UYesu gwe musabibu gwa ndakyene
15
1 UYesu iiginaga ukuvawulanidza iitigilaga, “Uneene gwe musabibu gwa ndakyene, uDaada ye mulimi. 2 Ikipagwa kikivedzaga mugati umwangu ikisiiveleka ifiveleko, uDaada akukidumula nu kukihedza. Kangi ikipagwa kikivedzaga ikiiveleka ifiveleko, uDaada akukipagulila, ukuta kivelekage hiilo. 3 Unyeenye múpaguliilwe kwe kutigila muli veelu, pakuva múfuuviilwe imbulanidzo dzangu. 4 Musigalage mugati umwangu, apo na yuune ndiisigala mugati umwenyo. Ngita ikipagwa ve kiilemwa ukuveleka kyene ngana kisisigiye mu musabibu, ndeeni na yuunye mwilemwa ukuveleka ifiveleko ngana musisigiye mugati umwangu.5 “Uneene gwe musabibu, unyeenye muli fipagwa. Umuunu ye iisigala mugati umwangu, na yuune ndiisigala mugati umwakwe, uyo ahadza iiveleka ifiveleko fyoloofu, pakuva kingaya neene musiilima kikivedzaga. 6 Umuunu ye asikwikala mugati umwangu, uyo ahadza iihwanana ni kipagwa ikiitaagwa nu kuuma. Ifipagwa ngita ikipagwa ikyo, avaanu vakufihola nu kufitaaga mu mooto, ukuta fipiye. 7 Ngana mukwikala mugati umwangu na madzwi gangu gakwikala mugati umwenyo, apo mumunyilikage uDaada kikivedzaga kye mwisaka, ahadza akuvapeela. 8 Indolo dza Daada dziiwoneka pe mwiveleka ifiveleko fyoloofu, kangi mukwiwoneesa ukuvedza vanyigendwa vangu. 9 Ngita uDaada kye áandzendile uneene, na yuune ndíveendile unyeenye. Lino mwikalage mu wende wangu. 10 Ngana mukudziidika indagi dzangu, muhadza mwisigala mu wende wangu, ngita uneene kye ndídziidiike indagi dza Daada nu kusigala mu wende waakwe.
11 “Ndívalongiye dzonda idzo, ukuta ulukeelo lwangu luvedzage mugati umwenyo, nu lukeelo lwenyo luvedzage lukwilifu. 12 Ululagi lwangu lwe ulu, mwiyendage ngita uneene kye ndíveendile unyeenye. 13 Sikwali umunya wende wukomi ukulutila uwu, ukutigila iitawule ukufuwa wiimila wa vadzeela vaakwe. 14 Ngana mwilima dze ndikuvalagidza, apo unyeenye muli vadzeela vangu. 15 Sindikuvakemeela valimila-vangi, pakuva umulimila-vangi asiidzeela uwugulume wa mutwa vaakwe. Nda haamu, ndívakemeeliye vadzeela, pakuva dzonda dze ndaapuliike ukuhuma kwa Daada, ndívavilatuliye. 16 Mu ulo, unyeenye simwaanyaaguwe uneene, nda haamu, uneene ndavahaaguwe unyeenye, ukuta muvelekage ifiveleko ifisiisila nambi. Wiimila wa ulo, uDaada ahadza akuvapeela kikivedzaga kye mukumunyilika mu litaawa lyangu. 17 Suwe ululagi lwangu lwe ulu, mwiyendage.”
Avaanu va mwe naanyi vakuvasuula avanyigendwa
18 UYesu iiginaga ukuwulanidza avanyigendwa vaakwe iitigilaga, “Ngana avaanu va mwe naanyi vakuvasuula unyeenye, muludzeelage ukutigila, vaatalile tandi ukuusuula uneene. 19 Ngana mukali muvedzage vaanu va mwe naanyi, apo ngali váveendile ngita kye vakuveenda avayaawo. Neke kangi unyeenye musili vaanu va mwe naanyi umu, pakuva ndívahaaguwe ukuhuma mwe naanyi umu, lwe lwene avaanu va mwe naanyi umu, vakuvasuula. 20 Mwiwukage lwe ndavalongiye ukutigila, ‘Umulimila-vangi asili mukomi ukulutila umutwa vaakwe.’a Ngana vaamumwise uneene, apo na yuunye valavapumusa. Kangi ngana vadziidiike imbulanidzo dzangu, vahadza vakudziidika ni dzeenyo. 21 Neke kangi vahadza vakuvalimila unyeenye dzonda idzo wiimila wangu, pakuva vasimudzeeliye ye áanumile. 22 Ngana ndikali ndivedze sindaadzile ukwawo nu kulonga navo, apo ngali vangaya ndzanangifu. Neke kangi lino, viilemwa ukwikengela ukutigila, vangaya ndzanangifu. 23 Umuunu ye akuusuula uneene, apo akumusuula nayu Daada. 24 Ngana ndikali ndivedze sindilimile umwawo amalimo aga ge asinaa alimaga muunu, ngali vangaya ndzanangifu. Neke kangi lino, vádziweene dzonda dze ndaalimile, napo kangi vaave vakuusuula uneene pamwinga nu Daada. 25 Neke kangi idzo dzíhumiye, ukuta amadzwi agaasimbiilwe mu Wusimbe waawo Wiimike gakwile ukutigila, ‘Vaasuulile uneene lwahela.’b
26 “Ndihadza ndikumutuma ukwenyo uMukengedzi ukuhuma kwa Daada, uyo ye Mubepo uMwimike ye iivilatula indakyene. UMukengedzi uyo, ye iihuma kwa Daada pe iikwadza, ahadza iikoolela imola dzangu. 27 Na yuunye muhadza mwikoolela imola dzangu, pakuva mukali pamwinga naane ukuhuma pa wutalilo wa malimo gangu.