UYesu akumunaniya umuunu umunya mubepo umuviifu
5
1 UYesu na vanyigendwa vaakwe vaalowiike imwambu iya nyandza ya Galilaya, viifikaga ku nyi ya Vagelasi. 2 UYesu pe iihuma mu waato, iitaangʼanaga nu mwadaada umunya mubepo umuviifu áhumile ku mombwe.a 3 Umuunu uyo iikalaga ku mombwe. Asaali pwali umuunu ye aali nu ludali lwa kumupinga nambe ni minyololo. 4 Vamupingaga ni mipingo mu mawoko ni minyololo mu magulu mbeepali, napo kangi aadumulaga. Kangi asaali kwali umuunu ye amulemaga. 5 Ikilo nu muunyi aavedzaga ku mombwe na mu fidunda kuno iikoovanika nu kwikinya na maganga.6 Pe aaviye ámuweene uYesu pa wutaali, akumunyilililaga iifugamaga pa magulu gaakwe. 7 Iikemeelaga mu sawuti ngomi iitigilaga, “Ve Yesu, Muswamuve va Nguluvi uMukomi! Uli wuki naane? Mu litaawa lya Nguluvi, ndikukuyiigila siiwo utane ukuumumusa!” 8 Pakuva uYesu aatalile ukulonga ukutigila, “Ve mubepo muviifuave, uhume mwa muunu uyu!” 9 UYesu akumuwuudzaga iitigilaga, “Ilitaawa lyako ani?” Iihigaga iitigilaga, “Ilitaawa lyangu ndiitambulwa Legyoni,b pakuva tuli voloofu.” 10 Umuunu uyo kangi na kangi akumugongoolaga uYesu ukutigila, atane ukugilosa gihege mu luvala ulo. 11 Mu luvambala ulo, kwali nu lupinga lukomi lwa magubi agaaliidzaga. 12 Imibepo igyo gikumugongoolaga uYesu giitigilaga, “Ututawule tuhelele tukiingile mu magubi gala.” 13 UYesu akugitawulaga, neke gihumage mwa muunu uyo nu kwingila mu magubi. Ulupinga lukomi lwa magubi ngita mbilima dzivili (2,000), giisulunukaga lunyilo ku ligeema, giikwingilaga mu nyandza, giifuwaga.
14 Avadiimi va magubi ago viinyilaga lunyilo, viihelelage viilonga imola iyi ku vaanu vonda va ku wudzenge na ku migunda. Avaanu viifikaga kulola ídzilimiike. 15 Vaaviye váfikile pa Yesu, vakumuwonaga umuunu uyo ye akali ni mibepo imiviifu íikalile, áfwalile imyenda, ali nu luhala lugolofu, viikoogopaga hiilo. 16 Avaanu avadziweene ídzilimiike, viilongaga ku vaanu avangi, ulwa muunu uyo nu lwa magubi. 17 Wiimila wa ulo, vakumugongoolaga uYesu ahege mu nyi yaawo.
18 UYesu pe iikwingila mu waato, umuunu ye akali ni mibepo imiviifu iigongoolaga aheleengʼasage nave. 19 UYesu akumukaanidzaga iitigilaga, “Helelage ku kaaya ku vanyalukolo vaako, ukavalongele dzonda dze ákulimiye uMutwa, nu lupyana lwakwe ukwako.” 20 Neke umuunu uyo ahegage, ahelelage iidalika dzonda dze ámulimiye uYesu mu Ndzenge Dzinyikyumi (10)c idza nyi iyo. Avaanu vonda viidzumaga hiilo.
UYesu akumunaniya umwayuuva nu kumudzulubusa umuhindza
21 UYesu pe aaviye álowiike inyandza mu waato, ali mu ngʼumbungʼumbu, ililugu lya vaanu likumulundanilaga. 22 Iikwadzaga umuunu yumwinga va vandzaagila va luholanilo ye aatambulwaga Yayilo. Pe aaviye ámuweene, akwigwisaga pa magulu ga Yesu. 23 Iigongoolaga iitigilaga, “Umwali-vangu umudebe mutamwa hiilo, asanga afuwa. Siiwo, waadze umuviikile amawoko apone avedze muumi.” 24 UYesu iiheleengʼasaga nave ku kaaya ya muunu uyo. Pe vali mu ngʼaasi, ililugu lya vaanu lyamuniniilaga nu kumusukanga uYesu.
25 Mu lilugu ilyo, aali mwali umwayuuva yumwinga ye aali nu wutamwa wa kuhuma idandad mu myaka ginyikyumi ni givili (12). 26 Aapumwike hiilo mu kuhelela ku vayavi-migoda voloofu nu kuhomba ifiinu fyakwe fyonda kitapona, kangi uwutamwa waakwe waaginaga. 27 Aaviye ápuliike imola dza Yesu, iihumiingʼasaga mu lilugu iipamyaga umwenda gwa Yesu. 28 Pakuva aahoodziidze mu numbula yaakwe ukutigila, “Ngana ndikapamye umwenda gwakwe apo ndiipona.” 29 Umusika guugo idanda iyamuhumaga, yiikatukaga, akwipulikaga mu muvili áponile uwutamwa we akali nawo. 30 Kangi umusika guugo uYesu iiwonaga ukutigila ingufu dzaakwe dzíhegile. Iiseedukilaga ililugu iitigilaga, “Ye ani ye ápamiidze umwenda gwangu?” 31 Avanyigendwa vaakwe viipilusaga viitigilaga, “Lolage ililugu lyonda kye likukusukanga, kye kiki wiiwuudza ye ákupamiidze?” 32 Neke kangi uYesu aginage ukulolaasa imbali dzonda amuwone ye ámupamiidze. 33 Umwayuuva uyo pe aadzeeliye ídzilimiike ukwakwe, iikoogopaga, iihelelaga, akwigwisaga pa magulu ga Yesu kuno iihilila, pakuva aadzeeliye ídzilimiike ukwakwe. Akumulongelaga kye lukali. 34 Neke umwene atigilage, “Mwali vanguave, ulufuuwo lwako lúkunaniidze. Uhelelage nu lutengamaso, lino úponile ikitamwa kyako.”
35 Pe iilonga idzo, viikwadzaga avaanu avaatumiilwe ukuhuma ku kaaya ya Yayilo, umundzaagila va luholanilo, vakumulongelaga viitigilaga, “Umwaliwo áfuwe. Utane ukumufwahidza uMuwulanidzi.” 36 UYesu iibedalilaga dze viilonga, neke amukangadzage uYayilo atigilage, “Utane ukoogopa, ufuuwage hela.” 37 Neke uYesu alikaanilage ililugu litane ukumuniniila. Iihegaga nu Petulo, uYakobo nu Yohana umunungʼuve va Yakobo. 38 Pe vaafikile pa kaaya ya Yayilo, uYesu akuvawonaga avaanu viivemba nu koova. 39 Iikwingilaga mu nyumba iitigilaga, “Kye kiki mwivemba nu koova? Umuhindza uyu asinaa afuwa, nda haamu, ágoneeliye hela!” 40 Ililugu pe lyapuliike, liidzumaga nu kumuheka mbandu.
UYesu akuvahumyaga vonda piivala, akuvanyamulaga avavaha va muhindza na vanyigendwa vadatu, viikwingilaga mwe gugenda umufimba gwa muhindza. 41 UYesu iikwibataga iliwoko lya mwana, iitigilaga, “Talita kumi!” Kwe kutigila, “Ve muhindzaave, ndiitigila wiime!” 42 Neke baaho umuhindza iimage, agendage. Aali munya myaka ginyikyumi ni givili. Avaanu vonda viidzumaga hiilo! 43 UYesu akuvakaanidzaga iitigilaga, “Kitagela kulonga kwa muunu yungi lwe múluweene ulu. Mumupeele umuhindza uyu ifiliyo aliye.”