UYesu ye ngʼaasi ya kufikila kwa Daada
14
1 UYesu iiginaga ukuvawulanidza iitigilaga, “Mutane ukunyengʼemala mu numbula dzeenyo, mumufuuwage uNguluvi, kangi muufuuwage na yuune. 2 Mu nyumba ya Daada, muli wiikalo woloofu. Ngana lukali luvedze si ewo, apo ngali ndívalongiye. Lino ndiihelela mukuvagelanidzila uwiikalo. 3 Uneene pe ndíheliye nu kuvagelanidzila uwiikalo, ndilaadza kangi ukuvanyamula, ukuta na yuunye muvedze baaho pe ndigenda. 4 Unyeenye múyidzeeliye ingʼaasi ya kuhelela apoono pe ndiihelela.”5 UTomasi akumuwuudzaga uYesu iitigilaga, “Mutwave, uneefwe tusiidzeela kwe wiihelela. Neke lino, tuhadza tukuyidzeela wuli ingʼaasi?” 6 UYesu akumuhigaga iitigilaga, “Uneene ndili ngʼaasi, ndakyene, kangi wuumi. Sikwali umuunu ye iifika kwa Daada ngana asigendiye ukwangu. 7 Ngana mukali muundzeelage uneene, apo ngali mukali mukumudzeela nayu Daada. Ukuvangila lino, múmudzeeliye, kangi múmuweene.”
8 UFilipo akumulongelaga iitigilaga, “Mutwave, utuwoneese uDaada. Ngana utuwoneese, apo lwivedza lúkwiliye ukwesu.” 9 UYesu akumuhigaga iitigilaga, “Filipo, ongo ndikali naanye umusika gonda ugu, napo kangi usinaa uundzeela? Umuunu ye avedzaga ye áambwene uneene, ámuweene uDaada. Kye kiki lino wiitigila, ‘Utuwoneese uDaada’? 10 Ongo, usiifuuwa ukutigila, uneene ndili mugati mwa Daada, nayu Daada ali mugati umwangu? Amadzwi ge ndikuvalongela, si mu wutawulilwe wangu, nda haamu, uDaada ye akwikala mugati umwangu, ye mwene ye iilima amalimo gaakwe. 11 Mufuuwage lwe ndiilonga ukutigila, ndili mugati mwa Daada, nayu Daada ali mugati umwangu. Kangi ngana unyeenye simwifuuwa lwe ndiilonga, apo mufuuwage wiimila wa malimo ge ndiilima. 12 Ndakyene ndikuvalongela ndiitigila, umuunu ye avedzaga ye akuufuuwa, ahadza iilima amalimo gaagala ge ndiilima uneene. Kangi ahadza iilima amakomi ukulutila ago, pakuva uneene ndiihelela kwa Daada. 13 Kye kyonda kye mwinyilika mu litaawa lyangu, uneene ndihadza ndiilima ngita kye mwinyilika. Wugendela uwo, ndiiwoneesa indolo dza Daada kye dzigenda. 14 Ngana mwinyilika ikiinu kikivedzaga mu litaawa lyangu, ndihadza ndiilima.
UYesu iihuuvidza ukwadza kwa Mubepo uMwimike
15 “Ngana mukuundzenda, apo mukudzigendela indagi dzangu. 16 Na yuune ndihadza ndikumunyilika uDaada, ukutigila ahadza akuvapeela uMukengedzi uyungi ye ahadza akwikalaga naanye mbeepali. 17 Uyo ye Mubepo uMwimike ye iivilatula indakyene. Avaanu va mwe naanyi umu viilemwa ukumwidika nambe kumudzeela. Lino unyeenye múmudzeeliye, pakuva akwikalasa naanye, kangi ahadza iivedza mugati umwenyo.
18 “Sindihadza ndikuvaleka unyeenye vakiva, ndiikwadza kangi ukwenyo. 19 Kangi gúsigiye musika mudebe, avaanu va mwe naanyi umu vasilaambona kangi, neke kangi unyeenye muhadza mukuumbona. Pakuva uneene ndili muumi, na yuunye mwivedza vuumi. 20 Mu kigono kye ndihadza ndiidzulubuka, muhadza mwidzeela ukutigila, uneene ndili mugati mwa Daada, na yuunye muli mugati umwangu, na yuune ndili mugati umwenyo. 21 Umuunu ye avedzaga ye akudzaanukila indagi dzangu nu kudzigendela, uyo ye mwene ye akuundzenda. Nave ye akuundzenda, uDaada ahadza akumwenda. Na yuune ndihadza ndikumwenda nu kwivilatula ukwakwe.”
22 UYuda, si yula uIsikalyote, akumuwuudzaga uYesu iitigilaga, “Mutwave, kye kiki ukwivilatula ukwesu, si ku vaanu va mwe naanyi umu?” 23 UYesu akumuhigaga iitigilaga, “Umuunu ye avedzaga ye akuundzenda, uyo ahadza iikwidika amadzwi gangu. UDaada nave ahadza akumwenda, kangi uneene nu Daada twikwadza ukwakwe nu kwikalasa nave. 24 Neke kangi umuunu ye avedzaga ye asikuundzenda, uyo asiidika amadzwi gangu. Amadzwi ge mwipulika gasiihuma ukwangu, nda haamu, giihuma kwa Daada ye áanumile.
25 “Ndívalongiye dzonda idzo umusika pe ndipila pamwinga naanye. 26 Neke kangi uDaada ahadza akumutuma uMukengedzi ukwenyo mu litaawa lyangu, ye Mubepo uMwimike. Nave ahadza akuvawulanidza nu kuviiwusa dzonda dze ndívalongiye. 27 Ndikuvalekela ulutengamaso mu numbula. Ndikuvapeela ulutengamaso lwangu, ulusiihuma mwe naanyi umu. Mutanage ukunyengʼemala mu numbula dzeenyo, nambe koogopa. 28 Múpuliike dze ndikuvalongela ndiitigila, ‘Ndiihelela kwa Daada, ndilaadza kangi ukwenyo.’ Ngana ndakyene mukuundzenda, ngali mwikeela ukutigila, ndiihelela kwa Daada, pakuva uDaada mukomi ukulutila uneene.
29 “Ndívalongiye dzonda idzo pe dzisinaa dzihumila, ukuta umusika pe dzíhumiye, unyeenye muhadza mwifuuwa. 30 Sindihadza ndiilonga naanye mu musika mutaali hiilo, pakuva uSetano mutemi va mwe naanyi umu iikwadza, neke kangi angaya ludali ukwangu. 31 Dze ndiilima dze dzeene dze aandagiidze uDaada ukulima, ukuta avaanu vonda valufikage ukutigila ndikumwenda. Lino mwime, tuhege apa.”