Gûcookeria Mwathani nkaatho n'ûntû bwa kîao gîake
Sabuuri ya Ndaundi.
138
1 Wou Mwathani, ngagûkumia na nkoro yakwa yonthe,ngakwinîra nyîmbo cia gûkumia mbere ya ngai cia ûrongo.
2 Ngaaturia maru mberekereete Nyomba yaku întheru
na ngaakumia riîtwa rîaku
n'ûntû bwa wendo bwaku na wîtîgîka waku,
n'ûntû n'ûkîîrîîtie riîtwa rîaku na kiugo gîaku
îgûrû rîa mantû monthe.
3 Rîra ndeetanire, n'wambîtîgire,
na wambîkîra inya na wîru nkoro.
4 Anene bonthe ba nthîgûrû barookûgonga, woû Mwathani,
beegua biugo bia kanyua gaaku.
5 Baroina mantû maanene mara ûrûthîîte,
n'ûntû ûkumio bwa Mwathani i bûûnene.
6 Kinya ûkeegua Mwathani arî îgûrû n'araithagîîria ûra wînyiiagia,
îndî namenyaga mwîkumia kinya arî kûraaya.
7 Kinya ngakûrûkîîra gatîgatî ga kînyamaara,
n'ûmenyagîîra mwoyo wakwa
N'ûtambûrûkagia njara yaku îgûrû rîa mûthûûro wa anthû baakwa njara yaku,
ûkambonokia na njara yaku ya ûrîo.
8 Mwathani akaûyûria mûbango wake kîrî niû.
Mwathani, wendo bwaku bûra bûtûûraga tene na tene,
ûtigaatiganîrie ngûgî cia njara ciaku.