrot Musae tarare ḳoira, “Hou shomoe Mabude ḳoila, tumi fattor ḳaṭia agor laḳan duḳan ṭukra banao, ar oḳnain loia faṛor ufre uṭia amar daro ao. Erloge laḳṛidi eḳṭa shonduḳo banaio. 2 Tumi age ze dui ṭukra fattor bangiliso, hou fattoror ufre zeta leḳa asil, ota ami ou duio fattor ṭukrar ufre hirbar lekia dimu, bade tumi oḳnain nia hou shonduḳor bitre toibae.3 “Hukum faia ami babla laḳṛidi eḳ shonduḳ banailam, ar dugu fattor ḳaṭia agor laḳan dui ṭukra ḳorlam, bade ou duio ṭukra ato loia ami faṛor ufre uṭlam. 4 Uṭia harle Mabude hou foela duio fattor ṭukrar ufre zeta lekisla, ota hirbar ou duio ṭukrar ufre lekia amare dila, ou leḳa aeat oilo, shoriotor ḳas dosh hukum. Age zedin tumra hoḳol Tur faṛo aislae, hou din Mabude zalail agunir maz taki tumrare ou hukum-ahkam bataisla. 5 Bade ami faṛ taki lamat lamia aia amar banail hou shonduḳor bitre duio ḳan fattor toilam, zela Mabude hukum disla. Ita oḳono hono ase.”
6 (Boni Israile Birut-boni-Iakan taki roana oia Muserat gelagi. Ou zagat Harun nobir ufat oae, tanre ono dafon ḳora oilo. Bade tan bodla tan fua Ali-Azor fordan imam oila. 7 Bade Boni Israilor kafela Gudgudat gelagi, hon taki Zotbatat gela, i zagat fanir fut ala bout ḳal-nala asil. 8 Ou shomoe taki Mabude Lebi ḳandanre fosond ḳorla shahadot shonduḳ boia nibar lagi, Mabudor ebadot-bondegi ḳorar niote tan samne azira dibar lagi, ar tan name manshore dua dibar lagi. Ou imamoti ḳam tara oḳono ḳorra. 9 Otar lagi Lebi ḳandanor manshe Boni Israilor dusra ḳandan oḳolor laḳan zomi-zomar kunu baṭ ba kunu mirashdari faila na. Tumrar Mabud Allar zoban mafik shoeong Mabudu oila tarar mirash.)
10 Hozrot Musae tarare ḳoila, “Agor baror laḳan ibaro ami sallish din sallish rait Tur faṛor ufre aslam, ibaro Mabude amar foriad ḳobul ḳorla, tain tumrare binash ḳora bad dilaila. 11 Bade Mabude amare ḳoila, tumi uṭo, uṭia agedi aguanir lagi ota manshore zuit ḳoria tarar ag oia roana deo, ami tarar moe-murobbi oḳolor gese ze desh dibar lagi ḳosom ḳaia oada ḳorsi, tara hou desho gia ita doḳol ḳorouk.
Allar ashik oia tan hukum-ahkam mano
12 “O Boni Israil, huno, tumrar Mabud Allae tumrar gese kita sain. Tain saira, tumra ḳali tan ḍor-ḳof bitre raḳo, tan fote solo, tanre mohobbot ḳoro, tumrar asta dil-mon dia tan ebadot-bondegi ḳoro. 13 Ar tumrar balair lagi aiz ami tumrare Mabudor ze hukum-ahkam ar shoriot diram, ita furafur amol ḳoro.
14 “Zano to, asman ar asmani hokkolta, zomin ar zominor tamam samana to tumrar Mabud Allar. 15 Ta-o tumrar moe-murobbir bae tan ṭan taḳae, tain erare mohobbot ḳorta. Tarar bade tarar aolad oḳolre mani, oḳonkur zomanar duniar hoḳol zatir maz taki ḳali tumrare fosond ḳorsoin. 16 Erlagi tumrar zarzir dilor mosolmani ḳorao, gaṛteṛa naforman bonia roio na. 17 Mono rakio, tumrar Mabud Alla to hoḳol deb-debir ufre, munib oḳolor munib, tainu mohan, boloban ar ḍor-ḳof foeda ḳorra Alla. Tain kunu fokkofati ḳoroin na, gush ḳain na. 18 Etim oḳol ar ṛaṛi beṭintor bae hok insaf ḳoroin, ar tumrar loge boshot ḳorra bin-deshi oḳolre ḳaoa-findar hoḳolta dia tan mohobbotor forman deḳain. 19 Age to Mishor desho tumrao ola bin-deshi aslae, erlagi bin-deshi manshore tumra maea-mohobbot ḳorio. 20 Tumra nizor Mabud Allare ḍoraia solio, tan ebadot-bondegi ḳorio, tan ashik bonia roio, ar ḳali tan name ḳosom ḳaio. 21 Tainu tumrar tarifor kuṭi, tainu tumrar Alla. Tumra nizor souke zoto asanok taijjubi ar bezuita kudroti ḳam deḳso, ita hokkolta to tumrar lagi tainu ḳorsoin. 22 Tumrar zeta moe-murobbi Mishor desho gesla, era asla muṭ shottoir zon, ar oḳon tumrar Mabud Allae tumrare asmanor terar laḳan ḳorsoin, zeta gonia fuṛail zae na.