Hozrot Musa (a:)-or gaoa gozol
32
1 O asman, ḳan fatia huno ami zeta gai,O zomin, tumio huno ami za batai.
2 Amar talim lamuk megor fuṭar laḳan,
kuar moton foṛouk amar mukor boean.
Ḳesma gashor ufre fuṭa fuṭa meg oia foṛouk,
noea sera gasor ufre shantir meg oia lamuk.
3 Ami to elan ḳormu amar Mabudor nam,
tumrao gaio Allar mohima gan.
4 Tainu to ashroe ṭilla, nikut tan ḳam,
hok-hasa tan fot shoṭik tamam.
Sol-soturi nai tan, hok-halal ase shorboda,
hok insaf forezgari ase shotota.
5 Ta-o tan ḳobis bondaea ḳorse beimani,
dilor ḳarafie tara bonche kolonkini.
6 Haere ammok nadan, haere be-aḳol,
ouni tumra bodla dilae, Mabudor danor?
Taineu tumrar foeda ḳorra foroar digarb ni?
Boail ḳorla tumrar Israil zati.
7 Iad ḳoro tumra hou agor amolor mat,
mono raḳo kita oisil furan zomanat.
Baf-dadare zikar ḳori itihash huno,
buṛa-buṛir muk taki hoḳolta zano.
8 Allatalae dila zebla zomin baṭia,
nanan zatire dila bag-baṭura ḳoria.
Boni Israilor foriman to zana asil tan,
erar ongsho algai toia baki ḳorla dan.
9 Mabudor ḳas shompotti to tan nizor proza,
Iakub bongsho Israil zati afon samana.
10 Tarare tain tukai faila morubumir desho,
nirai-nirzon desh ar bag-shinghor gorzono.
Kudroti ḍaḳnadi guria zoton ḳorila,
sokur monir laḳanu tarare basaila.
11 Sile zela nizor badar baichchare nasae,
aste aste uṛi uṛi ḍaḳnare laṛae,
ḍaḳna melia baichchainre ufre tule,
tulia hari uṛal dia loia loia gure,
12 Mabude eḳla oula ḳori tarare nila,
kunuzator deb-debi tan loge asil na.
13 Faṛe faṛe uṛai uṛai nila tarare,
faṛia deshor doḳol dila Boni Israilre.
Ḳetor bala foshol dila ḳaibar lagi,
faṛia saḳor mou ḳabaila faṭa-sifa taki.
Ḳabaila malike zoetunor tel,
luar laḳan shokto maṭit tel foli gelo.
14 Ḳabaila tarare tain gorur dudor doi,
sagol-meṛar dudo ḳaila zanio nichchoe.
Muṭa-taza meṛar gust ḳaila moza ḳori,
Bashon deshor goru-ḳoshi ḳaila ruṭidi.
Taza-fusṭo gomor ruṭi anguror shorbot,
ḍemdi uṭa angur oilo Allar niamot.
15 Bade tara lat marila feṭla bonia,
Boni Israile lat marla tarar fao dia.
Ḳaia ḳaia feṭ fulaia marlo oḳon lat,
faurililo hou Allare zein dila bat.
Foeda ḳorra Allar log tara saṛi dilo,
ashroe ṭilla Allare tara huru mono ḳorlo.
16 Deb-debir fuza ḳoria zalailo aguin,
eḳ Alla saṛia tara bozilo hoguin.
Gusar aguin zalailo tan aroshor maze,
murti fuza gin ḳoroin mohan Alla Pake.
17 Butor name boli dilo tanre saṛia,
but to kunu Alla nae ta-o failo fuza.
Noea noea devta zeta ḳoedin taki sine,
baf-dadar osin devta oḳon tara boze.
18 Zonom data bafor laḳan zein ashroe ṭilla,
tanre tumra fauria hari ḳorlae obohela.
19 Aolador ou halot dekia muk firailla Mabude,
rage-gusae aguin oila tararu bod amole.
20 Gusa ḳori Mabude ḳoila muk firailam ami,
tarar hesh dosha kita ami nichchit zani.
Deḳmu saia tarar hoḳol beimanir shaza,
be-foti beiman zate buzba nizor dosha.
21 Zeṭa Alla nai ila devtar fuza ḳoria,
amar bitre dise tara gusa tulia.
Zeṭa zati nai ila zati dia ingsha ḳoraimu,
ammok zati dia tarar gusa tulaimu.
22 Amar gusar aguin oḳon dau dau ḳori zoler,
maṭir tolor fatalreo zalaia sarḳar ḳorer.
Hara zogot ar foe-foshol zalai ḳorbo sali,
faṛor tolat aguin zolbo, zolbo duil bali.
23 Laḳo laḳo bifod dimu hoḳoltar ufor,
amar tamam tir marmu feṭor buke ḳormu ḳator.
24 Ufashi nidane tara hukai hukai morba,
gozobi bemaror loge duk-toklif faiba.
Datala zongli foshu faṭaimu ami,
bishakto shob hafor fale diba ḳamṛani.
25 Bare gele morba tara toluaror tole,
goro roile morba hoḳol zanor ḍor-ḳofe.
Zuan fua zuan fuṛin dudor hurutta,
binashi gozobe morba daṛi sul faḳna.
26 Ḳoislam ami uṛai marmu Boni Israilre,
itar nam fusilaimu manshor mon tone.
27 Oile amar zana ase dushmonor bab-shab,
beṭagiri ḳorba tara oibo tarar lab.
Na buzia ḳoibo tara zitse nizor bole,
Mabud ita kuntat nae zitsi ḳole-bole.
28 Bisar-bibek kuaia oḳon name Israil zati,
aḳol-buddi araia tara oise be-foti.
29 Aḳol taḳle buzto tarar nizor durdosha,
bibeḳ ḳaṭai zan basaia roito hamesha.
30 Eḳ dushmone aia kila azar zon ḳedae,
dui sifaire dekia ḳene dosh azar douṛae.
Nizor ashroe ṭilla zudi tarare na besita,
shoeong Mabude zudi saṛia na dita.
31 Dushmonor ashroe ṭilla oto mozbut nae,
tarau ikan shikar ḳori hoḳolre hunae.
Amrar ṭilla nichchoe bout boṛo boloban,
tarar muke gaia ita zofe tan shunam.
32 Mabude bataira oḳon tarar ḳetor ḳota,
Sadum ṭaun taki aise itar anguror lota,
Amura shohor taki itae angur fol faise,
bish ar tittae i folor soṛi furafur oise.
33 Anguror shorbot zela rag-naginir bish,
alod hafor bisho ola marattoḳ zinish.
34 Amar gese ita gozob tumrar lagi ḳaṛa,
amar banḍaro toa sob sil-sappoṛ mara.
35 Naformanir shaza deoa amaru ḳam,
amol mafik bodla dimu tamam insan.
Shomoe oile fislizibo dushmonor fao,
mosibotor din tarar nozdik zanilao.
Ṭik ḳori toa ase tarar ḳamor bodla,
zoldi ḳori faiba nizor amol-noma zela.
36 Mabude deḳba zebla bol-shokti nai,
tan bondar bol-takkot gesegi fuṛai.
Gulam kiba azad bonda hoḳolu mazur,
dekia tain fokko loiba afon gulamor.
Maea-doea ḳorba Allae tan gulamre,
mazur taki shobol ḳorba doea-rohome.
37 Ḳoiba tain hou shomoe kuai gela hita,
otodin bozisla tara zeta devta.
Bagia gelogi kuai tarar ashroe faṛ,
tarar hoḳol deb-debi oshaṛor oshaṛ.
38 Ḳoi gela hou deb-debi zetae ḳaisla sorbi,
sorbi ala bolir gust ḳaisil besh ḳori.
Zeta devtain ḳaisil sodgar shorbot,
oḳon tara basauk aia tarar ummot.
Shaijjo ḳoroukna aia tumrar hou ṭakur,
ashroe dey na ḳene naforman bodkur.
39 Sinta-babna ḳoria deḳo hou tainu ami,
ami saṛa Mabud nai ikan zancho ni.
Amiu marilai amiu basai,
amiu to zoḳom ḳori ami dei balai.
Ama taki basailito shaiddo ase ḳar,
haeat moutor malik ami Allahu akbar.
40 Aroshor bae at tulia ḳosom ḳaia ḳoi,
siroḳalin zinda ami zanio nichchoe.
41 Dar zebla dimu amar soḳsoḳa toluar,
ḳaim ḳorat lagmu zebla amar rae-bisar.
Hou shomoe shaza dimu amar hoḳol dushmonre,
amare ginnanir bodla dimu tarare.
42 Tir-donuke lou ḳaia ḳorbo matlami,
amar toluareo to lou ḳaibo zani.
Murda ar bondi oḳolor lou he ḳaibo,
dushmonor gust ḳaia feṭ fulaibo.
Lamba-suli sifair ḳolla ḳaibore muke,
tarar ḳolla sibai ḳaibo amar donuḳe.
43 Maear prozar loge oia asman kushi o,
behestor hoḳol firistae tane soizda deo.
Zogotor tamam zatie gao gunogan,
Allar hoḳol bondar loge lo tan moha nam.
Tan gulamor lour bodla oḳon loiba tain,
dushmonre shaza dia saf ḳorba zomiḳan.
Tan bondae Kenan desho failiba rehai,
gunar kofora dia diba tar bodla.
44 Musa nobi ar tan ḳadim Nunor fua Iusa gia hoḳol manshor gese ou gozolor shob ḳota zanaila. 45 Musae hoḳol Boni Israilor gese gia ita hoḳolta ḳoia hari, 46 ḳoila, “Ami ou zoto hushiarir ḳota tumrare zanaisi, ita tumrar dilo gatia rakio, ita to tumrar birudde shakki bonia roibo. Ar tumrar aolad oḳolre hukum dio, ou shoriotor hoḳol hukum-ahkam kiali oia amol ḳorta. 47 Ita to aze-baze kunu mat-ḳota nae, ita oilo tumrar zindegi! Zordan gang far oia hari tumra ze deshor doḳoldari fairae, ota amol ḳorle hono tumra lamba haeati faibae.”
Hozrot Musa (a:)-or aḳeri halot
48 Hou dinu Mabude Musa nobire ḳoila, 49 “Tumi gia ou Abarim faṛo uṭo, iṭa to Muab deshor Ziriho ṭaunor samne ase. Hono uṭia Nobo namor hou usa ṭillar ufre zao, ar Boni Israilre ami ze deshor malikana diram, ou Kenan desh eḳbar deḳilao. 50 Tumar bai Harun zela Hur faṛor ufre uṭia harle ufat oisil, bade tar baf-dadar ḳataro gia azisil, ou Nobo faṛo uṭar bade oula tumaro ufat oibo, ar tumar baf-dadar gese gia oulaḳan tumio azibae. 51 Mono ase ni, hoḳol Boni Israilor samne tumra duio baie amare fak-fobitro ḳoia mainno ḳorso na, hou Zin morubumir Kadesh elaḳar Meriba namor zagat fanir gese tumra amar name zaliati ḳorslae. 52 Hono uṭia harle tumar sokur samne hou desh deḳbae, ze deshḳan ami Boni Israilre dan ḳorram, tumi ḳali soukdi deḳbae, oile hi desho hamaibar shuzug tumar oito nae.”