ꠀꠟ-ꠟꠥꠇ ꠍꠤꠙꠣꠞꠣꠔ ꠘꠣꠘꠣꠘ ꠔꠣꠟꠤꠝ ꠀꠍꠦ,

ꠄꠞꠝꠣꠎꠞ ꠝꠥꠟ ꠔꠣꠟꠤꠝ ꠅꠁꠟ,

ꠢꠎꠞꠔ ꠁꠍꠣ ꠀꠟ-ꠝꠍꠤꠃ ꠅꠁꠟꠣ ꠡꠣꠞꠣ ꠎꠉꠔꠞ ꠢꠇꠟ ꠝꠣꠘꠡꠞ ꠘꠣꠎꠣꠔꠞ ꠇꠣꠘ꠆ꠒꠣꠞꠤ।

ꠔꠣꠁꠘ ꠖꠥꠘꠤꠀꠔ ꠔꠡꠞꠤꠚ ꠀꠘꠤꠀ ꠖꠦꠈꠣꠁꠟꠣ,

ꠔꠣꠁꠘ ꠝꠣꠘꠡꠞꠦ ꠇꠔ ꠝꠣꠄꠀ ꠇꠞꠂꠘ।

ꠉꠞꠤꠛ-ꠖꠥꠈꠤ,

ꠅꠘꠣꠕ-ꠄꠔꠤꠝ,

ꠠꠣꠠꠤ,

ꠘꠤꠞꠣꠡ꠆ꠞꠄ ꠝꠣꠘꠡꠞꠦ ꠔꠣꠁꠘ ꠝꠣꠄꠀ ꠇꠞꠤꠀ ꠀꠡꠞꠄ ꠖꠦꠁꠘ।

ꠖꠥꠘꠤꠀꠞ ꠝꠣꠘꠡꠦ ꠎꠣꠞꠣꠞꠦ ꠄꠟꠣꠝꠤ ꠛꠣ ꠔꠥꠌ꠆ꠍ ꠇꠞꠦ,

ꠔꠣꠁꠘ ꠄꠞꠣꠞꠦꠅ ꠀꠖꠞ ꠇꠞꠂꠘ।

ꠢꠥꠞꠥ ꠢꠥꠞꠥ ꠘꠣꠛꠣꠟꠤꠇ ꠢꠥꠞꠥꠔ꠆ꠔꠣ,

ꠘꠤꠞꠣꠡ꠆ꠞꠄ ꠛꠦꠐꠤꠘ꠆ꠔꠞꠦ ꠔꠣꠁꠘ ꠈꠥꠛ ꠀꠖꠞ ꠇꠞꠂꠘ।

ꠀꠟ꠆ꠟꠣꠞ ꠎꠔ ꠛꠘ꠆ꠖꠣ ꠀꠟ꠆ꠟꠣꠞ ꠖꠞꠛꠣꠞ ꠕꠣꠇꠤ ꠢꠞꠤꠀ ꠉꠦꠍꠦꠉꠤ,

ꠔꠣꠞꠣꠞꠦ ꠔꠥꠇꠣꠁꠀ ꠀꠘꠤꠀ ꠢꠤꠞꠛꠣꠞ ꠀꠟ꠆ꠟꠣꠞ ꠛꠣꠖꠡꠣꠁꠔ ꠎꠣꠉꠣ ꠖꠤꠍꠂꠘ।

ꠢꠎꠞꠔ ꠁꠍꠣ ꠞꠥꠢꠥꠟ꠆ꠟꠣꠞ ꠘꠣꠝꠃ ꠛꠤꠘ-ꠀꠖꠝ,

ꠝꠣꠘꠤ ꠀꠖꠝꠞ ꠀꠅꠟꠣꠖ,

ꠝꠣꠘꠥꠡ ꠍꠥꠞꠔꠦ ꠀꠅꠀ ꠀꠟ꠆ꠟꠣꠞ ꠈꠟꠤꠚꠣ।

ꠁ ꠍꠤꠙꠣꠞꠣꠞ ꠙꠄꠟꠣ ꠞꠥꠇꠥꠔ ꠀꠍꠦ ꠀꠟ-ꠝꠍꠤꠄ ꠖꠥꠘꠤꠀꠔ ꠔꠡꠞꠤꠚ ꠀꠘꠞꠣ,

ꠁꠐꠣ ꠀꠟ꠆ꠟꠣ ꠙꠣꠇꠞ ꠈꠣꠍ ꠝꠞ꠆ꠎꠤ।

ꠢꠤꠞꠛꠣꠞ ꠀꠈꠦꠞꠤ ꠞꠥꠇꠥꠔ ꠛꠄꠀꠘ ꠇꠞꠣ ꠅꠁꠍꠦ,

ꠔꠣꠁꠘ ꠎꠤꠘ꠆ꠖꠣ ꠢꠣꠟꠔꠦ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠤꠍꠂꠘ।

ꠁꠐꠣꠅ ꠝꠣꠛꠥꠖꠞ ꠈꠣꠍ ꠝꠞ꠆ꠎꠤ,

ꠀꠞ ꠢꠣꠞꠣ ꠖꠥꠘꠤꠀꠞ ꠝꠣꠘꠡꠞ ꠟꠣꠉꠤ ꠈꠥꠡꠤꠞ ꠈꠛꠞ।

ꠅꠃ ꠍꠤꠙꠣꠞꠣꠞ ꠛꠃꠔ ꠔꠣꠟꠤꠝ ꠛꠣꠔꠣꠁꠟ ꠅꠁꠍꠦ ꠝꠤꠍꠣꠟ ꠛꠣ ꠇꠤꠌ꠆ꠍꠣ ꠖꠤꠀ।

ꠁ ꠔꠣꠟꠤꠝ,

ꠇꠦꠞꠣꠝꠔꠤ-ꠝꠥꠎꠦꠎꠣ,

ꠀꠞ ꠔꠛꠟꠤꠉꠞ ꠛꠄꠀꠘꠖꠤ ꠛꠥꠎꠣꠁꠟ ꠅꠁꠍꠦ,

ꠢꠎꠞꠔ ꠁꠍꠣꠃ ꠅꠁꠟꠣ ꠀꠡ꠆ꠔꠣ ꠖꠥꠘꠤꠀꠞ ꠝꠣꠘꠡꠞ ꠟꠣꠉꠤ ꠀꠟ꠆ꠟꠣꠁ ꠞꠢꠝꠔ।

ꠈꠣꠟꠤ ꠔꠣꠘ ꠃꠍꠤꠟ꠆ꠟꠣꠄ ꠢꠇꠟ ꠘꠝꠥꠘꠣꠞ ꠉꠥꠘꠣꠞ ꠝꠣꠚꠤ ꠙꠣꠅꠀ ꠎꠣꠄ।

ꠔꠣꠁꠘꠃ ꠀꠡ꠆ꠔꠣ ꠖꠥꠘꠤꠀꠞ ꠘꠣꠎꠣꠔꠞ ꠇꠣꠘ꠆ꠒꠣꠞꠤ।

ꠀꠝꠞꠣ ꠅꠃ ꠍꠤꠙꠣꠞꠣꠞ ১৯ ꠞꠥꠇꠥ ১০ ꠀꠄꠀꠔꠅ ꠖꠦꠈꠤ,

ꠢꠎꠞꠔ ꠁꠍꠣꠄ ꠇꠁꠞꠣ,

“ꠅꠃ ꠟꠣꠈꠣꠘ ꠛꠦ-ꠙꠕꠤ ꠅꠇꠟꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠀ,

ꠔꠣꠞꠣꠞꠦ ꠛꠣꠌꠣꠘꠤꠞ ꠟꠣꠉꠤꠃ ꠔ ꠀꠝꠤ ꠛꠤꠘ-ꠀꠖꠝ ꠁ ꠖꠥꠘꠤꠀꠔ ꠀꠁꠍꠤ।”

ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠅꠃ ꠍꠤꠙꠣꠞꠣ ꠟꠦꠈꠍꠂꠘ ꠢꠎꠞꠔ ꠟꠥꠇ (ꠞ:)।

ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ꠕꠣꠇꠤ ꠎꠣꠘꠣ ꠎꠣꠄ,

ꠢꠎꠞꠔ ꠟꠥꠇꠞ ꠙꠦꠡꠣ ꠀꠍꠤꠟ ꠢꠦꠇꠤꠝꠤ ꠒꠣꠇ꠆ꠔꠞ।

ꠔꠣꠁꠘ ꠢꠎꠞꠔ ꠁꠍꠣꠞ ꠍꠣꠢꠣꠛꠤ ꠢꠎꠞꠔ ꠙꠣꠃꠟꠥꠍꠞ ꠈꠦꠎꠝꠔꠅ ꠞꠁꠀ ꠘꠣꠘꠣꠘ ꠖꠦꠡꠞ ꠘꠣꠘꠣꠘ ꠎꠣꠔꠤꠞ ꠉꠦꠍꠦ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠔꠣ।

ꠢꠎꠞꠔ ꠁꠍꠣ ꠖꠥꠘꠤꠀ ꠕꠣꠇꠤ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ৩০ ꠛꠍꠞ ꠛꠣꠖꠦ ꠅꠃ ꠍꠤꠙꠣꠞꠣ ꠇꠤꠔꠣꠛ ꠀꠇꠣꠞꠦ ꠟꠦꠈꠣ ꠅꠁꠍꠦ।

ꠅꠃ ꠀꠟ-ꠟꠥꠇ ꠍꠤꠙꠣꠞꠣ ꠅꠁꠟ ꠢꠎꠞꠔ ꠟꠥꠇꠞ ꠟꠦꠈꠣ ꠙꠄꠟꠣ ꠍꠤꠙꠣꠞꠣ,

ꠛꠣꠖꠦ ꠔꠣꠁꠘ ꠍꠣꠢꠣꠛꠤ ꠘꠣꠝꠣ ꠘꠣꠝꠞ ꠀꠞꠇ ꠍꠤꠙꠣꠞꠣ ꠟꠦꠈꠍꠂꠘ।