UPawulo akwikengela pawutalo pa Agilipa
26
1 UAgilipa akumulongelaga uPawulo iitigilaga, “Ndikukutawula wiilongele yuuve amadzwi gaako.” Neke uPawulo iinusage iliwoko, avangage ukwikengela atigilage, 2 “Mutwave Agilipa, ndikwipulika ukutigila, ndili kitendileme pa kwima ineengʼuli pa miiho gaako, ukwikengela mu dzonda dze vakuunaaha aVayahudi. 3 Ndiilonga ewo, hiilo uveeve, pakuva úgidzeeliye wunofu imigendzehedze gyonda gya Vayahudi na madzwi gala ge vasiikwidiingʼana. Ndikukunyilika uumulikidze mu lwigugumidzo.4 “AVayahudi vonda viidzeela imikulile gyangu ukuhuma pa waana wangu, ukuvangila uwutalilo wa miikalile gyangu mu vayangu, hiilo ku Yelusalemu. 5 Uneene váandzeeliye ukuhuma kataali. Kangi, ngana vakeele, vasiilemwa ukoolela ukutigila, ndaali yumwinga va kiwungu kya Vafwalisayo. Avo viinatilaga hiilo indagi dza Nguluvi ukulutila ifipuga fyonda. 6 Lino ndíimile apa ndihigwe, pakuva ndikuluhuuvila uluhuuvidzo lwe aahuuviidze uNguluvi ku vakuhwesu. 7 Uluhuuvidzo ulo, lwe lwene lwe viipifukila avaanu va fipelela fyesu finyikyumi ni fivili (12) ukwifuunya kwa Nguluvi ikilo nu muunyi, pakuva viihuuvila uNguluvi alaakwilidza ngita kye aahuuviidze. Mutwave, aVayahudi vakuunaaha ineengʼuli wiimila wa luhuuvilo ulo! 8 Kye kiki unyeenye mwiwona lutalamu ukufuuwa ukutigila, uNguluvi aaidzulubusa ávafuwe?
9 “Pa wutalilo, na yuune ndaafuuviilwe ukutigila, lúumbagiye ukulima ndzoloofu idza kuluwa ni litaawa lya Yesu umuhuma ku Nasaleti. 10 Idzo dze dzeene dze ndaalimile ku Yelusalemu. Uko ndavadindilaga mu ndinde avafuuwa voloofu mu wutawulilwe wa vateekedzi avakomi. Avangi pe vaahigiilwe ukutigila vakomwe, na yuune ndiidikiye ukutigila luvedze ewo. 11 Ndaahelelaga nyakoloofu kuvapumusa mu nyolanilo dzonda, ukuta ndivagagiilidze vamulonge fivi uYesu. Iligooga lyangu lyali likomi mbandu ukwawo, lwe lwene ndaahelelaga kuvapumusa ku ndzenge idza kutaali.
UPawulo iilonga ulwa kupituka kwakwe
12 “Wiimila wa ulo, pe ndili nu wutawulilwe nu wulagidze ukuhuma ku vateekedzi avakomi, ndaagendile ukuhelela ku wudzenge wa Damesiki. 13 Mutwave, pe ndili mu ngʼaasi, ikivalilo kya mutanda (6.00) pa muunyi, ndiiwonaga ulumuli lukomi ukulutila ulwa lidzuwa ukuhuma kukyanya. Ulumuli ulo lukutumulikaga imbali dzonda, uneene na vayangu avaali pamwinga naane. 14 Twivonda twaguwe paanyi. Ndiipulikaga isawuti yikuundongela mu ndongele yeesu iya Kiebulaniya yiitigila, ‘Sawuli! Sawuli! Kye kiki ukuumumusa? Ukwilemadza hela ngita imbunda iyiipaana umulunda gwa mutwa vaakwe.’
15 “Uneene ndiiwuudzaga ndiitigila, ‘Mutwave, yuuve ani?’ UMutwa akuunyigaga iitigilaga, ‘Uneene yuune Yesu, ye ukuumumusa. 16 Lino wiime! Ndíkuwonekiye, ukuta ndikuhambuse uvedzage mulimila-vangi vangu, kangi moolesi vangu. Woolelelage dzonda dze údziweene ineengʼuli, ni dzonda dze ndihadza ndikukuwoneesa pambele. 17 Uneene ndihadza ndikukupoka ukuhuma mu mawoko ga vayago aVayahudi na avasili Vayahudi. Uneene ndikukutuma ukwawo 18 ukuta uvadindulage amiiho gaawo, vapituke ukuhuma mu kiisi nu wutawulilwe wa Setano, nu kwingila mu lumuli lwa Nguluvi. Wugendela wa kuufuuwa uneene, vahadza viiwodzwaga indzanangifu dzaawo nu kuvedzasa na viimike avangi vonda.’
19 “Mutwave Agilipa, lwe lwene ndafiidikiye ifiwoneko fye ndafiweene ukuhuma kukyanya. 20 Neke ndivangage ukuvadalikila avaanu va ku Damesiki, pambele avaanu va ku Yelusalemu na va nyi yonda iya Yudeya, na ku avasili Vayahudi. Ndavadalikilaga ukutigila vapelage indzanangifu dzaawo, vamupitukilage uNguluvi nu kulima idzo idziiwoneesa ukutigila vápitwike mu numbula dzaawo. 21 Idzo dze dzeene idzaahulile aVayahudi vaandzibate mu lipaala lya tembeli, viisakaga ukuungʼoma. 22 Neke kangi uNguluvi aanangile ukufikila ikigono ikya neengʼuli, lwe lwene ndíimile mu koolela pawutalo pa vavina na vadebe. Sindiilonga amadzwi gangi, ve gala swe ge aalongile uMose na vavidzi ukutigila, galaahumila. 23 Pakuva uMesiya alaapumuka, kangi alaavedza va kutala kudzulubuka ukuhuma ku wulungu, ukuta avalongele imola dza lumuli lwa wupoki aVayahudi na avasili Vayahudi.”
24 Umusika uPawulo pe iikengelaga, uFesito iikwinusaga isawuti iitigilaga, “Uveeve Pawulo! Uli munya lukwale! Uwimbi waako úwulutiye wúkugulwise!”
25 Neke kangi uPawulo amuhigage atigilage, “Ve mutambule Fesito, uneene ndingaya lukwale. Amadzwi aga ge ndiilonga ga ndakyene, kangi ndili nu luhala londa. 26 Umutwa nave ágadzeeliye wunofu amadzwi aga, kye kileka ndilongage kitoogopa pa miiho gaakwe. Kangi ndiidzeela ndakyene ukutigila, sikooluli luluvedzaga lwe asiludzeeliye, pakuva gonda gasaalimikaga ku kinyele. 27 Mutwave Agilipa, ongo, ukugafuuwa ago ge vaalongile avavidzi? Uneene ndiidzeela ukutigila ukugafuuwa.”
28 UAgilipa akumulongelaga uPawulo iitigilaga, “Ongo, wiihambula ukutigila uhadza ukuungʼoofya mu musika mudebe ngita ugu ndivedze Mukilisiti?” 29 UPawulo akumuhigaga iitigilaga, “Nde luvedze mu musika mudebe enewuli mutaali, ndikumunyilika uNguluvi ukuta uveeve, pamwinga na vaanu vonda avakuumulikidza ineengʼuli, muvedze ngita uneene kye ndigenda, neke kangi kitawopwa ni minyololo igi.”
30 Neke umutwa Agilipa pamwinga nu Belinike, umutemi uFesito, na vangi aviikaliise navo, viimage. 31 Vaaviye váhegile apo, viilonganaga viitigilaga, “Umuunu uyu asilimile kiinu kikivedzaga íkivagiye ukufuwa, nambe kudindilwa.” 32 UAgilipa akumulongelaga uFesito iitigilaga, “Umuunu uyu ngali áawuliilwe, ngana akali atane ukunyilika inongwa yaakwe yikahigwe kwa Kayisali.”