Ihaate ya kutala ya Pawulo ku
Vakolindo
Uluhungilo
1
1 Ihaate iyi yíhumile ukwangu neene nde Pawulo. Ndíkemeeliilwe ndivedzage mutume va Kilisiti Yesu wugendela wa mikeelelele gya Nguluvi. Uneene nu mufuuwa muyiisu uSositene, 2 tukuvahungila unyeenye vafuuwa va lukombesoa lwa Nguluvi, ye mugenda ku wudzenge wa Kolindo. UNguluvi ávakamiingʼiise unyeenye nu Kilisiti Yesu, kangi ávakemeeliye ukuvedza vaanu vaakwe aviimike, pamwinga na vaanu va mu mbali dzonda avakulihuuvila ilitaawa lya Mutwa veesu uYesu Kilisiti, ye ali Mutwa vaawo, kangi veesu.3 Ulusungu nu lutengamaso ukuhuma kwa Nguluvi uDadiisu, nu kwa Mutwa uYesu Kilisiti, fivedzage naanye.
Uluhongedzo lwa Pawulo
4 Ndikumuhongedza uNguluvi mbeepali, wiimila wa lusungu lwakwe lwe ávapeeliye unyeenye wugendela mwa Kilisiti Yesu. 5 Pakuva mwa Kilisiti múpeeliilwe uwumosi wonda, kwe kutigila ifipeelwa fya Mubepo uMwimike mu ndongele yeenyo yonda nu wuwuya weenyo wonda. 6 Ifyo fiiwoneesa mugati umwenyo ukutigila, uwoolesi weesu ulwa Kilisiti we wa ndakyene. 7 Neke lino, musikeepile nambe kipeelwa kimwinga kya Mubepo uMwimike, pe mwidzindila mu wusuukwa ukufikila uNguluvi pe alavavilatulila ikigono kye alaapiluka uMutwa veesu uYesu Kilisiti. 8 Kangi uNguluvi ahadza akuvakangadza unyeenye mu lufuuwo ukufikila ku wusililo, ukuta mutane ukuvedza nu lugomehedzo pa kigono kya Mutwa veesu uYesu Kilisiti ikyo, pe alaadza mu kuvahiga avaanu. 9 UNguluvi alaalima idzi, pakuva umwene muhuuvilwa. Umwene ávakemeeliye unyeenye, ukuta muvedzage nu luhangano nu Muswamuve uYesu Kilisiti, uMutwa veesu.
Ukuvawunga avafuuwa avakwigava
10 Lino nye vafuuwa vayangu, mu litaawa lya Mutwa veesu uYesu Kilisiti, ndikuvagongoola ukutigila, mwidiingʼanage nyivonda, patanage ukuvedza nu kwigava umwenyo. Apo pe peene pe mwivedza múkamiingʼiine mu wugulume na mu mahoodzo. 11 Vafuuwa vayangu, avaanu wuli va mu kaaya ya Kilove váandongiye ukutigila, muli mabaatu umwenyo. 12 Lino lwe ndiilonga lwe ulu, yumwinga umwenyo iitigila, “Uneene va Pawulo.” Uyungi iitigila, “Uneene va Apolo.”c Uyungi iitigila, “Uneene va Kefwa.”b Uyungi iitigila, “Uneene va Kilisiti.” 13 UKilisiti íigavile? Ongo, uPawulo ye mwene ye aafuwe pa kipindulihidzo wiimila weenyo? Mwadzabiikwe mu litaawa lya Pawulo?
14 Ndikumuhongedza uNguluvi, pakuva sindamudzabiike muunu umwenyo, nda haamu, yu Kilisipo nu Gayo. 15 Wiimila wa idzo, sikwali ye iisunga atigile aadzabiikwe mu litaawa lyangu. 16 (Eena, ndaadzabiike avaanu va mu kaaya ya Sitefwana. Neke kangi ukulutila avo, sindiikwiwuka ukutigila, ndamudzabiike umuunu yungi.) 17 UKilisiti asaanumile uneene ukudzabika avaanu, nda haamu, aanumile ukudalika iMola iNofu. Sindaadalikaga wugendela wa madzwi agiiwoneesa uluhalawukagudzi lwangu yuune, nda haamu, wugendela wa madzwi agiiwoneesa ingufu ya fuwa iya Kilisiti pa kipindulihidzo, ukuta ingufu iyo yitane ukuvedza yaahela.
Uluhalawukagudzi lwa Nguluvi
18 Pakuva imola ya kufuwa kwa Kilisiti pa kipindulihidzo, we wupuva ku vaanu aviiyaga, neke kangi ukwesu uneefwe ye twipokwa imola iyo, ye ngufu ya Nguluvi. 19 Lwe lwene lúsimbiilwe mu Wusimbe uWiimike ukutigila,
“Ndihadza ndiikwananga uluhalawukagudzi lwa vaanu avali nu luhalawukagudzi,
kangi ndihadza ndikulukaana uluhala lwa vaanu avali nu luhala.”d
20 Lino, ali kwiya umunya luhalawukagudzi? Ali kwiya umuwulanidzi va milagililwe, nu mukoola umuvanga-lukaani va musika ugu? UNguluvi áwoneesiidze pa weelu ukutigila, uluhalawukagudzi lwa vaanu va pe naanyi apa, wupuva. 21 Ndiilonga ulo, pakuva uNguluvi aalamuwe mu luhalawukagudzi lwakwe ukutigila, avaanu avo vatane ukumudzeela wugendela wa luhalawukagudzi lwawo. Nda haamu, uNguluvi aakeeliye avapoke avakumufuuwa wugendela wa kudalika iMola iNofu, ye viitigila avaanu, wupuva. 22 AVayahudi viinyilika ukufiwona ifimanyilo fya filole, na Vagiliki viitemula uluhalawukagudzi, ukuta vafuuwe. 23 Neke kangi uneefwe, twidalika imola ya Kilisiti ye aatoveleliilwe pa kipindulihidzo. Imola iyo yikuvakuvadza aVayahudi, na ku avasili Vayahudi, ye mola ya wupuva. 24 Neke kangi ku avo ve ávakemeeliye uNguluvi ukuvedza vaakwe, vavedze Vayahudi enewuli avasili Vayahudi, uKilisiti ye ngufu ya Nguluvi, kangi lwe luhalawukagudzi lwa Nguluvi. 25 Pakuva imola ye viiwona avaanu ukutigila, wupuva wa Nguluvi, ye ya luhalawukagudzi ukulutila ulwa muunu. Kangi imola ye viiwona we wulemwa wa Nguluvi, ye ya ngufu ukulutila iya muunu.
26 Lino vafuuwa vayangu, mwiwukage kye mwali umusika uNguluvi pe avakemeeliye. Voloofu umwenyo vaawonekaga ngita vangaya luhalawukagudzi pa miiho ga vaanu. Kangi voloofu vasaali na mataawa makomi, nambe kuholwa mu nyumba dza vatambule. 27 Nda haamu, uNguluvi avahaaguwe avaanu avaawonekaga vapuva pe naanyi, ukuta avayeyewuse avanya luhalawukagudzi. Kangi uNguluvi avahaaguwe avaanu avaawonekaga vanya wulemwa pe naanyi, ukuta avayeyewuse avanya ngufu. 28 UNguluvi avahaaguwe avaanu avasili vatambule pe naanyi, aviibedwa, avaanu aviiwoneka si kiinu, ukuta aviise avaanu avakwiwona kiinu. 29 Aalimile ulo, ukuta umuunu ye avedzaga, atanage ukwilumba pa miiho ga Nguluvi. 30 UNguluvi yumwene ye ávakamiingʼiise unyeenye nu Kilisiti Yesu, kangi ámuhambwise uKilisiti kuvedza luhalawukagudzi lwakwe wiimila weesu. Kwe kutigila, wugendela wa luhalawukagudzi ulo, uneefwe tuli vagolofu, tuli viimike, kangi túkombwidzwe. 31 Neke lino, ngita kye lúsimbiilwe mu Wusimbe uWiimike ukutigila, “Umuunu ye avedzaga ye iiwona lutogo, awonage lutogo wiimila wa Mutwa Nguluvi.”e