Hozrot Musa (a:)-or aḳeri dua
33
1 Allar ḳas bonda Musa nobir ufator age, Boni Israilre tain ou dua dila:2 Toshrif anla Mabud Allae Tur faṛ taki,
amra hoḳole deḳa failam nure Elahi.
Seir ar Faran faṛ taki deḳain nuror tez,
laḳo laḳo firista kiba aro besh.
Didar dila Mabude erar maz tone,
ḍain ato bora asil nuror aguine.
3 Hasau tain maea ḳoroin nizor bondare,
tamam forezgar bonda tan hukume sole.
Soizda ḳorat asoin tara tan faor tolat,
hukum faile tamil ḳoroin roin tan ḳotat.
4 Musa nobie ze shoriot disla amrare,
Boni Israilor don ita zane hoḳole.
5 Dola oia aila zebla moe-murobbir dol,
log oia aisla Israilor ḳandanor hoḳol,
hou shomoe to Mabud asla tarar uforor bashsha,
era hoḳol tan proza tainu Shahansha.
Baro ḳandanre dua dila
6 Ruben ḳandanor befare Hozrot Musae ḳoila:
Ruben ḳandan zinda rouk, nifat nae kunudin,
ta-o tar goro foeda oibo ḳom fua-fuṛin.
7 Ehuda ḳandanor befare ḳoila:
O Mabud, tumi oḳon Ehudar foriad huno,
bai-biradoror daro tare firaia ano.
Duio at tar shobol raḳo laṛair shomoe,
shaijjo ḳoro tumi tare dushmonre deo arai.
8 Lebi ḳandanor befare ḳoila:
Tumar ashikor ato ase tummim ar urima,
kudroti hou dui samanar malik ḳali ou Lebin.
Masa namor zagat loiso tar forikka,
Meriba namor fanir zagat oisil ou ḳaijja.b
9 Ma-bafreo tulche na he tumar ufre,
gunar shaza dise tar maʼr feṭor baire.
Dabi saṛia shofi dise afon fua-fuṛi,
zindegi kurbani dise tumar ain mani.
Tumar kalam fara dise manche shoriot,
apush-chukti mania solche, na ḳori kianot.
10 Tumar hukum tara hikae Iakub bongshore,
tumar shoriot buzae tara Israil zatire.
Agor-kushboe zalae tara tumar samne aia,
zalail kurbani dey kurban-gat gia.
11 Tar samanat boroḳot deo go O amar Mabud,
razi-kushi ro tumi tar ufre bout.
Tar dushmonor ḳomor tumi bangi-suri deo,
ginna ḳorrar ḳomor bangi borbad ḳorilao.
12 Bin-Iamin ḳandanor befare tain ḳoila:
Mabudor maear bonda shae-shantie roibo,
nirafode roibo he tan ḍaḳnar tolo.
Hara din hara rait saeat raḳba tare,
zindegi guzoribo tar tan bogol tole.
13 Iusuf ḳandanor befare tain ḳoila:
Rohom-borkot ḳoro Mabud tar deshḳanre,
asman taki dami dami zinish deo tare.
Kua dia bizai deo uforor asman taki,
aro deo tar zomino maṭir muror fani.
14 Shuruzor teze faḳaia deo bala fol,
sande sande deo tare mozar foshol.
15 Furana faṛ taki don-samana deo,
siroḳalin faṛia mal tar zomino neo.
16 Zomin taki deo go Mabud bala bala mal,
zalail zonglar nuror malik rohom ḳoro siroḳalc,
Iusufor matat lamuk amar ou dua,
baiain taki mohan zonor talut lamuk ita.
17 Ḍeḳa baichchar moto ouk tar bol-shokti ar shan,
tar matar hing zuṛa to zongli boerar laḳan.
Hing dia gutaibo he hara zogotre,
fub fosim uttor dokkin douṛaibo hoḳolre.
Afraimor oiba ola laḳo laḳo zon,
azar azar zon oiba Manoshar mul don.
18 Sobulon ar Isaḳoror ḳandanor befare tain ḳoila:
Sobulone kushi ḳorouk bairor ḳam-ḳaz loia,
Isaḳor kushi rouk goror ḳamo roia.
19 Ḍaki ḍaki faṛor daro anbo manshore,
kurbani dibo hono ḳas sohi dile.
Doria taki tulba tara doriar feṭor don,
bali taki tulia anba lukail shob roton.
20 Sadu ḳandanor befare tain ḳoila:
Mubarok hou zon, Sadur zaega baṛai diba zein,
Sadu to shinghor laḳan ḳaf dori roe,
dushmonor at ar ḳolla siṛia falae.
21 Hoḳol taki shorosh zomi nizor lagi nise,
zoiggo murobbi ashon tar lagi toa oise.
Zatir shordar oḳol dola oar ḳalo,
Mabudor niae bisar he tamil ḳori dilo,
Boni Israilre deoa hukum fura mainno ḳorlo.
22 Dan ḳandanor befar tain ḳoila:
Furfura shinghor baichcha oilo dan ḳandan,
Bashon desh ton faldi aia ḳore boṛai shan.
23 Noftali ḳandanor befare tain ḳoila:
Noftali to Mabudor maea-momotat habu-ḍubu ḳar,
tan rohom-borkoto he hatar ḳaṭer.
Tumi tare tar afon shimanat ano,
soi-salamote Galil aor ar douknor desho neo.
24 Ashir ḳandanor befare tain ḳoila:
Ashire faibo rohomot oinno taki beshi,
hoḳol baie maea ḳorba tare rashi rashi.
Oto rohom boroḳot faia kushi taḳar ḳalo,
dui fao tar ḍubail roibo zoetunor telo.
25 Tar geiṭ oḳol bandail ouk lua ar tamadi,
he bolala mozbut rouk tar fura zindegi.
26 Musa nobie aro ḳoila:
Boni Israilor Allar homani dusra ḳeu nai,
tumrare shaijjor lagi asmano beṛain.
Tan nizor shan-mohimae megor saḳat soṛia,
shaijjoḳari oita sain tumrar lagia.
27 Hoḳol foelakur eḳ Allau oila ashroe ṭikana,
tan siroḳalin at dia tumrare raḳsoin doria.
Tumrar samnor hoḳol dushmon tainu ḳedai dein,
itare binash ḳoro hukum disoin tain.
28 Erlagi Israil zati bala-afta roin,
Iakub bongshor fanir zorna nirafod taḳoin.
Hino roibo foe-foshol ar angur roshe bora,
tar ufre lambo asmani kua.
29 O Boni Israil, mubarok aolad tumi!
Tumi oilae Mabud Allar azad ḳora zati.
Shoeong Mabud oila tumar zan basanir ḍal,
tainu oila tumar zoyor darail toluar.
Dushmon tumar samne aile tor-toraia ḳafe,
tumi tarar bukur ufre maṛa dibae ne.