UPetulo nu Yohana pawutalo pa kiwungu kya Vayahudi
4
1 UPetulo nu Yohana pe vaali vapila valonga na vaanu, umusika guugo viikwadzaga avateekedzi,a aVasadukayo,b pamwinga nu mukomi va vakolokolooni va tembeli. 2 Avo viikwadzaga vákalaaliye mbandu, pakuva uPetulo nu Yohana vavawulanidzaga avaanu nu kudalika ukutigila, ukudzulubuka kwa Yesu kwiwoneesa ukutigila ávafuwe valaadzulubuka. 3 Vakuviibataga uPetulo nu Yohana nu kuvadindila mu ndinde ukufikila ikigono ikya kavili, pakuva kyali kyamihe. 4 Neke kangi avoloofu mu avo avaapuliike ilidzwi, vaafuuviilwe. Imbalilo ya vamwadaada ngʼaani, yaafikiye avaanu ngita mbilima dzihaanu (5,000).5 Ikigono ikya kavili avateekedzi avakomi, avavaha na vawulanidzi va milagililwe,c viilundanaga pa Yelusalemu. 6 Aali mwali umuteekedzi umuvinad uAnasi, pamwinga nu Kayafwa, uYohana nu Alekisanda, na vanyalukolo avangi va muteekedzi umuvina. 7 UPetulo nu Yohana viileetwaga, viikwimidzwaga pawutalo apaawo, viivangaga ukuvapodza viitigilaga, “Mwilimila ulu mu ngufu yiki, enewuli mu litaawa lya ani?”
8 Neke uPetulo, we ámemiidzwe uMubepo uMwimike, avahigage atigilage, “Unyeenye valongodzi, na yuunye vavaha! 9 Ineengʼuli mukutuwuudza uneefwe wiimila wa malimo manofu ágalimiilwe kwa muunu uyu ye akali mukitagenda, na kye ánaniidzwe. 10 Lino unyeenye nyivonda, pamwinga na Vaisilaheli avangi vonda, muludzeelage wunofu ukutigila, umuunu uyu iikwima pawutalo apeenyo, we áponile mu ngufu idza litaawa lya Yesu Kilisiti umuhuma ku Nasaleti. Uyo ye mwene unyeenye mwamutoveleliye pa kipindulihidzo, neke uNguluvi amudzulubusage ukuhuma ku wulungu. 11 UYesu uyo, ye mwene ye wukumulonga uWusimbe uWiimike ukutigila,
‘Iliganga ilya pa wiidamiko lye mwakaanile unyeenye vanya kudzenga,
ilyo lino lívedzile liganga likomi ilya pa wiidamikoe wa nyumba yonda.’f
12 “Sikwali uyungi ye avedzaga ye akutupoka, yu Yesu mwene. Sikoolili ilitaawa ilingi lilivedzaga lye túpeeliilwe mwe naanyi, ilinya ludali ulwa kutupoka.”
13 Avanya kiwungu avo, pe vaaweene ukutigila, uPetulo nu Yohana vakuvahiga mu wukangafu, kuno viidzeela ukutigila, vali vaanu hela vasinaa viimba hiilo isuule, viidzumaga mbandu. Viidzeelaga ukutigila, avaanu ava vakali pamwinga nu Yesu. 14 Neke kangi valemwage ukulonga kikivedzaga, pakuva vamuweene umuunu uyo ye áponile, íimile apo pamwinga nu Petulo nu Yohana. 15 Neke vavahumyage uPetulo nu Yohana kwivala ya kiwungu, aveene vasigalage viilongana 16 vatigilage, “Tuvalimile kiki avaanu ava? Lolage, avaanu vonda avakwikala apa pa Yelusalemu, váludzeeliye ukutigila, váhuufiidze kimanyilo kikomi, na yuufwe twilemwa ukukaana. 17 Lino túvafingiidze avaanu ava ukutigila, vatanage ukulonga nambe kwa muunu mu litaawa ilyo, ukuta imola iyi yitane ukutagalila.”
18 Avanya kiwungu avo, vakuvakemeelaga kangi uPetulo nu Yohana, vakuvakaanidzaga viitigilaga, “Mutanage ukulonga luluvedzaga, nambe kuwulanidza mu litaawa lya Yesu!” 19 Neke kangi uPetulo nu Yohana vahigage vatigilage, “Mulamule yuunye, ngana lwivagila pa miiho ga Nguluvi ukuvapulikidza unyeenye, enewuli ukumupulikidza uNguluvi. 20 Pakuva dzonda idzo dze túdziweene nu kudzipulika, twilemwa ukuleka kulonga.”
21 Neke vaginage ukuvafingidza mbandu uPetulo nu Yohana. Neke kangi vatanage ukuliwona ilidzwi ilya kuvahigila, pakuva avaanu vonda vamupeelaga indolo uNguluvi, wiimila wa kilole ikyahuufiidzwe. Suwe vakuvatawulaga vahelelage. 22 Umuunu uyo ye aananiidzwe mu kimanyilo, aali ni myaka ukulutila makyumi gatayi (40).
Avafuuwa viilapangila kwa Nguluvi avakangadze
23 UPetulo nu Yohana pe vaaviye vádinduliilwe, viipilukaga ku vayaawo. Vakuvalongelaga amadzwi gonda ago ge válongeliilwe na vateekedzi avakomi, pamwinga na vavaha va Vayahudi. 24 Avayaawo avo pe vaapuliike ulwa madzwi ago, vonda viivedzaga mutima gumwinga, viilapangilaga kwa Nguluvi viitigilaga, “Mutwave, ve Mukomi va fyonda, waagavile ikyanya, inyi ni nyandza, pamwinga ni fyonda ifigenda mugati umwakwe. 25 Yuuve waalongile wugendela wa kuhwesu uDawudi umulimila-vangi vaako, ngita kye aalongwidzwe nu Mubepo uMwimike ukutigila,
‘Kye kiki avaanu va nyi dzingi viigufiingʼana,
kangi ifipelela fya vaanu fiihoodza agasitanga kiinu?
26 Avatwa va nyi víigelaniidze,
kangi avatemi válundiine pamwinga,
ukuta vatovane nu Mutwa Nguluvi nu Mesiya vaakwe.’g
27 “Ndakyene umutwa Helodeh nu mutemi uPondyo Pilatoi vaalundiine mu wudzenge wa Yelusalemu, pamwinga na Vaisilaheli na vaanu avasili Vayahudi, ukuta vatovane nu Yesu umulimila-vangi vaako umwimike, ye wamuhaaguwe avedzage ye Mesiya. 28 Idzo dze vaalimile, dze dzeene dze waagulumiye ukuvangila kataali ukutigila, dzilimike mu ngufu dzaako na mu mikeelelele gyako. 29 Lino Mutwa Nguluvi, lolage ifingilidzo dzaawo! Ututange twe valimila-vangi vaako, ukuta tudalikage ilidzwi lyako kitamoogopa ye avedzaga. 30 Uveeve uwoneesage ingufu dzaako idza kuvananiya avaanu, ututangage ukuta tuhuufyage ifimanyilo fya filole ni fidzumo, kugendela mu litaawa lya Yesu, umulimila-vangi vaako umwimike.”
31 Vaaviye válapangiye, apoono apo pe vaalundiine piihuguswaga. Vonda viimemaga uMubepo uMwimike, viivangaga ukudalika ilidzwi lya Nguluvi mu wukangafu.
Avafuuwa viihangana ifiinu fyawo fyonda
32 Avafuuwa vonda vaavedzaga mutima gumwinga na mahoodzo gamwinga. Sikwali umuunu ye aatigilaga ifiinu fye ali nafyo fyakwe mwene, nda haamu, ifiinu fyawo fyonda vaahanganaga. 33 Avatume vaaginaga ukoolela mu ngufu dzonda ulwa ludzulubuko lwa Mutwa Yesu ukuhuma ku wulungu. UNguluvi avafuunyililaga mbandu vonda. 34 Sikwali umuunu ye aagayaga kiinu mu luhangano lwawo, pakuva avaali ni migunda enewuli inyumba, vaagudzaga nu kuleeta amagoobeli ge váanukiye. 35 Amagoobeli ago, vaaleetaga ku vatume, navo vavagavilaga nayula ukugelela mu ndzala yaakwe.