UPawulo pawutalo pa mutemi uFesito
25
1 Neke uFesito afikage ku Kayisalya, avangage uwutemi wa mugoola gwa Yudeya. Pe fyaviye fíhelaniidze figono fidatu, iihegaga apo kuhelela ku Yelusalemu. 2 Uko avateekedzi avakomi na valongodzi va Vayahudi vakumuhelelelaga, vakumulongelaga dzonda dze vámutaahile uPawulo. 3 Vakumugongoolaga uFesito avatange, ukuta uPawulo apiluswe ku Yelusalemu, pakuva viidiingʼiine ukumwalukila uPawulo mu ngʼaasi, ukuta vamukome. 4 UFesito akuvahigaga iitigilaga, “UPawulo ahadza iisigala mu wuloleedzi ku Kayisalya, uneene sindihaava ukupiluka uko. 5 Lino muhaagule vamwinga va valongodzi veenyo, ukuta tuheleengʼase. Ngana kuli wuhosi wuwuvedzaga we álimile, vakamutaahe uko.”6 UFesito akwikalaga figono munaana (8) enewuli likyumi limwinga (10) wuli ku Yelusalemu, neke apilukage kangi ku Kayisalya. Ikigono ikyageliike, akwikalaga pa kideego kyakwe ikya kuhigila inongwa, iilagidzaga ukutigila vamuleete uPawulo. 7 UPawulo pe aafikile apo, aVayahudi ukuhuma ku Yelusalemu vakumupilimaga, viihumyaga uwutaahe woloofu uwunywilifu we viilemwa ukugomedza.
8 UPawulo akwikengelaga iitigilaga, “Sindaanguwe kiinu kikivedzaga mu milagililwe gya Vayahudi, mu tembeli, nambe kwa Kayisali.”
9 Neke kangi pakuva uFesito aasakaga ukwikundiilidza ku Vayahudi, akumuwuudzaga uPawulo iitigilaga, “Ongo, wiikwidika ukuhelela ku Yelusalemu, ukuta ukahigwe uko pa miiho gangu mu idzo dze vakukutaaha?”
10 Neke uPawulo amuhigage atigilage, “Ndíimile pawutalo pa luhigilo lwa Kayisali, apa pe peene pe ndiivagila ukuhigwa. Sikooluli luluvedzaga lwe ndáanguwe ku Vayahudi, ngita na yuuve kye wiidzeela wunofu. 11 Ngana ndáanguwe luluvedzaga ulwivagila ndikomwe, sindiikaana ukufuwa. Neke kangi, ngana ava vakuunaaha idza wudesi hela, apo sikwali umunya wutawulilwe wa kuunawula ukwawo. Uneene ndiinyilika inongwa iyi yikahigwe nu Kayisali!”a
12 Neke uFesito alonganage na vatangilidzi vaakwe, amuhigage uPawulo atigilage, “Únyiliike ukutigila, inongwa yaako yikahigwe nu Kayisali, apo uhadza wiihelela ukahigwe nu Kayisali!”
UFesito iilongana nu mutwa Agilipa
13 Fyaviye fíhelaniidze ifigono fikeefu, umutwa Agilipab pamwinga nu muhaadzave uBelinike vaafikile ku Kayisalya, ukuta vamuhungile uFesito. 14 Vaaviye víikalile apo figono fyoloofu, uFesito akumulongelaga umutwa Agilipa inongwa ya Pawulo iitigilaga, “Apa pwali umuunu, ye aalekiilwe mu ndinde nu Feliki. 15 Umusika pe ndaali ku Yelusalemu, avateekedzi avakomi na vavaha va Vayahudi, vaandongiye inongwa ye vamutaahile umuunu uyo, nu kuunyilika ndimuhige.
16 “Neke kangi uneene ndivalongelage ukutigila, igyo si migendzehedze gyesu uneefwe Valoma ukumuhiga umuunu ye asinaa ataangʼana na vanya kumutaaha, ukuta nave iikengele mu dze vakumutaaha. 17 Pe vaafikile apa, sindaahaavile. Ikigono ikya kavili ndikwikalaga pa kideego kya kuhigila inongwa, nu kuvalagidza avakolakyanda vamuleete umuunu uyo. 18 Avaanu avakumutaaha viikwimaga nu koolela, neke kangi uwoolesi waawo wulemwage ukuwoneesa uwangudzi wuwuvedzaga wa muunu uyo ngita kye ndaahuuvilaga. 19 Nda haamu, vakwibeedzaga nave ulwa madzwi ga lufuuwo lwawo vaveene, na ga muunu yumwinga ye aafuwe, ilitaawa lyakwe ye Yesu. Uyo ye mwene uPawulo aakangadzaga ukutigila muumi. 20 Sindayiweene ingʼaasi iya kukomandza uwutaahe waawo, neke ndimuwuudzage ngana iikeela ukuhelela ku Yelusalemu, ukuta inongwa iyi yikahigwe uko. 21 Neke kangi uPawulo anyilikage asigale mu ndinde, ni nongwa yaakwe yihaamidzwe yikahigwe nu Kayisali. Neke ndilagidzage asigale mu ndinde ukufikila pe ndikumusindika kwa Kayisali.”
22 Neke uAgilipa amulongelage uFesito atigilage, “Ndiisaka ndimupulikidze yuune umuunu uyo.” UFesito akumuhigaga iitigilaga, “Uhadza ukumupulikidza kilaawo.”
UPawulo pawutalo pa mutwa uAgilipa
23 Ikigono ikyafudiike, uAgilipa pamwinga nu Belinike viifikaga mu lutogo lukomi. Viikwingilaga mu lipaala lya lulundano, víilongwidze na vavina va vakolakyanda, na vakomi va wudzenge. Neke uFesito alagidzage ukutigila, uPawulo aleetwe pa lipaala apo. 24 Neke uFesito alongage atigilage, “Mutwave Agilipa, na yuunye nyivonda ye múlundiine apa pamwinga naafwe, mukumuwona umuunu uyu ye ali pawutalo. Ikiwungu kyonda kya Vayahudi apa na ku Yelusalemu uko kíkuutile ukwangu, kiikoova ukutigila asivagiye ukuvedza muumi. 25 Uneene sindikaaweene ukutigila, álimile kiinu kikivedzaga kye iivagila ukufuwa. Neke kangi pe akaanyiliike inongwa yaakwe yikahigwe nu Kayisali, ndiilamulaga ukutigila asindikwe uko. 26 Lino uneene ndingaya lidzwi ilya kumusimbila uKayisali wiimila waakwe. Lwe lwene ndímuleetile pa miiho geenyo, hiilo ukwako mutwa Agilipa, ukuta uneefwe pe twivedza túmalile ukumuwuudza, apo uneene ndiivedza ni lidzwi ilya kusimba. 27 Pakuva ndiiwona ukutigila, silwihwana ukumusindika umudindilwa kitamulongela uKayisali inongwa ye iitaahwa.”