Uwugoni wusiikwidikwa mu lukombeso
5
1 Lino imola yípuliiswe ndakyene ukutigila, umwenyo kuli wugoni. Umuunu iigenda nu mudala va daadiye. Uwugoni uwo, wusinaa wuhumilaga nambe mu avasili Vayahudi. 2 Na yuunye mukwinunumula! Múlekile ukuhugumililaa nu kumuhedza umwenyo umuunu ye iilima idzo! 3 Uneene nde ndivedze ndili pataali naanye mu lwa muvili, ndili pamwinga naanye mu lwa mubepo. Umuunu uyo ndikapimuhiga 4 mu litaawa lya Mutwa Yesu. Pe mwilundana, ndili pamwinga naanye mu lwa mubepo, kangi ingufu dza Mutwa veesu uYesu poodzili. 5 Mumuhedzage umuunu uyo ukuhuma mu miikalile gya lukombeso. Pe iipilukila mu wutemi wa Setano nu kupumuswa, imumuko idzo dzihadza dzikumupitusa ukuhuma mu ndzanangifu dzaakwe, ukuta apokwe pa kigono ikya kupiluka kwa Mutwa Yesu.b6 Ukwilumba kwenyo si kunofu. Ongo, simwidzeela ukutigila, uluhaafu lukeefu hela lwitupiilidza ilihaagi lyonda?c 7 Lino mwivaladzage wugendela wa kumuhedza umuunu umuhosi uyo umwenyo, ngita kuhedza uluhaafu lwa kataali,e ukuta muvedzage ngita lihaagi lipiya ilingaya luhaafu. Ndakyene unyeenye ndeeni kye mugenda, pakuva uNguluvi amutawuwe uKilisiti ukuvedza wusembe ngita Kaanangʼolo ka Paasaka,d ukuta katupoke. 8 Lwe lwene, tutanage ukukeelanila ikyaka kya Paasaka mu luhaafu lwa kataali, kwe kutigila, uluhaafu uluviifu nu wuhosi, nda haamu, tukeelanilage mu mukaate ugungaya luhaafu,f ye numbula indzelu kangi ndakyene.
9 Mu haate ye ndavasimbiye, ndavalongiye ukutigila, mutanage ukuhangana na vagoni. 10 Sindaatigiye mutanage ukuhangana na vaanu mwe naanyi umu avali vagoni, enewuli avanya kyoyo, avagonadaasi, nambe avakwifuunya ku fihwananguluvi. Pa kulima ulo, ngali múvagiye ukuhega mwe naanyi umu. 11 Neke lino, ndikuvasimbila ukutigila, mutanage ukuhangana nu muunu ye avedzaga ye iitigila mufuuwa, neke kangi mugoni, munya kyoyo, enewuli akwifuunya ku fihwananguluvi, munya maligo, enewuli mugaadzi, enewuli mugonadaasi. Umuunu ndawuli uyo, mutanage nambe kuliilasa.
12-13 Lino si malimo gangu ukuvahiga avasili vafuuwa, nda haamu, uNguluvi mwene ye alavahiga. Neke kangi unyeenye muvahigage avali mu lukombeso, ngita kye lwasimbiilwe ukutigila, “Umuunu umuhosi mumuhedzage umwenyo.”g