আল্লাই পাক রুহর নানান লাখান নিয়ামত
১২
১ ও ভাই অকল,
আমি চাইরাম আল্লাই পাক রুহর দান-নিয়ামতর বেয়াপারে তুমরার কুন্তাউ অজানা না রউক।
২ তুমরার জানা আছে,
আগে যেবলা তুমরা আল্লার এবাদত করতায় না,
হউ সময় তুমরারে অলাখান দেব-দেবীর বায় টানিয়া নেওয়া অইতো,
যেতায় কুন্তা মাতিতো পারে না।
৩ অইলে আমি তুমরারে জানাইরাম,
আল্লার রুহর বলে মাতিলে কুনু মানষে ইখান কয় না,
“ইছার উপরে লান্নত পড়উক।”
আর আল্লাই পাক রুহর বল ছাড়া কেউ কইতোও পারে না,
“হজরত ইছাউ মালিক।”
৪ অউ একই পাক রুহর নানান নমুনার দান-নিয়ামত আছে।
৫ আমরা নানান নিয়মে একই মালিকর খেজমত করি।
৬ আমরা পরতেক জনরে নানান নমুনার কাম-কাজ দেওয়া অইছে,
অইলে আল্লা পাক তো একজনউ,
তাইন নানান উপায়ে আমরার মাজে কাম করইন।
৭ হকলর ফায়দার লাগি অউ পাক রুহ একো জনর মাজে একো নমুনায় জাইর অইন।
৮ অউ পাক রুহর বলে কুনু কুনু জনরে জ্ঞান-বুদ্ধির মাত মাতা,
আর কেউররে আখলদারি মাত মাতার নিয়ামত দেওয়া অয়।
৯ একজনে অউ রুহর বলে গাইবি ভরসা পাইন,
আর অউ রুহর বলে দুছরা জনে বেমারিরে ভালা করার খেমতা পাইন,
১০ কেউ কেউ কেরামতি কাম করার খেমতা,
কেউ কেউ পীরাকি মাতার খেমতা,
কেউ কেউ বাদ-ভালা রুহ অকল আর জিন-ভুতরে চিনার খেমতা,
কেউ কেউ নানান নমুনার গাইবি ভাষায় মাতার খেমতা আর কেউ কেউ ইতার মানি বুজাইয়া দিবার খেমতা পাইন।
১১ ইতা হকল কাম তো অউ একই পাক রুহে করইন।
অউ দান-নিয়ামত অকল তান নিজর খুশি মাফিক পরতেক মুমিনরে বাটিয়া দেইন।
এক শরিলর মাজে বউত অংগ
১২ ও ভাইয়াইন অকল,
এক শরিলর যেলা বউত অংগ থাকে,
অলা বউত অংগ মিলিয়া এক শরিল অয়,
আল-মসীও তো ঠিক অলাখান।
১৩ আমরা বনি ইছরাইল অই বা ভিন জাতি অই,
আজাদ বা গুলাম অই,
অউ একই পাক রুহে হকলর তরিকাবন্দি অইছে এক শরিল অওয়ার লাগি।
হকলেউ তো অউ একই পাক রুহ পাইছি।
১৪ কুনু মানষর শরিলরে খালি এক অংগ দিয়া বানাইল অইছে না,
বরং বউত অংগ জুড়া দেওয়া অইছে।
১৫ অখন পাওয়ে যুদি কয়,
“আমার নাম তো আত নায়,
তে আমি শরিলর অংগও নায়,”
এরলাগি পাও যেন শরিলর অংগ নায়,
ইখান তো ঠিক নায়।
১৬ অউলা কানে যুদি কয়,
“আমার নাম তো চউখ নায়,
তে আমি শরিলর অংগও নায়,”
এরলাগি কান যেন শরিলর অংগ নায়,
ইখান তো ঠিক নায়।
১৭ মানষর আস্তা শরিলউ যুদি চউখ অইযিতো,
তে হুনবার খেমতা কই পাইলো অনে?
আর যুদি সারা শরিলউ কান অইযিতো,
তে ঘেরান হুংগিবার খেমতা কই রইলো অনে?
১৮ তে আল্লায় তান নিজর খিয়াল-খুশি মাফিক শরিলর নানান অংগরে এক এক করি হাজাইছইন।
১৯ হকল অংগ যুদি এক লাখান অইযিতো,
তাইলে শরিলর কুন হালত অইলো অনে?
২০ শরিলো বউত অংগ আছে,
তা-ও শরিল তো একটাউ।
২১ চউখে আতরে কইতো পারে না,
“তুমারে আমার দরকার নাই,”
আর মাথায় দুইও পাওরে কইতো পারে না,
“তুমরারে আমার দরকার নাই।”
২২ আসলে শরিলর যে অংগরে কমজুর মনো অয়,
অগুইনউ বেশি দরকারি।
২৩ শরিলর যে শরমর অংগরে আমরা হুরু-মুরু মনো করি,
ইটারে আমরা বেশি দাম দেই,
মানি যে অংগরে বারে দেখানি যায় না,
ইতারে আমরা ইজ্জত করিয়া গুরিয়া রাখি।
২৪ অইলে যে অংগরে বারে দেখানি যায়,
ইতারে গুরিয়া রাখার দরকার অয় না।
আসলে আল্লায় অউ হুরু-মুরু আর কমজুর অংগরে বেশি ইজ্জত দিয়া,
হকল অংগরে জুড়া লাগাইয়া এক শরিল বানাইছইন,
২৫ যাতে শরিল ভাগা-ভাগি না অয়,
বরং এক অংগয় আরক অংগরে নিজর লাখান মনো করে।
২৬ শরিলর এক অংগর যুদি কষ্ট অয়,
তে সারা শরিলে কষ্ট পায়,
আর এক অংগে ইজ্জত পাইলে,
আস্তা শরিলে খুশি-বাসি করে।
২৭ তে তুমরাউ অইলায় আল-মসীর শরিল,
তুমরা একো জন অউ শরিলর একো অংগ।
২৮ জানো নি,
আল্লায় তো জমাতর ভিতরে পয়লা সাহাবি,
বাদে পীরাকি মাত মাতরা,
বাদে উস্তাদ অকল বওয়াল করছইন।
এরবাদে বওয়াল করছইন যেরা কেরামতি কাম কররা,
বেমার ভালা কররা,
সাইয্য-সহায়তা কররা,
ইছায়ী জমাতরে চালাওরা আর নানান গাইবি ভাষায় মাতরা জন।
২৯ তে এরা হকলেউ কুনু সাহাবি পদ পাইছইন নি?
হকলেউ পীরাকি মাতইন নি?
হকলউ উস্তাদ নি?
আর হকলে কুনু কেরামতি কাম করার খেমতা পাইছইন নি?
৩০ হকলে কুনু বেমার শিফা করতা পারইন নি?
হকলেউ গাইবি ভাষায় মাতইন নি?
হকলেউ ইতার মানি বুজাইয়া দিতা পারইন নি?
নিচ্চয় না।
৩১ তা-ও আমি কইরাম,
তুমরা হকল থাকি দামি নিয়ামত অকল পাওয়ার লাগি আশিক অও।
আর খিয়াল করো,
অখন আমি তুমরারে আরো ভালা একখান পথ দেখাইরাম।