Inongwa mu vafuuwa
6
1 Ongo, lino ngana yumwinga umwenyo ápungiine nu mufuuwa muyagwe, iigela wuli ukusindika inongwa yaakwe ku avo avasili vafuuwa? Kye kiki atane ukusindika ku vafuuwa vayagwe, ukuta vavahige? 2 Ongo, musiidzeela ukutigila, aviimike ve veene avalavahiga avaanu va mwe naanyi umu?a Lino, ngana unyeenye mulavahiga avaanu va mwe naanyi umu, ongo, musiivagila ukuhiga utunongwa utupeefu mbandu umwenyo? 3 Ongo, musiidzeela ukutigila, tulavahiga avanyamwandza? Ngana tulavahiga avanyamwandza, ndakyene musiilemwa ukumala amadzwi ga miikalile gyenyo! 4 Lino, ngana múpungiine ulwa madzwi ago, mutanage ukusindika inongwa dzeenyo dzihigwe na vapiivala, pakuva imigendele gyawo gisiikwidikwa nu lukombeso! 5 Ndiilonga ulo ukuta muyeyewuswe. Ongo, simwali umwenyo umunya luhalawukagudzi, nambe yumwinga ye asiilemwa ukuhiga inongwa mu vafuuwa? 6 Neke kangi umwenyo, umufuuwa yumwinga akumusindika umuyagwe kuhigwa, kangi pawutalo pa vaanu avasili vafuuwa!7 Umufuuwa yumwinga pe akumusindika umuyagwe kuhigwa, imola iyo yiiwoneesa ukutigila, unyeenye múlemiilwe mbandu. Ongo, si kiba ukumuleka umufuuwa akwangule enewuli akunyage imaale yaako? 8 Nda haamu, unyeenye mwinyaga nu kulima uwuviifu, kangi mwilima idzo ku vafuuwa vayeenyo! 9 Musiidzeela ukutigila, avahosi vasiliingila ku wutwa wa Nguluvi? Mutanage ukwidzanga! Avagoni, avaanu avakwifuunya ku fihwananguluvi, avadumuli-noolane na avakwigona vagoosi ku vagoosi, 10 avahiidzi, avanya kyoyo, avagaadzi, avanya maligo, avagonadaasi, vonda avo vasiliingila ku wutwa wa Nguluvi. 11 Kangi vamwinga umwenyo, vaali ewo. Nda haamu, múvaliidzwe uwuhosi weenyo, múvedzile viimike nu kwidikilwa ukuvedza vagolofu wugendela wa litaawa lya Mutwa Yesu Kilisiti nu Mubepo va Nguluvi veesu.
Ukumuginiya uNguluvi mu mivili gyesu
12 Vamwinga umwenyo viitigila, “Ndiikwidikwa ukulima ifiinu fyonda fye ndiisaka.” Luli ewo, nda haamu, ukulima ifiinu fyonda fye mwisaka si luwumbulilo. Kangi mwitigila, “Ndiikwidikwa ukulima ifiinu fyonda fye ndiisaka,” neke kangi uneene sindiivedza musutu va kikivedzaga kye ndiisaka ukulima. 13-14 Avangi umwenyo viitigila, “Ngana tuli nu musale, ikyakuliya pookili wiimila wa lileme, ilileme poolili wiimila wa kyakuliya.” Luli ewo, neke kangi umusika gwikwadza uNguluvi pe alaapitula imivili gyesu gilaavedza gisiisaka ikyakuliya. Kangi wugendela wa ngufu dzaakwe, alatudzulubusa ukuhuma mu fuwa ya muvili, ngita kye amudzulubwise uMutwa Yesu. Lino mutanage ukutigila imivili gyenyo poogili wiimila wa wugoni, ngita ikyakuliya kye pookili wiimila wa lileme pe muli nu musale. Umuvili gwa muunu sigwagaviilwe wiimila wa kulimila uwugoni, nda haamu, gwagaviilwe wiimila wa kumutovela iligendwa uMutwa, nayu Mutwa ye mwene ye iiloleela umuvili.
15 Ongo, musiidzeela ukutigila, imivili gyenyo fye fipagwa fya muvili gwa Kilisiti? Ongo, lino ndinyamule ifipagwa fya muvili gwa Kilisiti nu kufikamiingʼasa nu mugendakyaka? Nambi! 16 Umugoosi ye iilima uwugoni nu mugendakyaka, iivedza muvili gumwinga nave. Pakuva lúsimbiilwe mu Wusimbe uWiimike ukutigila, “Avavili avo viivedza muvili gumwinga.”b 17 Neke kangi umuunu ye avedzaga ye akwikamiingʼasa nu Mutwa, iivedza mubepo gumwinga nave.
18 Mwiyefyage nu wugoni. Mwitigila, “Indzanangifu idzingi dzonda dze iilima umuunu, iilima mwivala mwa muvili gwakwe,” neke kangi uneene ndiitigila, umuunu ye iilima uwugoni, uyo akugulimila indzanangifu umuvili gwakwe yumwene. 19 Ongo, musiidzeela ukutigila, imivili gyenyo ye tembeli ya Mubepo uMwimike, ye avapeeliye uNguluvi, kangi akwikala mugati umwenyo? Lino imivili igyo si gyenyo, nda haamu, ye maale ya Nguluvi, 20 pakuva mwakombwidzwe nu luhombo lukomi. Wiimila wa idzo, mumuginiyage uNguluvi mu mivili gyenyo.