Ikihwananidzo kya munya kumiidza imbeyu
4
1 UYesu aavangile kangi ukuvawulanidza avaanu pa ngʼumbungʼumbu ya nyandza ya Galilaya. Pakuva ililugu likomi lya vaanu lyamupiliime, uYesu iikwingilaga mu waato akwikalaga, ililugu lyonda liisigalaga ku ngʼumbungʼumbu. 2 Neke avawulanidzage ndzoloofu mu fihwananidzo atigilage, 3 “Mupulikidzage! Umunya kumiidza aaheliye kumiidza imbeyu ku mugunda gwakwe. 4 Pe iimiidza, imbeyu iyingi yiigwilaga mu ngʼaasi, ifidege fiikwadzaga fiiholaga. 5 Imbeyu iyingi yiigwilaga pa lutalaawe apangaya muganga goloofu. Imbeyu iyo yiimelaga kisaatu, pakuva umuganga gwali mukeefu. 6 Ilidzuwa pe lívalile, ifimelo fiiyongodokaga, pakuva indela dzaalemiilwe ukwika paanyi. 7 Iyingi yiigwilaga pa miifwa. Imiifwa pe giikulanila ni fimelo fya mbeyu iyo, giihologotedzaga ifimelo ifyo, neke filemwage ukuveleka. 8 Imbeyu iyingi yiigwilaga pa muganga úgunonile, yiivelekaga ifiveleko makyumi gadatu (30), iyingi makyumi mutanda (60), ni yingi ligana limwinga (100)!” 9 “Umuunu ye avedzaga ye ali na masiikidza agiipulika, apulikage.”UYesu iiganula uwugulume wa fihwananidzo
10 UYesu pe aali mwene, avanyigendwa vaakwe na vangi avamuniniilaga, vakumuhelelelaga vakumuwuudzaga ulwa figanulo ifya fihwananidzo fye álongile. 11 UYesu akuvalongelaga iitigilaga, “Unyeenye múpeeliilwe ukudzidzeela idza kinyele idza wutwa wa Nguluvi, neke vonda avali kwivala ndikuvalongela dzonda mu fihwananidzo, 12 kwe kutigila,
‘Ukulola valolage, neke kangi vatanage ukufiwona.
Ukupulika vapulikage, neke kangi vatanage ukulufika.
Kye kileka valemwage ukupituka nu kuwodzwa indzanangifu dzaawo.’a ”
Ikiganulo kya kihwananidzo kya munya kumiidza
13 Neke uYesu avawuudzage avanyigendwa vaakwe atigilage, “Mwilemwa ukulufika ulwa kihwananidzo iki? Apo ifihwananidzo ifingi fyonda muhadza mukulufika wuli? 14 Umunya kumiidza iimiidza ilidzwi lya Nguluvi. 15 Imbeyu iyiigwila mu ngʼaasi ve vaanu aviipulika ilidzwi lya Nguluvi, neke valemwage ukwinatila, baaho uSetano iikwadza iihedza ilidzwi ílimiidziilwe mugati umwawo. 16 Avangi vali ngita mbeyu pe yímiidziilwe pa lutalaawe. Pe viipulika ilidzwi, viikwanukila nu lukeelo. 17 Pakuva ilidzwi ilyo lingaya midela mu numbula dzaawo, viikwinatila mu musika mudebe. Pe dzikuvafikila imumuko ni nalamu wiimila wa lidzwi, baaho viileka ukulifuuwa. 18 Avaanu avangi vali ngita mbeyu iyaamiidziilwe pa miifwa, viipulika ilidzwi ilyo, 19 kangi pe viitaangʼana ni ngudo idza pe naanyi, ukudzangwa nu wumosi, nu wudobofu uwuli poloofu, ifi fiihologotedza ilidzwi lilemwe ukuveleka. 20 Avangi, vali ngita mbeyu iyaamiidziilwe pa muganga úgunonile, ve veene aviipulika ilidzwi nu kuliinatila, neke vavelekage ifiveleko fyoloofu, uyungi makyumi gadatu, uyungi makyumi mutanda, uyungi ligana limwinga.”
Dzonda dzilaavedza pa weelu
21 UYesu akulilongelaga ililugu iitigilaga, “Ongo, avaanu vaavikunga ulumuli neke valeete nu kugubikila ni ndiilo, enewuli vaaviviika mu lifungo ilya wulili? Nambi! Ulumuli vaaviviika pakyanya pa kinenevekelo. 22 Ndeeni kye lugenda, dzonda idzili ku kinyele dzilaavedza pa weelu, kangi dzonda ídzifihamiike dzilaakagulika. 23 Ye ali na masiikidza agiipulika, apulikage!
24 “Mupulikidzage wunofu dze ndiilonga, kye mwigelela ku vangi, kye kyene kye alavagelela uNguluvi na yuunye, kangi alavalutihidza. 25 Pakuva umuunu ye avedzaga ye akukilimila wunofu ikyo kye ápeeliilwe pa kulufika, uNguluvi ahadza iikoongeledza ni fingi. Neke kangi umuunu ye asikukilimila kye ápeeliilwe pa kulufika, uyo nambe kye ali nakyo uNguluvi ahadza iinyaga.”b
26 Neke uYesu aginage ukulonga atigilage, “Uwutwa wa Nguluvi wúlingʼiine ni kihwananidzo iki. Umuunu aaheliye kumiidza imbeyu mu mugunda. 27 Pe aagonile nu kulamuka, ikilo nu muunyi imbeyu dziimelaga neke dzikulage, umuunu uyo kitadzeela. 28 Inyi yiivelesa ifiveleko yeene, ukuvangila akahamba, pambele inyoodzo, pa wusililo imeke idza ngana dziikangala mu nyoodzo. 29 Imeke pe dzíkangiye, iihelela nu mumaage kubena, pakuva fye figono ifya mbene.”
Ikihwananidzo kya kapeke ka lilongoti
30 UYesu aalongile ikihwananidzo ikingi iitigilaga, “Uwutwa wa Nguluvi wúlingʼiine na kiki? Tuhwananidze ni kihwananidzo kiki? 31 Uwutwa wa Nguluvi wuli ngita akapeke ka lilongoti, akapeke aka kadoodo hiilo mu nyi. 32 Neke pe káyaaliilwe, kiimela nu kugunga kivedze kimelo kikomi pa fimelo fyonda ifya mu migunda. Kangi kiivedza na mahandzo makomi ni fidege fiisamba ifyaso nu kwikala mu mwifunyi gwakwe.”
33 Mu fihwananidzo fyoloofu ngita ifi, aadalikaga ku vaanu iMola iNofu iya wutwa wa Nguluvi, kuno iigelanihidza pa luhala lwawo ulwa kuyifika. 34 Asaalongaga luluvedzaga ukwawo ngaya kihwananidzo. Pe aavedzaga na vanyigendwa vaakwe, apo aaganulaga dzonda idza fihwananidzo.
UYesu iinyaamadza ilivelo mu nyandza
35 Ikigono kiikyo pa kyamihe, uYesu avalongiye avanyigendwa iitigilaga, “Tulowoke imwambu iya nyandza.” 36 Neke valilekage ililugu, vamunyamulage uYesu kye ali mu waato ndeeni. Kangi waali poowuli baaho nu waato uwungi. 37 Pe viihelela, ilivelo ilikomi mu nyandza liidwadwalusaga amavingo giitovaga uwaato, neke wuvangage ukumema ululenga. 38 Umusika ugo, uYesu aagoneeliye kuno áhaguwe umutuwe pa lihagulilo mu waato kumbele. Avanyigendwa vaakwe vakumulamusaga viitigilaga, “Muwulanidzaave, uveeve usiiwona kiinu nde tufuwe?” 39 UYesu iilamukaga iikenyelaga ilivelo, akugalongelaga amavingo iitigilaga, “Dzike! Ulitame!” Ilivelo liidzikaga nayi nyandza yiilitamaga. 40 Neke avalongelage avanyigendwa vaakwe atigilage, “Kye kiki mwikoogopa? Mwave musiifuuwa?” 41 Aveene voogwipe hiilo, vakwiwuudzaga veene viitigilaga, “Uyu ye ani? Nali livelo na mavingo fikumwidika!”