UPawulo iisindikwa ku Loma
27
1 Suwe uFesito iilamulaga ukutigila, tuhege mu meli kuhelela ku nyi ya Italya, uPawulo na vadindilwa avangi viigotolwaga kwa mukomi yumwinga va vakolakyanda, ilitaawa lyakwe aatambulwaga Yulyo, va kipuga kya vakolakyanda va Kayisali Agusiti. 2 Neke tuhovage imeli iyaahumile ku Adulamatyo iyaahelelaga kugendela indzabukilo dza mwani ya Asya. Pe twahegile apo, twali pamwinga nu Alisitaliko umuhuma ku wudzenge wa Tesalonike, mu nyi ya Makedoniya.3 Kwaviye kúkiye, twifikaga ku wudzabukilo wa wudzenge wa Sidoni. Apo uYulyo akumulimilaga wunofu uPawulo, akumutawulaga ukutigila, ahelelage akavawone avadzeela vaakwe, ukuta vamutange ifya kuponela. 4 Pe twahegile, ilivelo likomi liitanidzaga ukuhelela kuwutalo. Neke imeli yigendelage kuweehe kunena ya ligunguli lya Kipulo, ulubali ulusaali ni livelo likomi. 5 Twidzabukaga inyandza ukugendela ulubali ulwa nyi ya Kilikya ni Pamufilya, twifikaga ku wudzenge wa Mila ku nyi ya Likya. 6 Uko, umukomi va vakolakyanda uyo, akuyiwonaga imeli íyihumile ku wudzenge wa Alekisandilya,a iyiihelela ku nyi ya Italya, twihovaga twivonda mu meli iyo.
7 Twimalaga figono fyoloofu tupigenda molimoli nu lutalamu, twifikaga biihi nu wudzenge wa Nido. Ilivelo lyapila likututanidza tutane ukugoloka ni ngʼaasi ye twasakaga ukuhelela, neke tugendelage ulubali lwa kumavemba ulwa ligunguli lya Kilete, biihi ni nyi ngʼafu iyiitambulwa Salumoni. 8 Twigendaga mu mwani ya nyandza ni nalamu, neke tukafikage apoono apiitambulwa Wudzabukilo Wunofu, biihi nu wudzenge wa Lasaya.
9 Umusika mutaali gwahelaniidze mu lugendo lwesu, naki kyaka ikya kwiviikila ngʼaanib kyahelaniidze. Lino lwali lutalamu ukwendelela nu lugendo mu nyandza,c lwe lwene uPawulo akuvapavilaga avaanu vonda iitigilaga, 10 “Vamwadaadaanye, ngana twendelele nu lugendo lwesu, ndiiwona wiivedza waanangifu nu wambudzi wukomi. Imeli iyi pamwinga ni fitegulo fyonda fihadza fiikwanangika, kangi na yuufwe twisunga tufuwe.”
11 Neke kangi umukomi va vakolakyanda uyo, iidikilage amahoodzo ga mugendzi-meli nu munya meli nu kugaleka ga Pawulo. 12 Uwudzabukilo uwo, siwaali wunofu ukwikala pa musika gwa ngʼaala ngʼali mu nyandza, lwe lwene avanya lugendo vonda mu meli viidiingʼiine ukutigila, vahege apo. Avo vaahuuvilaga ukufika ku wudzabukilo uwungi uwa Kilete uwaatambulwaga Foyinike, kwe kwene ngali viikalile umusika ugwa ngʼaala ngʼali ugo. Uwudzabukilo uwo, waadonyile kumavemba kusika na kuweehe kusika apiisiikile ni livelo.
Ilivelo mu nyandza
13 Pambele umuvelo ugwihuma ulubali lwa kumavemba, gwivangaga ukupuga molimoli. Avalima-malimo va meli iyo, viihoodzaga ukutigila, ugo gukuvatanga ukwendelela nu lugendo ngita kye vaasakaga. Neke viinusage inanga iya kwimidza imeli, vahegage nu lugendo, vahelanidzage mu ngʼumbungʼumbu ya mwani ya ligunguli lya Kilete. 14 Umusika mukeefu hela, liikwadzaga ilivelo likomi hiilo, iliitambulwa Livelo lya Kuweehe Kunena,d liipugaga ukuhuma ku ligunguli lya Kilete. 15 Ilivelo ilyo liitovaga imeli ukufikila pe yiilemwa ukuhelela kuwutalo, neke tuyilekage yisuungʼwage kwe liipugila ilivelo.
16 Twigendelaga ulubali lwa kumavemba lwa ligunguli iliitambulwa Kawuda, lye lyatusiikile padebe ni livelo likomi ilyo. Neke, mu lutalamu, twinusage nu kuwopa uwaato wa kuponela avaanu uwaali mu lulenga. 17 Uwaato uwo pe waaviye wíinwiswe pakyanya pa meli, viiwopaga imeli ni mipingo ukuhuma paanyi, ukuta yitane ukudeenyeka. Voogopaga ukusindikwa mu kihopela mu muhanga ugwa mwani ya Siliti. Viitumbukulaga umwenda pa lilongoti, vakuyilekaga imeli yisuungʼwage ni livelo ilyo. 18 Pakuva ilivelo likomi lyatovaga hiilo imeli, ikigono ikya kavili avalima-malimo mu meli viivangaga ukutoodza ifitegulo mugati mu nyandza. 19 Ikigono ikya kadatu, vaveene viitoodzaga ifikoongʼolo fya meli mu nyandza. 20 Ilidzuwa ni nondwe fisaawoniike mu figono fyoloofu, kangi ilivelo lyaginaga ukutova imeli ukufikila pe twiyadza uluhuuvilo londa ulwa kupokwa.
21 Vaaviye vámalile figono fyoloofu kitaliya kiinu, uPawulo iikwimaga pagatinagati apaawo, akuvalongelaga iitigilaga, “Vamwadaadaanye, umusika gula pe tukali ku Kilete, ngana mukali muumulikidze ukutigila, tutane ukwendelela nu lugendo, ngali pasili nu waanangifu nu wambudzi uwu. 22 Lino ndikuvagongoola hiilo ukutigila, mwikangadze inumbula, pakuva sikwali nambe yumwinga umwenyo ye ahadza iifuwa, yi meli yeene yihadza yiikwanangika. 23 Ndiidzeela ulo, pakuva uNguluvi ye mwene uneene ndili vaakwe, nave ye mwene ye ndikwifuunya ukwakwe, ámutumile umunyamwandza vaakwe ukwangu ikilo ya neengʼuli. Umunyamwandza uyo iikwimaga biihi naane, 24 akuundongelaga iitigilaga, ‘Pawulo, utane ukoogopa! Uli munya kwima pawutalo pa Kayisali, kangi ulukagulage ukutigila, uNguluvi ahadza akuvapoka mu lusungu lwakwe avaanu vonda avali mu lugendo pamwinga naave.’ 25 Vamwadaadaanye, lino mukangadzage inumbula, pakuva ndikumufuuwa uNguluvi ukutigila, giilimika ngita kye áandongiye. 26 Neke kangi tuli vanya kutoodzwa ku mwani ya ligunguli wuli.”
Vonda viifika ku nyi ingʼafu
27 Ikilo iya kigono ikya likyumi ni fitayi (14), twapila twisuungʼwa ni livelo likomi mu nyandza ya Adilya. Pe yaaviye yisanga yiifika ikilo mugati, avalima-malimo va meli viihoodzaga ukutigila váhegeliye ku nyi ingʼafu. 28 Neke viisage ikigelelo mu lulenga, vawonage kuli mita makyumi gatayi (40) pa kufika paanyi. Pe vaaviye váhegeliye pawutalo padebe, viikwisaga kangi ikigelelo ikyo mu lulenga, viiwonaga kífikile paanyi mita makyumi gadatu (30). 29 Pakuva voogwipe ukutigila, imeli yihadza yikwibumidza mu maganga makomi, viitoodzaga inanga dzitayi mu lulenga kumbele mu meli. Viilapangilaga kukiye kisaatu.
30 Neke avalima-malimo va meli vasakage ukudyega. Viikwisaga uwaato wa kuponela mu lulenga, kuno viidzanga avaanu ngita viisaka ukwisa inanga ulubali lwa kuwutalo ulwa meli. 31 Neke kangi uPawulo amulongelage umukomi va vakolakyanda, na vakolakyanda vaakwe, atigilage, “Ngana avalima-malimo va meli vasiisigala pamwinga naafwe mu meli iyi, unyeenye musipokwa.” 32 Suwe avakolakyanda avo viidumulaga imipingo igyagadile uwaato, vakuwulekaga wugwile mu lulenga.
33 Pe kwaviye kusanga kukiya, uPawulo akuvagongoolaga avaanu vonda ukutigila valiye ikyakuliya, iitigilaga, “Ineengʼuli múmalile figono finyikyumi ni fitayi mwidzindila nu woogofi, kangi musinaa muliya kikivedzaga. 34 Lino ndikuvanyilika muliye, ukuta muginage ukuvedza vuumi, pakuva sikwali nambe yumwinga umwenyo, ye ahadza iiyadza ulufwili lumwinga mu mutuwe gwakwe.”
35 UPawulo pe aaviye ámalile ukulonga ulo, iinyamulaga umukaate, iihongedzaga kwa Nguluvi pawutalo pa vonda, iimenyulaga, iivangaga ukuliya. 36 Avaanu vonda vakwikangadzaga inumbula, navo viiliyaga. 37 Uneefwe twivonda ye twali mu meli iyo, twali vaanu magana gavili na makyumi mufungʼati nu mutanda (276). 38 Vonda avo, pe vaaviye váliye nu kwiguta, viitoodzaga ingana mu nyandza ukuta imeli yivedze meefu.
39 Pe kwaviye kúkiye, avalima-malimo va meli vasaakaguwe ukutigila, váfikile inyi yiki, neke kangi vawonage apoono ululenga lwa nyandza lwíngiye ku nyi ingʼafu iyaali nu muhanga. Apo viilamulaga ukutigila ngana luhwane, vayisindike imeli uko. 40 Neke vadumulage imipingo igyawopile inanga, neke dzidwibalage mu lulenga. Viiwopolaga ni mipingo igyawopile ikiteela ikiigendza imeli, neke veelusage umwendae kuwutalo ku meli ugwa kugendzehedza, ukuta ingʼala yiyisuungʼile imeli ku nyi ngʼafu. 41 Neke kangi imeli iyo yifikage pa naangʼano ya nyandza dzivili, ulubali lwa kuwutalo lwihopelaga kwa ngufu mu muhanga. Kangi ulubali lwakwe lwa kumbele lwitowaga na mavingo makomi, neke yideenyekage fipidzafipiidza.
42 Avakolakyanda viisakaga ukuvakoma avapinge vonda, ukuta nambe yumwinga atane ukudyega wugendela wa koogelela. 43 Neke kangi pakuva umukomi vaawo aasakaga ukumupoka uPawulo, akuvakaanidzaga vatane ukulima ewo. Iitigilaga vonda ávawudzeeliye ukoogelela, avo vatale ukwitoodza mu lulenga, ukuta vadzabukile ku nyi ingʼafu. 44 Avasiwudzeeliye ukoogelela avo, vanyamule imbawo enewuli ifipiidza ifya meli, fivatange ukoogelela. Ndeeni, uneefwe twivonda twidzabukaga ku nyi ngʼafu, tuli vuumi.