UYesu iikwingila mu Yelusalemu nu luheeyo
11
1 Pe vaali biihi ukufika ku Yelusalemu, viifikaga ku luvala lwa Betifwage nu lwa Betaniya ku Kidunda kya Miseyituni. UYesu akuvatumaga avanyigendwa vaakwe vavili, 2 iitigilaga, “Muhelele ku luvala ululi kuwutalo ukwenyo. Pe mwivedza mwikwingila umo, mukuyiwona indzanambunda ndzavike asinaa ahovaga muunu. Muyaawulage, muyileete apa. 3 Ngana umuunu akuvawuudza iitigila, ‘Kye kiki mukuyaawula?’ mumulongelage mutigilage, ‘UMutwa áyigulwime, iipilusa kisaatu.’ ”4 Viihelelaga, vakuyiwonaga indzanambunda ndzavike pa lubali pa ngʼaasi biihi nu mulyango gwa nyumba. Pe vali mu kuyaawula, 5 avaanu aviimile baaho vakuvawuudzaga viitigilaga, “Mwilima kiki unyeenye? Kye kiki mukuyaawula indzanambunda iyo?” 6 Avanyigendwa viihigaga ngita kye avalagiidze uYesu, neke vavalekage vahelelage nayo. 7 Pe vamusindikiye uYesu indzanambunda iyo, viidzaalikaga imyenda gyawo pakyanya pa ndzanambunda,a uYesu iihovaga, yiivangaga ukugenda. 8 Avaanu voloofu vaadzaalikaga imyenda gyawo mu ngʼaasi, na vangi amahandzo ge vaadumuwe mu migunda ukuwoneesa luginiyo ukwakwe. 9 Avaanu avaalonguwe pa mbunda na avaali mumbele vonda vaahelelaga viiyooya viitigila,
“Hosyana!b
Áfuunyiliilwe ye iikwadzila mu litaawa lya Mutwa Nguluvi!c
10 Wúfuunyiliilwe uwutwa wa dadiisu uDawudi uwiikwadza!
Hosyana, uNguluvi ye ali kukyanya!”
11 UYesu pe aafikile ku wudzenge wa Yelusalemu, iingiye mu tembeli,d iilolaga ifiinu fyonda ifyali umo. Pakuva kyali kyamihe, iihegaga na vanyigendwa vaakwe vanyikyumi na vavili (12), viihelelaga ku luvala lwa Betaniya.
UYesu akugulekela ululeko umudzombe
12 Ikigono ikya kavili, uYesu na vanyigendwa vaakwe vaahumile ku Betaniya. Pe vali mu ngʼaasi, indzala yikumuvavaga. 13 Pe aali kutaali akuguwonaga umudzombe gúlembuwe amahamba goloofu, iihegelelaga alole apangi guli na madzombe. Pe aafikile, iiwonaga gusiveliike kiinu, pakuva sigwali musika gwa kuveleka. 14 UYesu iitigilaga, “Ukuvangila ineengʼuli na mbeepali kwahela umuunu ye alaaliya ifiveleko ukwako!”e Lwe aadzovile avanyigendwa vaakwe vaapuliike.
UYesu iivaladza itembeli
15 Pe vaafikile kangi ku Yelusalemu, uYesu iikwingilaga mu lipaala lya tembeli, iivangaga ukudaga avaanu avaagudzaga nu kugula ifiinu, iikunamulaga ifitagala fya vafundza-magoobeli, ni fideego fyawo avagudza-ngundya. 16 Asamulekile muunu ategule kikivedzaga ikyagudzwaga mu lipaala lya tembeli. 17 Neke awulanidzage atigilage, “Lúsimbiilwe mu Wusimbe uWiimike ukutigila, ‘Inyumba yangu yiitambulwaga nyumba ya ndapangilo ku vaanu va nyi dzonda.’f Neke kangi unyeenye múyihambwise ‘manga ya vagonadaasi.’g ”
18 Avateekedzi avakomi na vawulanidzi va milagililwe gya Mose vaapuliike dzonda idzo, viivangaga ukutemula ingʼaasi iya kumukomela. Vamoogopaga wiimila wa lilugu lyonda kye lyadzumaga imbulanidzo dze aawulanidzaga. 19 Pa kyamihe uYesu na vanyigendwa vaakwe viihumaga mu wudzenge.
Uluwulanidzo wiimila wa mudzombe úguumile
20 Pamilaawo avanyigendwa vaaviye viihelanidza, vakuguwonaga umudzombe ugo gúumile gonda ukuhuma ku midela. 21 Neke uPetulo iiwukage ulwa mudzombe ugo, atigilage, “Muwulanidzi, lolage, umudzombe gwe ukaalekiye ululeko, gúumile!”
22 UYesu akuvalongelaga iitigilaga, “Mumufuuwage uNguluvi. 23 Ndakyene ndikuvalongela ndiitigila, ngana umuunu ye avedzaga akukilongela ikidunda iki iitigila, ‘Wiipuke, ukiitoodze mu nyandza,’ atane ukwiganiya mu numbula yaakwe, kangi afuuwage lwe iilonga ukutigila lwihumila, apo luhadza lwilimika wiimila waakwe. 24 Pa ulo ndikuvalongela ndiitigila, fyonda fye mwinyilika pe mwilapangila, mufuuwage ukutigila mwánukiye, fiivedza fyenyo. 25 Pe mwikwima kulapangila, mumupyanilage ye avedzaga ye ávaanguwe, ukuta nayu Dadiinyo uva kukyanya avapyanile indzanangifu dzeenyo. [ 26 Neke kangi, ngana musiipyanila avayeenyo, nayu Dadiinyo uva kukyanya asilavapyanila na yuunye imbiifu dzeenyo.]”h
UYesu iiwuudzwa ulwa wutawulilwe we ali nawo
27 Vaaviye váfikile kangi ku Yelusalemu, uYesu iivangaga ukugenda mu lipaala lya tembeli. Avateekedzi avakomi, avawulanidzi va milagililwe na vavaha va Vayahudi vakumuhelelelaga. 28 Neke vamuwuudzage vatigilage, “Amalimo aga wiilimila mu wutawulilwe wuki? Ye ani ye ákupeeliye uwutawulilwe uwo?” 29 UYesu iihigaga iitigilaga, “Na yuune ndikuvawuudza luwuudzo lumwinga. Muundongele, apo na yuune ndikuvalongela ukutigila amalimo aga ndiilimila mu wutawulilwe wuki. 30 Uwutawulilwe wa Yohana uwa kudzabika avaanu waahumile kwa Nguluvi, enewuli waahumile ku vaanu? Muundongele!”
31 Viivangaga ukulongana veene viitigilaga, “Ngana tutigile, ‘Waahumile kwa Nguluvi,’ akutuwuudza ukutigila, ‘Kye kiki musamufuuviilwe?’ 32 Nde tutigile, ‘Waahumile ku vaanu,’ avaanu vasitufuuwa.” Voogwipe, pakuva avaanu vonda vamufuuviilwe uYohana ukutigila muvidzi va ndakyene. 33 Neke vapilusage vatigilage, “Sitwidzeela.” UYesu akuvalongelaga iitigilaga, “Apo na yuune sindikuvalongela amalimo aga ndiilimila mu wutawulilwe wuki.”