Ikihwananidzo kya valimi avahosi
12
1 UYesu iivangaga ukuvalongela avavina avo mu fihwananidzo iitigilaga, “Aali kwali umuunu yumwinga ye oogiike imisabibu mu mugunda gwakwe,a iisitaga ulusito, iiviikaga ilidodeeledzelo, iidzengaga ikitinga ikya kuloleelela. Akuvapagadzaga avalimi, neke ahelelage ulugendo ku nyi ya kutaali. 2 Mu musika gwa kunyokola isabibu, iitumaga umulimila-vangi vaakwe ku valimi avo akanyamule ulubali lwakwe lwa fiveleko fya sabibu. 3 Avalimi avo vakumwibataga, vakumutovaga nu kumudagiilidza, iipilukaga mawoko geene. 4 Neke amutumage kangi umulimila-vangi uyungi. Uyu vakumutovaga ku mutuwe nu kumuyeyewula. 5 Akumutumaga kangi umulimila-vangi uyungi, uyu nave vakumukomaga. Akuvatumaga na vangi voloofu, avangi viitowaga, avangi viikomwaga. 6 Pambele iisigalaga umuunu yumwinga, umuswamuve umwende vaakwe. Uwusililo waakwe akumutumaga nave iitigilaga, ‘Umuswamu-vangu vahadza vakumuginiya.’ 7 Neke kangi avalimi avo valonganage veene vatigilage, ‘Umunya lipwela ilya mugunda ugu ye uyu. Mwadze tumukome, ukuta ilipwela lyakwe livedzage lyesu.’ 8 Vakumwibataga, vakumukomaga nu kumutaaga kwivala ya mugunda gwa misabibu.9 “Lino umunya mugunda uyo ahadza iilima kiki? Iikwadza avakome avalimi avo, nu kuvapeela umugunda avalimi avangi. 10 Musiludzeele úlusimbiilwe mu Wusimbe uwo?
‘Iliganga lye vaakaanileb avanya kudzenga,
lino lívedzile liganga likomi ilya pa wiidamikoc wa nyumba yonda.
11 UMutwa Nguluvi ye mwene ye álimile ulu,
nalo ludzumo pa miiho geesu.’d ”
12 Avateekedzi avakomi, avawulanidzi va milagililwe na vavaha va Vayahudi viitemulaga ingʼaasi ya kumwibata, pakuva valukaguwe ukutigila ávalongile aveene mu kihwananidzo. Neke kangi voogopage ililugu lya vaanu, vamulekage, vahelelage ukwawo.
Ukuhomba ikodi kwa Kayisali
13 Neke vavatumage vamwinga mu Vafwalisayo na Vahelodee kwa Yesu, vakamugemye, ukuta vamudadihidze mu dze álongile. 14 Viihelelaga kumulongela viitigilaga, “Muwulanidzaave, twidzeela ukutigila uveeve uli muunu va ndakyene. Kangi usikuwoogopa nambe wutambule we vali nawo, pakuva usiilola kye vagenda. Wiiwulanidza idza ndakyene ku vaanu valimage ngita kye iisaka uNguluvi. Ongo, lwikwidikwa uneefwe ukuhomba ikodi kwa Kayisali,f enewuli lusiikwidikwa?” 15 UYesu awudzeeliye uwukedusi waawo, akuvawuudzaga iitigilaga, “Kye kiki mukuungemya? Muundeetele iligoobeli lya dinaalig ndilole!” 16 Pe vaaviye vámupeeliye akuvawuudzaga iitigilaga, “Uluhwano ni litaawa ifili mu ligoobeli lya dinaali iyi, fya ani?” Aveene viitigilaga, “Fya Kayisali.” 17 UYesu iitigilaga, “Lino ifya Kayisali, mumupeelage uKayisali, ifya Nguluvi mumupeelage uNguluvi.” Vakumudzumaga hiilo.
UYesu iiwulanidza ukutigila uludzulubuko lwa vaanu kooluli
18 Kwali ni kipuga kya Vayahudi ikyakemeelwaga Vasadukayo.h Avo vasaafuuwaga ukutigila kooluli uludzulubuko lwa ávafuwe. Neke vamuhelelelage uYesu vatigilage, 19 “Muwulanidzi, uMose atusimbiye ululagi ulwitigila, ‘Ngana umugoosi áfuwe, ámulekile umudala vaakwe kitamubaabihidza mwana, apo umunungʼuve amuhaalage umufwile uyo, ukuta amubaabihidze avaana uyo ye áfuwe.’i 20 Lino vaali koovali avanyalukolo mufungʼati (7). Uva kutala aatoolile umudala, neke afuwage kitamubaabihidza vaana. 21 Uva kavili akumuhaalaga umufwile uyo, nave iifuwaga kitamubaabihidza mwana. 22 Lwivedzaga ewo nava kadatu. Ndeeni, vonda mufungʼati vaafuwe kitabaabihidza vaana. Pambele umudala umufwile uyo nave iifuwaga. 23 Lino, ngana kulaavedza nu ludzulubuko lwa ávafuwe, ngita kye wiilonga, apo umudala uyo alaavedza na vagoosi mufungʼati! Nde siluli ewo ukuvedza na vagoosi mufungʼati, apo uludzulubuko sikooluli.”
24 Neke baaho uYesu apilusage atigilage, “Ndakyene unyeenye mwiyaga, pakuva musiidzeela uWusimbe uWiimike nambe ngufu dza Nguluvi. 25 Pakuva ávafuwe umusika pe valaadzulubuka, vasilaatoola nambe kutawuka, nda haamu, valaavedza ngita vanyamwandza va kukyanya. 26 Neke kangi luli ndakyene ukutigila ávafuwe valaadzulubuka. Musinaa mwimba mu Wusimbe wa Mose ulwa kitundu ikyakaga umooto? Apo, uNguluvi aalongile nu Mose aatigiye, ‘Yuune nde Nguluvi va Abulahamu, uNguluvi va Isaka, nu Nguluvi va Yakobo.’j 27 Nde luvedze avaanu vonda ava vaafuwe, vapila vuumi, pakuva umwene si Nguluvi va ávafuwe, nda haamu va vuumi. Apo ndiiwona mwiyaga mbandu!”
Ululagi ulukomi ukulutila dzonda
28 Umuwulanidzi va milagililwe yumwinga aadzile, akuvawonaga viilongana, iipulikidzaga. Pe aaweene uYesu ávahigile wunofu aVasadukayo, akumuwuudzaga iitigilaga, “Mu milagililwe gyonda, luli kwi ululagi ulukomi ukulutila dzonda?” 29 UYesu iihigaga iitigilaga, “Ulwa kutala lwe ulu, ‘Pulikidzage ve Isilaheli, uMutwa ye Nguluvi veesu, kangi ye Mutwa yumwinga. 30 Umwendage uMutwa Nguluvi vaako ni numbula yaako yonda, nu wuumi waako wonda, nu luhala lwako londa, ni ngufu dzaako dzonda.’k 31 Kangi ulwa kavili lwitigila, ‘Umwendage umuyago ngita kye ukwiyenda yuuve.’l Sikooluli ululagi úlulutiye idzi.”
32 Umuwulanidzi va milagililwe akumulongelaga iitigilaga, “Eena, Muwulanidzi! Úlongile ndakyene ukutigila, uNguluvi ye yumwinga swe, sikwali uyungi, yuuyo swe. 33 Kangi úlongile ndakyene ukutigila, ‘Umwendage mwene mu numbula yaako yonda, nu luhala lwako londa, ni ngufu dzaako dzonda, kangi umwendage umuyago ngita kye ukwiyenda yuuve.’ Idzo dze ngomi dze iikeela uNguluvi ukulutila uwusembe wonda wa kunyaanya ni nambika.” 34 UYesu pe aaweene umuunu uyo álongile mu luhalawukagudzi iitigilaga, “Uveeve usili kutaali nu wutwa wa Nguluvi.” Ukuhumila apo, asaali kwali umuunu ye aagelile ukumuwuudza imbuudzo dzingi.
UMesiya ye Muswamuve va Dawudi kangi Mutwa
35 UYesu pe aali mu kuwulanidza mu lipaala lya tembeli, iiwuudzaga iitigilaga, “Kye kiki avawulanidzi va milagililwe viitigila uMesiya ye Muswamuve va Dawudi? 36 UDawudi yumwene aalongile mwa Mubepo uMwimike ukutigila,
‘UMutwa Nguluvi amulongiye uMutwa vangu,
“Wiikale ulubali lwangu ulwa kundiyo,m
ukufikila pe ndiivedza ndívadelwidze avatavangwa vaako,
nu kuvaviika paanyi pa ndzayo dzaako.” ’n
37 “Lolage, uDawudi yumwene akumutambula uMesiya ukutigila, ‘Mutwa.’ Apo, uMesiya iivedza muswamuve wuli wuli?”o Umusika pe aalongaga, ililugu likomi lya vaanu ilyali apo lyamupulikidzaga mu lukeelo.
Ukwiyangalila na vawulanidzi va milagililwe
38 UYesu pe aali mu kuwulanidza, iilongaga ukutigila, “Mwiyangalilage na vawulanidzi va milagililwe. Viikeela ukugenda váfwalile imingila mitaali nu kuhungilwa nu luginiyo pe viigenda mu magulilo. 39 Kangi viikeela ukwikala mu fideego ifya wutambule mu nyolanilo na mu ngʼeelanilo. 40 Kangi vakuvadzanga avafwile na vagoosi wugendela wa kunyamula imaale dzaawo, viilapangila indapangilo naali hiilo, ukuta vawoneke vagolofu ku vaanu. Wiimila wa idzo, uNguluvi alavapeela uluhigo lukali hiilo!”
Uwusembe wa mwayuuva umufwile nu mugoosi
41 UYesu iikalile biihi kidonya ni sanduka iya kusopa uwusembe pa lipaala lya tembeli, iilola ililugu lya vaanu pe viisopa uwusembe. Avamosi voloofu vaasopaga amagoobeli goloofu. 42 Neke amuwonage umwayuuva yumwinga, umufwile nu mugoosi kangi muhangala, iihelela kusopa utugoobeli tuvili tudebe hiilo. 43 Pe aluweene ulo, uYesu akuvakemeelaga avanyigendwa vaakwe akuvalongelaga iitigilaga, “Ndakyene ndikuvalongela ndiitigila, umwayuuva umufwile uyu, kangi muhangala, átawuwe pakomi ukulutila avangi vonda. 44 Pakuva vonda ava vátawuwe ífilemwike mu wumosi waawo, neke kangi umufwile uyu, mu wuhangala waakwe, átawuwe fyonda ifikali fya kumutanga mu wuumi waakwe.”