3 Neke uPetulo atigilage, “Ananiya! USetano íingiye mu numbula yaako, ukuta umudzange uMubepo uMwimike nu kufiha amagoobeli agangi ge wáanukiye ku mugunda gwako? 4 Umugunda ugo gukali gwako pe ukali usinaa ugudza. Pe ukaaviye úgudziidze, amagoobeli ge ukaanukiye, gakali mu milamulile gyako. Lino kye kiki úlamuwe mu numbula yaako ukulima amadzwi ngita aga? Usivadzangile avaanu, nda haamu, úmudzangile uNguluvi!”

5 UAnaniya pe aapuliike ulo, baaho na baaho iifuwaga nu kuguwa paanyi. Vonda avaapuliike imola iyo, viikwibatwaga ni kitulo kikomi. 6 Neke avavinano vaadzage, vagugondzage umufimba gwakwe mu sanda, vahelelage kusiila.

7 Fyaviye fídzumbile nde fivalilo fidatu wuli, umudala vaakwe iikwingilaga apo kitadzeela ídzihumiye. 8 UPetulo akumuwuudzaga iitigilaga, “Uundongele, ongo, amagoobeli ge múgudziidze umugunda gwenyo ge gaaga?” Akumuhigaga iitigilaga, “Eena, ge gaago.” 9 Neke uPetulo amulongelage atigilage, “Kye kiki mwídiingʼiine nu mugoosi vaako ukumugemya uMubepo va Mutwa Nguluvi? Lolage! Avaanu ávamusiilile umugoosi vaako, vali piivala pa mulyango, na yuuve vahadza vakukusindika kwivala vakusiile.”

10 Baaho na baaho, uSafila nave iifuwaga, iiguwaga pa magulu ga Petulo. Avavinano avo viikwingilaga, viiwonaga uSafila nave áfuwe, vakugunyamulaga umufimba gwakwe, viisiilaga pa lubali pa mombwe ya mugoosi vaakwe. 11 Ikitulo kikomi kiikwibataga ulukombeso londa, pamwinga na vangi vonda avaapuliike idzo.

12 Avatume vaahuufyaga ifimanyilo fya filole ni fidzumo fyoloofu ku vaanu, mu ngufu dza Nguluvi. Avafuuwa vonda vaalundanaga nu mutima gumwinga mu lipaala lya tembeli ilyatambulwaga umugendagenda gwa Selemani. 13 Avaanu avasamufuuviilwe uYesu, vavaginiyaga avafuuwa, neke kangi sikwali umuunu ye avedzaga, ye aagelile ukwihandza navo. 14 Napo kangi, avamwadaada na vamwayuuva voloofu avamufuuwaga uMutwa Yesu, vaaginaga ukoongelela hiilo.

15 Wiimila wa filole ifyo, avaanu vavanyamulaga avatamwa mu maasa na mu mateefu, vavaviikaga mu ngʼaasi ukuta uPetulo, pe iihelanidza, umwigisila gwakwe guvafikilage vamwinga, vananage. 16 Avaanu voloofu vaalundanaga pa Yelusalemu ukuhuma ku ndzenge idzili biihi. Vavaleetaga avatamwa na áviibiitwe ni mibepo imiviifu, vonda vaananidzwaga.

17 Neke umuteekedzi umuvina, pamwinga na vayagwe vonda va mu kipuga kya Vasadukayo, viibatwage mbandu ni giila wiimila wa vatume. 18 Vakuviibataga avatume nu kuvadindila mu ndinde. 19 Neke kangi umunyamwandza^a va Mutwa Nguluvi aadzage pakilo, adindulage indzidzi dza ndinde, avahumyage kwivala, neke avalongelage atigilage, 20 “Muhelelage, mukiime mu lipaala lya tembeli, mukavadalikilage avaanu amadzwi gonda ga wuumi uwa mbeepali.” 21 Avatume avo viihelelaga lwamilaawo hiilo mu lipaala lya tembeli, ngita umunyamwandza kye avalongiye, viivangaga ukuvawulanidza avaanu umo.

Umusika guugo, umuteekedzi umuvina pamwinga na vayagwe, viilundasaga ikiwungu kya Vayahudi, kwe kutigila valongodzi vonda va Vaisilaheli. Viitumaga avasilikaale ku ndinde, ukuta vavaleete avatume avo. 22 Neke kangi pe viingiye umo, viiwonaga avatume avo simoovali. Viipilukaga ku kiwungu, vakuvalongelaga viitigilaga, 23 “Pe túfikile ku ndinde kula, túweene indzidzi dzídindiilwe wunofu, avakolokolooni víimile pa mulyango viiloleela. Neke kangi pe tuvedziige twidindula indzidzi, tusimuweene umuunu ye avedzaga mugati!” 24 Umukomi va vakolokolooni va tembeli pamwinga na vateekedzi avakomi, pe vaapuliike ulo, viikagahalaga mbandu viitigilaga, “Amadzwi aga gahadza giivedza wuli?”

25 Iifikaga umuunu yumwinga akuvalongelaga iitigilaga, “Mulolage! Avaanu vala ve mukavadindiye mu ndinde, vali mu lipaala lya tembeli, viiwulanidza avaanu.” 26 Neke umukomi va vakolokolooni va tembeli, pamwinga na vakolokolooni vaakwe, vahelelage kuvaleeta avatume avo. Avakolokolooni avo pe vavaleetaga avatume, sivavagagiilidzaga nambi, pakuva voogopaga ukutigila, avaanu vahadza vakuvatova na maganga.

27 Vaaviye vávaleetile, vakuviimyaga pawutalo pa kiwungu. Umuteekedzi umuvina iivangaga ukuvanasa iitigilaga, 28 “Unyeenye tukavakaaniidze ukutigila, mutanage ukuwulanidza avaanu mu litaawa lya muunu uyo! Neke kangi mútagaliidze imbulanidzo dzeenyo mu wudzenge wonda uwu wa Yelusalemu. Múgulwime ukutugomehedza uneefwe wiimila wa fuwa ya muunu uyu!”

29 UPetulo na vatume vayagwe, vakumuhigaga viitigilaga, “Twivagila ukumwidika uNguluvi ukulutila avaanu! 30 UNguluvi va vakuhwesu, amudzulubwise ukuhuma ku wulungu uYesu ye mwamukomile pa kumutovelelela pa kipindulihidzo. 31 Ye Nguluvi ye amuginaliidze uyo pa kumuviika ulubali lwakwe ulwa kundiyo, ukuta avedzage Mutemi nu Mupoki va kuvatanga aVaisilaheli vonda, ukuta vapele indzanangifu dzaawo nu kupyanidzwa. 32 Uneefwe tuli voolesi va dzonda idzo, kangi uMubepo uMwimike, uNguluvi ye ávapeeliye avaanu avakumwidika, nave iikoolela idzo.”

33 Avanya kiwungu pe vaapuliike ulo, viimemaga mbandu ililaakali, viisakaga ukuvakoma. 34 Neke kangi mu kiwungu ikyo, paali nu Mufwalisayo yumwinga ye aatambulwaga Gamalyeli. Uyo aali muwulanidzi va milagililwe, kangi aatambuliike na vaanu vonda. Umuunu uyo, iikwimaga pawutalo pa kiwungu, iilagidzaga ukutigila vavahumye kwivala avatume avo lusika ludoodo. 35 Neke avalongelage avayagwe atigilage, “Nye Vaisilahelaanye! Mwilembe nalo, ulu lwe mwisaka ukuvalimila avaanu ava. 36 Mwiwukage umusika mudebe úguhelaniidze, kwali umuunu yumwinga ye aatambulwaga Tewuda, kangi iiginikaga ukutigila, umwene muunu mukomi. Avaanu ngita magana gatayi (400) vamuniniilaga umwene. Aakomiilwe, neke avaanu vonda avamuniniilaga vapalaangʼanage, na malimo gaakwe gonda gasililage baaho. 37 Pambele, umusika isilikaale pe yaavalilaga imbalilo ya vaanu, kwali uMugalilaya yumwinga, ilitaawa lyakwe aatambulwaga Yuda. Uyo avadzangile avaanu vamuniniilage nu kuvalongodza mu wugalusi. Nave aakomiilwe, avaanu vonda avamuniniilaga, viipalaangʼanaga. 38 Lino ndikuvalongela ndiitigila, mutane ukulima kiinu na vaanu ava. Muvaleke, vahelelage ukwawo! Ngana amahoodzo gaawo na malimo gaawo, fiihuma ku vaanu, fihadza fiiyaga fyene. 39 Neke kangi, ngana fiihuma kwa Nguluvi, mwilemwa kuvakaanidza, apo mwivedza mukwibeedza nu Nguluvi.”

40 Avayagwe viikwidikilaga ulo lwe álongile uGamalyeli, vakuvakemeelaga avatume viingile mugati, vakuvatovaga. Vakuvakaanidzaga ukutigila, vatanage ukulonga luluvedzaga mu litaawa lya Yesu, neke vavalekage, viihelelelage.

41 Avatume avo viihegaga pa kiwungu vali nu lukeelo, pakuva uNguluvi aaweene viivagila ukubenapulwa wiimila wa litaawa lya Yesu. 42 Ifigono fyonda, vasaalekaga ukuwulanidza nu kudalika iMola iNofu mu lipaala lya tembeli na mu nyumba dza vaanu, ukutigila uYesu ye Mesiya.