Hozrot Musa (a:)-or shesh halot (31-34 ruku)
Hozrot Musa (a:)-e daeitto shomzaila
31
1 Erbade Musae hoḳol Boni Israilre ḳoila, 2 “O Boni Israil huno, amar boeosh to eḳ-sho bish bosor oigese, ami ar amar ḳam ḳortam fariar na, ḳaron Mabude amare zanaisoin, ami Zordan gangor hifaro zaitam fartam nae. 3 Te tumrar Mabud Alla nize tumrar age age roia Zordan gang far oia zaiba. Tain tumrar samne taki honor hoḳol zatire binash ḳorba, teu tumra hou desh doḳol ḳorbae. Ar Mabudor ḳota mafik Hozrot Iusae tumrare loia hofaro tumrar age age zaiba. 4 Mabude Amuri oḳolor bashsha Sihun ar Uzre zelaḳan binash ḳorsila, hou zati oḳolreo ola binash ḳorba. 5 Tain hitare tumrar ato shofia diba, hou shomoe tumra amar batail hukum mafik ḳam ḳorio. 6 Tumrar bukut bol raḳo ar shaosh ḳoro. ḍoraio na, tarare dekia gabṛaio na. Mono rakio, tumrar Mabud Alla tumrar loge loge zaira, tain kunumonte-u tumrare saṛta nae, kunu haloteu tumrare falaita nae.”7 Bade Musa nobie hoḳol Boni Israilor samne Iusa nobire anaila, anaia ḳoila, “Tumi bukut bol raḳo ar shaosh ḳoro. Ou manush oḳolre loia tumi gang far oia hou desho zaibae, hou desh dibar lagi Mabude to tarar moe-murobbir gese oada ḳorsla. Tumi tarare hono nia honor zomi-zoma tarare baṭia dio. 8 Shoeong Mabud tumar age age roiba, tumare shaijjo ḳorba, tain tumareo saṛta nae ar tumare falaitao nae, te tumi ḍoraio na, shaosh araio na.”
Tourat kitab tilaotor hukum
9 Bade Musa nobie Tourator ou hukum-ahkam oḳol leḳla, lekia Lebi ḳandanor hou imam oḳol, zara Mabudor shahadot shonduḳ boia nita, tarar ato ar Boni Israilor moe-murobbir ato dila. 10 Dia tarare hukum dila, “Forteḳ shat bosor bade bade, aolat mafir bosoror ḳalo, ḍera-goror idor oḳto, 11 hoḳol Boni Israil zebla tumrar Mabud Allar fosond ḳora zagat gia tan samne azir oiba, hou shomoe tumi tara hoḳolor samne ou Tourat kitab tilaot ḳoria hunaio. 12 Beṭain, beṭin, huruttain, ar tumrar loge boshot ḳorra gau ba ṭaunor bin zatir hoḳol manshore eḳ zagat dola ḳoria ita hunaio, ita hunia tara tumrar Mabud Allare ḍoraiba, ar ou shoriotor hoḳol hukum-ahkam zoton ḳori amol ḳorba. 13 Ar tarar zeta huruttae Tourator ou hukum-ahkam hunchoin na, Zordan gangor hofaro tumra ze deshor doḳoldari fairae, tumra hono gia harle tarao hara zindegibor tumrar Mabud Allar ḍor-ḳofe sola hikba.”
Naformani ḳorar agam ḳobor
14 Bade Mabude Musa nobire ḳoila, “Tumar haeati to ar beshi nai, mout daro aichche, te tumi Iusare anao, anaia duio zon milon-tambur samne ao, ami tar ufre tar noea ḳam shomzai dimu.” Teu tara duio zon gia milon-tambur samne azir oila.
15 Ou shomoe Mabude megor kuṭir maze takia milon-tambur duaror samne aia tarare doroshon dila, ou kuṭi tambur duaror ufre ubai roilo. 16 Ar Mabude Musare ḳoila, “Huno, tumi to tumar baf-dadaintor gese aram ḳorat zairaegi, oile ou manush oḳol ze desho hamaira, hamanir tuṛa badeu amar loge tarar apush-chuktire tara bongo ḳorba, tara amare bad dia honor deb-debir ato nizore shofi diba. 17 Tara ita ḳoria harle amar gusar aguin zolibo, ami tarar log saṛi dimu, tarar bae taki amar muk firailimu, teu tara binashor foto zaiba. Tarar ufre nanan bala-mosibot aibo. Hou shomoe tara ḳoiba, amrar dosha ila oilo ḳene? Nischoe, amrar Alla amrar loge nae ḳoriu, ita goṭer. 18 Ashole tarar hou deb-debintor gese gia zeta ku-ḳam ḳorsoin, otar lagiu ami hou shomoe tarar ges taki amar muk firailisi.
19 “Te tumra ou gozolṭa lekilao, lekia Boni Israilre hikao ar tara gaiba. Ou gozol to tarar birudde amar shakki oia roibo. 20 Buzrae ni, ami tarare ze desh dibar lagi tarar moe-murobbir gese oada ḳorsi, dud ar mour banḍar ala aramor hou desho tarare nia harleu, tara ḳana-fina ḳaia muṭa-taza oiba. Oia honor deb-debir fuza ḳorat lagba, hotar bozona ḳorba, amare elami ḳoria amar logor apush-chukti bangiba. 21 Teu tarar ufre zebla nanan nomunar bala-mosibot ar bifod-afod aibo, hou shomoe ou gozole tarar samne shakki dibo, ou gozol to tarar aolad oḳole faurita nae. Hasa ḳota oilo, amar oada ḳora hou desho nibar ageu, tara mone mone kita sinta ḳorer, ita to amar zana ase.” 22 Musae loge loge ou gozol lekia Boni Israilre hikaila.
23 Ar Mabude Nunor fua Iusare tan noea ḳamor lagi oula hukum dila, “Tumi bukut bol raḳo ar shaosh ḳoro. Ami ḳosom ḳaia Boni Israilre ze desh dibar lagi oada ḳorsi, tumi tarare loia hou desho zaibae, ami tumar loge loge roimu.”
24 Shoriotor ou hukum-ahkamor hoḳolta Musae shullo-ana leḳla, 25 lekia Mabudor shahadot shonduḳ boia neora Lebi ḳandanor manshore hukum dila, 26 “Ou Tourat kitab ḳan nia tumra Alla Mabudor shahadot shonduḳor ḳasat toio. Ikan Boni Israilor birudde shakki hishabe hono roibo. 27 Tumra ḳoto boṛo gaṛteṛa ar naforman, ita amar zana ase. Ami zinda halote tumrar loge roiteu tumra zebla Mabudor naformani ḳorso, te amar moronor bade tumra ar kita na ḳorbae! 28 Tumra hoḳole zarzir ḳandanor murobbi ar ofisar oḳolre amar gese ano, ami nize tarar gese ota kulasa ḳoria ḳoia zaimu, asman-zominre tarar birudde shakki raḳtam sai. 29 Ami to zani, ami souk muzar bade tumra ekkebare be-foti bonizibae, amar batail fot taki tumra horizibae, teu tumrar ufre gozob lambo. Ḳaron Mabude zeta gin ḳoroin, tumra ota ḳam ḳoria, nizor ate murti banaia, tan gusa tulaibae.”
30 Bade Musa nobie hoḳol Boni Israilor samne ou gozolor foela taki aḳer forzonto hunaila; tain gaila,