3 Imbulanidzo ingomi dza kutala dze ndaanukiye nu kuvagotolela dze idzi. UKilisiti aafuwe wiimila wa ndzanangifu dzeesu, ngita kye lúsimbiilwe mu Wusimbe uWiimike.^a 4 Kangi iisiilwaga, neke ikigono ikya wudatu adzulubukage, ngita kye lúsimbiilwe mu Wusimbe uWiimike.^b 5 Kangi akwiwoneesaga kwa Kefwa,^c neke iiwoneesage ku vanyigendwa vaakwe vanyikyumi na vavili (12). 6 Pambele akwiwoneesaga ku vafuuwa ukulutila magana gahaanu (500) avaali pamwinga, voloofu mwa avo, vapila vuumi nambe lino, nde vavedze avangi váfuwe. 7 Kangi akwiwoneesaga kwa Yakobo,^d pambele akwiwoneesaga ku vatume vonda. 8 Neke ku wusililo wa vonda iiwoneesage ukwangu, uneene ye ndaali ngita muunu ye áholiilwe umusika si gwakwe. 9 Lwe lwene uneene ndili mudebe mu vatume, sindivagiye nambe kutambulwa mutume, pakuva ndavapumusaga avafuuwa va lukombeso lwa Nguluvi. 10 Neke kangi uneene ndili mutume lino, pakuva uNguluvi aamboniye lusungu. Kangi ulusungu lwakwe ukwangu silwali lwahela, pakuva ndaalimile amalimo ukulutila avatume vonda. Sindaalimile amalimo ago yuune mwene, nda haamu, ndaalimile wugendela wa lusungu lwa Nguluvi ulwali pamwinga naane. 11 Lino, ngana avatume avo enewuli uneene, iMola iNofu ye twidalika yiiyila ye mwafuuviilwe.

12 Neke kangi, ngana uKilisiti iidalikwa ukutigila, aadzulubwike ukuhuma ku wulungu, luli wuli avangi umwenyo viitigila, sikooluli uludzulubuko lwa ávafuwe? 13 Ngana sikooluli uludzulubuko lwa ávafuwe, apo kwe kutigila, nayu Kilisiti asaadzulubwike. 14 Kangi, ngana uKilisiti asaadzulubwike, apo ukudalika kwesu kwahela, nalu lufuuwo lwenyo lwahela. 15 Kangi uneefwe twiwoneka tuli voolesi va wudesi ulwa Nguluvi, pakuva twikoolela ukutigila, uNguluvi amudzulubwise uKilisiti ukuhuma ku wulungu. Nda haamu, ngana ndakyene ávafuwe vasiidzulubuswa, uNguluvi asamudzulubwise uKilisiti ukuhuma ku wulungu. 16 Pakuva, ngana ávafuwe vasiidzulubuswa, apo nayu Kilisiti asaadzulubwike. 17 Kangi, ngana uKilisiti asaadzulubwike, ulufuuwo lwenyo lungaya luwumbulilo, apo mupila mwiyagila mu ndzanangifu dzeenyo. 18 Apo avaanu ávafuwe we vámufuuviilwe uKilisiti, navo váyagile. 19 Ngana uluhuuvilo lwesu mwa Kilisiti lwímiye mu miikalile igi gya lino hela, apo uneefwe ngali tuli vaanu va kuwonelwa lusungu ukulutila avaanu vonda.

20 Neke kangi lino, indakyene ye iyi. UKilisiti ádzulubwike ukuhuma ku wulungu, kangi uyu ye mwene va kutala ukudzulubuka ku avo ávafuwe. 21 Pakuva ngita ifuwa kye yaadzile wugendela wa muunu yumwinga, ndeeni nu ludzulubuko lwa ávafuwe nalo, lwádzile wugendela wa muunu yumwinga. 22 Ngita avaanu vonda kye viifuwa wiimila wa kukamiingʼana kwawo nu Adamu, ndeeni avaanu vonda valaadzulubuswa wiimila wa kukamiingʼana kwawo nu Kilisiti.

23 Neke kangi nayula alaadzulubuswa mu musika gwakwe. UKilisiti ye mwene ye aatalile ukudzulubuka, neke pambele pe alaadza, avaanu vaakwe valaadzulubuswa. 24 UKilisiti pe iivedza átipuwe uwutemi wonda, uwutawulilwe wonda ni ngufu dzonda, apo uwusililo wa fyonda wulaadza, umusika ugo alawutawula uwutwa kwa Nguluvi uDaada. 25 Pakuva uKilisiti munya kutema ukufikila pe iivedza ávadelwidze avatavangwa vaakwe nu kuvaviika paanyi pa ndzayo dzaakwe.^e 26 Umutavangwa va wusililo ukutipulwa, ye fuwa. 27 Pakuva uWusimbe uWiimike wiitigila, “UNguluvi aaviikile ifiinu fyonda paanyi pa ndzayo dzaakwe.”^f Lino, pe wiitigila fyonda fíviikiilwe paanyi pa wutawulilwe waakwe, si wiitigila ye Nguluvi yumwene ye ali paanyi pa wutawulilwe uwo. Nda haamu, uNguluvi áviikile ifiinu fyonda paanyi pa wutawulilwe wa Kilisiti. 28 UNguluvi pe iivedza álimile idzo, neke uMuswamuve nave aliiviika paanyi pa Nguluvi, ye aaviikile ifiinu fyonda paanyi pa wutawulilwe wa Muswamuve, ukuta uNguluvi avedzage Mutemi va fyonda.

29 Lino, ngana sikooluli uludzulubuko lwa ávafuwe, avaanu aviidzabikwa wiimila wa ávafuwe, viihuuvila kiinu kiki? Ngana ávafuwe vasiidzulubuka nambi, kye kiki avaanu avo viidzabikwa wiimila waawo? 30 Na yuufwe vatume, kye kiki tukwiviika mu lutalamu ifivalilo fyonda? 31 Vafuuwa vayanguanye, ndili mu lutalamu lwa kufuwa ifigono fyonda. Iyo ye ndakyene, ngita kye yili ndakyene ukutigila, ndiiwona lutogo pakuva múkamiingʼiiswe nu Kilisiti Yesu uMutwa veesu. 32 Ngana uluhuuvilo lwangu ngali lwali luvedzage lwa mwe naanyi hela, apo ngali lwali lwivedza luwumbulilo luki ukwangu ukutovana na makooko amasali mu wudzenge wa Efeso? Ndeeni, ngana ávafuwe vasiidzulubuswa, suwe,

33 Mutanage ukudzangwa na vaanu aviilonga ulo, pakuva lwilongwa ukutigila, avadzeela avaviifu viikwananga imigendele minofu. 34 Muvedzage nu luhala nu kuhoodza wunofu ngita kye lwisakulwa, mulekage ukulima indzanangifu, pakuva avangi umwenyo vasimudzeeliye uNguluvi. Ndiilonga idzo, ukuta muwone nyoni.

35 Neke kangi umuunu iisunga awuudze ukutigila, “Ávafuwe valaadzulubuka wuli? Valaavedza nu muvili uguli wuli?” 36 Ago ge mahoodzo ga wupuva! Pe wiivyala imbeyu yiifuwa nu kumela ikimelo, neke kangi yisiimela kitafuwa tandi. 37 Imbeyu ye wiivyala, nde yivedze ya ngana enewuli iyingi, yisiihwanana ni kimelo kyakwe. 38 Neke kangi ikimelo ikiihuma mu mbeyu iyo, uNguluvi iigava ngita kye iikeela yumwene, nayila imbeyu akuyipeela umuvili gwakwe.

39 Ifigawa fyonda fili ni mivili, neke kangi imivili igyo gisiihwanana. Imivili gya vaanu gili wungi, igya fingʼooko gili wungi, igya fidege gili wungi, igya somba nagyo gili wungi. 40 Kangi poogili imivili igya kukyanya ni mivili igya mwe naanyi, nda haamu, ulutogo lwa mivili igya kukyanya lusiihwanana nu lutogo ulwa mivili igya mwe naanyi. 41 Ulwa mivili igya kukyanya, ulutogo lwa lidzuwa luli wungi, ulutogo lwa mwedzi luli wungi, nu lutogo ulwa nondwe luli wungi. Inondwe nadzo, nalula luli nu lutogo lwakwe.

42 Kye luli ewo, na ávafuwe pe valaadzulubuka. Ngita mbeyu, umuvili ugwisiilwa pa muganga gwiwola, neke kangi umuvili ugo gwe alagudzulubusa uNguluvi, gusilaawola kangi. 43 Umuvili ugwisiilwa mu lubedo, uNguluvi alagudzulubusa mu lutogo. Umuvili ugwisiilwa mu wulemwa, uNguluvi alagudzulubusa mu ngufu. 44 Umuvili ugwisiilwa ugwa pe naanyi, uNguluvi alagudzulubusa umuvili umupiya gwe alagupeela uwuumi uMubepo uMwimike. Ngana pooguli umuvili gwa pe naanyi, ndeeni kye lugenda, pooguli nagu muvili umupiya gwe alatupeela uMubepo uMwimike.

45 Lwe lwene lúsimbiilwe mu Wusimbe uWiimike ukutigila, “Umuunu va kutala uAdamu, aagaviilwe iivedzaga muunu muumi.”^h Neke kangi uAdamu va wusililo, ye mwene ye Kilisiti, ye Mubepo ye akuvapeela avaanu imivili imipiya gya mbeepali. 46 Umuvili ugwa kutala, gwe muvili gwa pe naanyi, pambele gulaadza umuvili gwe tulaapeelwa nu Mubepo uMwimike. 47 Umuunu va kutala, aagaviilwe ukuhuma mu muganga gwa nyi. Umuunu va kavili, aahumile kukyanya. 48 Ngita kye twihwanana nu Adamu va mwe naanyi, ndeeni tulaahwanana nu Adamu va kukyanya. 49 Ngita kye túhwaniine na ye aagaviilwe ukuhuma mu muganga, ndeeni kye tulaahwanana na ye aahumile kukyanya.

50 Lino vafuuwa vayangu ndiilonga ndiitigila, umuvili gwa nyama ni danda, fisiliingila ku wutwa wa Nguluvi, kangi umuvili ugwikwanangika, gusilaavedza nu wuumi uwa mbeepali.

51 Mupulikidzage! Ndikuvalongela ídzifihiilwe pa miiho geenyo. Uneefwe twivonda tusilaafuwa nda, neke kangi twivonda tulaahambuka 52 baaho na baaho ngita musika gwa kusinidza amiiho. Ulo lulaahumila pe tulaapulika isawuti ya lukwalimba ukuwoneesa uwusililo wa musika. Umusika ugo, ulukwalimba ulo pe lulaavedza lwikwana, avaafuwe valaadzulubuswa, kangi valaavedza ni mivili igisiikwanangika, na yuufwe tulaahambuka. 53 Pakuva umuvili ugo ugwiwola, gwisakulwa guhambuke ukuvedza muvili ugusiiwola, umuvili ugwifuwa, gwisakulwa guhambuke ukuvedza muvili ugusiifuwa. 54 Umusika ugo, umuvili ugwa kuwola nu kufuwa, ugo gulaavedza gúhambwike ukuvedza muvili ugusiiwola nu wukitafuwa, apo pe peene pe lilaakwila ilidzwi ílisimbiilwe mu Wusimbe uWiimike ukutigila, “UNguluvi ádelwidze ifuwa!”ⁱ

56 Indzanangifu dziihula uwuvafi wa wufuwe, kangi imilagililwe giiwoneesa ingufu ya ndzanangifu. 57 Neke kangi tukumuhongedza uNguluvi ye akutupeela uwudeludzi wugendela mwa Mutwa veesu uYesu Kilisiti.

58 Lino vafuuwa vayangu vendaanye, mwimage sipi, mutanage ukuyuga-yuga mu lufuuwo lwenyo. Muginage ukwitawula ukulima amalimo ga Mutwa Yesu, pakuva mwidzeela ukutigila, amalimo ge mwilima mwa Mutwa Yesu, musiifwahila hela.