Ipembe ya kuvatanga avafuuwa va ku Yelusalemu
16
1 Lino wiimila wa pembe ya kuhelela kuvatanga avafuuwa, mulimage ngita kye ndikavalagiidze avafuuwa va ngʼombeso dza ku mugoola gwa Galatya. 2 Pa kigono ikya kutala ikya mulungu mbeepali, nayula umwenyo oomolage amagoobeli ukulingʼaana na fye áanukiye, ukuta pe ndiikwadza, kutane ukuvedza na malimo ga kupemba. 3 Pe ndiikwadza ndilavapeela ihaate ya kuvatambudza avaanu ve múvahaaguwe umwenyo, nu kuvatuma ukuta vasindike ipembe iyo ku Yelusalemu. 4 Ngana lwivagila ukutigila na yuune ndihelele, apo ndihadza ndiiheleengʼasa navo.Uwugelanidze wa Pawulo uwa kuhelela ku Kolindo
5 Pe ndiivedza ndíhumile ku mugoola gwa ku Makedoniya, ndiikwadza ukwenyo, pakuva ndiisaka ndigendele tandi ku Makedoniya. 6 Apangi ndihadza ndikwikala naanye umusika wuli, enewuli nambe musika gonda ugwa ngʼaala, ukuta muunange ifiinu fya kuponela mu lugendo, konda kwe ndiihelela. 7 Sindiikeela tutaangʼane lino musika mudebe ngita ndili muheleli-ngʼaasi, pakuva ndiihuuvila ukusigala naanye musika mutaali ngana uMutwa ákeeliye. 8 Neke kangi ndihadza ndiisigala mu wudzenge wa Efeso wuuwu, ukufikila ikigono ikya kyaka kya Pendekositi,a 9 pakuva umulyango gúundindukiye ukulima amalimo makomi mu wudzenge uwo, napo kangi poovali avaanu voloofu avakuunanidza.
10 UTimoti wone aadze ukwenyo, mumwanukilage wunofu, ukuta iikalage naanye kingaya woogofi, pakuva nave iilima amalimo ga Mutwa uYesu ngita uneene. 11 Lino umuunu ye avedzaga atanage ukumubeda, nda haamu, mumutangage ahege uko mu lutengamaso, ukuta aadze ukwangu, pakuva uneene ndikumudzindila pamwinga na vafuuwa vayiisu.
12 Lino, ulwa mufuuwa muyiisu uApolo, ndímugongoolile mbandu aadzase na vafuuwa vayagwe ukwenyo. Neke kangi umwene alema ukwadza lino, ahadza iikwadza umusika ugukumuvagila.
Amadzwi ga wusililo
13 Muvedzage miiho, mwimage sipi mu lufuuwo, kangi muvedzage nu wukangafu ni ngufu. 14 Amalimo geenyo gonda mulimage mu wende.
15 Mwidzeela ukutigila, uSitefwana pamwinga na vaanu va mu nyumba yaakwe, ve veene avaali va kutala ukumufuuwa uYesu Kilisiti mu mugoola gwa Akaya, navo víitawuwe ukuvatanga avaanu aviimike. Lino vafuuwa vayangu, ndikuvagongoola ukutigila, 16 muviidikage avaanu ndawuli avo, na vangi vonda aviitawula ingufu dzaawo ukulimasa amalimo navo.
17 Ndíkeeliye hiilo ukuvawona uSitefwana, uFotinato nu Akayiko, váadzile apa. Váandimiye ndzoloofu dze mwilemwa, pakuva musili pamwinga naane. 18 Ványaamiidze inumbula yangu, kangi vádzinyaamiidze inumbula dzeenyo. Lino muvaginiyage hiilo avaanu ngita avo.
19 Avafuuwa avali mu ngʼombeso dza mu migoola gya Asya, vakuvahungila. UAkila nu mudala vaakwe uPulisika,b pamwinga na vafuuwa avaavilundana mu nyumba yaawo, vakuvahungila mu litaawa lya Mutwa Yesu. 20 Avafuuwa vonda avali apa, vakuvahungila. Na yuunye mwihungilage mu lwinoonelo ulwimike.
21 Uneene Pawulo, ndísimbile ni liwoko lyangu yuune ukuvahungila. 22 Umuunu ye avedzaga ye asikumwenda uMutwa, alekelwage ululeko. Mutwa veesu waadze!c