Boni Israilor mahfilo hamanir niom
23
1 Hozrot Musae aro ḳoira, “Kunu beṭar zudi onḍokush sesa oe, ba tar furushali nofs ḳaṭia falail oe, te hi beṭa Mabudor bonda oḳolor mahfilo hamanir shuzug nai.2 “Kunu funga manush Mabudor bonda oḳolor mahfilo hamanir shuzug nai, tar souddo siṛir ḳeuror hamanir fot nai.
3 “Boni-Amman ba Muabi zatir kunu manush Mabudor bonda oḳolor mahfilo hamanir shuzug nai, tarar souddo siṛir ḳeu hamanir fot faito nae. 4 Mono ase ni, tumra Mishor desh taki bar oia aibar ḳalo, fotor maze tara tumrar ḳani-fani loia aguai aise na, borong tumrare boddua dibar lagi Balam bin Baur namor eḳ pirre tara gush disil, dia Iram-Nohoroyim deshor Fotur ṭaun taki tare baṛa ḳori anchil. 5 Oile tumrar Mabud Allae ou Balamor arzit shae disoin na, tain to tumrare mohobbot ḳoroin, erlagi hou Balam piror bodduare bodlaia tain nek-dua banaila. 6 Oḳon tumra zindegie kunudin itar kunu balai ba ufoḳar ḳorio na.
7 “Ta-o Idumi oḳolre tumra ingsha ḳorio na, era to tumrar bai. Mishori manshore ingsha ḳorio na, tumra musafir halote age tarar desho boshot ḳorso. 8 Tumrar loge boshot ḳorar tin siṛi taki tara Mabudor bonda oḳolor mahfilo hamaita farba.
Sifai oḳolor kemp fak-fobitro rakio
9 “Dushmonor loge laṛait bar oia tumra hoḳol nomunar nafaki taki basia roio. 10 Raitor bala kunu sifair zoubonor fani bar oia nafaḳ bonigele, he kempor bare zaite oibo. 11 Bade biali bala he naia hari, shuruz ḍubia harle kempo aia hamaibo.
12 “Faeḳana ḳorar lagi tumra kempor bare eḳ zaga banaibae. 13 Tumrar atiar-potror loge maṭi kuṛibar kudal rakio. Faeḳana ḳoria harle kudaldi gat kudia maṭir tole haraio. 14 Kial rakio, tumrare basanir lagi, ar dushmonre tumrar ato shofibar kiale tumrar Mabud Alla tumrar kempor bitre gura-fira ḳoroin. Erlagi tumrar kempre fak-fobitro rakio, arnae tumrar nafaki dekia Mabude tumrar ufre taki muk firailiba.
Nanan laḳan hukum-ahkam
15 “Kunu manshor kina gulam bagia aia zudi tumrar gese ashroe loe, te tare tar malikor gese firai dio na. 16 He tumrar deshor zeḳano roito sae, ono-u tare zaga dio, tare duk dio na.
17 “Boni Israilor kunu beṭinte zanu mondir-aḳṛar noṭigiri na ḳore. Kunu beṭaeo zanu ola noṭagiri na ḳore. 18 Noṭi beṭi ba noṭa beṭar ruzi-ruzgaror ṭeḳa-foeshar kunuzat mannot-kurbani tumrar Mabud Allar goro anio na. Ilaḳan beṭa-beṭintore to Mabude gin ḳoroin.
19 “Tumrar zatir kunu bair ges taki shud ḳaio na, ita ṭeḳa-foesha, ḳani-kurakir zinish ba aro kunuta oileo kunuzat shud loio na. 20 Oinno zatir ges taki shud nitae farbae, oile Boni Israil taki shud ḳaoa haram. Ita mania solle tumra ze deshor doḳoldari fairae, hou zagat gia harle tumrar Mabud Allae tumrar hoḳol ḳam-ḳazo rohom-borkot diba.
21 “Tumra nizor Mabud Allar name kunuta mannot ḳorle, ita zoldi ḳori adae ḳorio, ita adae na ḳorle tumrar guna oibo. Ar i hishab to tumrar Mabud Allae bad dita nae. 22 Oile kunuzat mannot na ḳorle guna nae. 23 Tumrar zoban taki ze mannot ḳorso, iṭa nichchit adae ḳorbae, ḳaron tumar nizor zobane, nizor kushie Alla Mabudor name ita mancho, erlagi adaeo ḳorbae.