Ihaate ya kutala ya Pawulo kwa
Timoti
Uluhungilo
1
1 Ihaate iyi yíhumile ukwangu neene nde Pawulo. Uneene ndíhaaguliilwe ukuvedza mutume va Yesu Kilisiti wugendela wa lulagi lwa Nguluvi uMupoki veesu, nu Kilisiti uYesu ye ali luhuuvilo lwesu. 2 Ndikukusimbila uveeve Timoti, muswamu-vangu va ndakyene mu luhangano lwa lufuuwo. Ulusungu, ulupyana nu lutengamaso ukuhuma kwa Nguluvi uDaada nu kwa Kilisiti Yesu uMutwa veesu, fivedzage naave.Ulupavilo ulwa mbulanidzo dza wudesi
3 Wiikalage mu wudzenge wa Efeso, ngita kye ndikakunyiliike pe ndikiihegaga ukuhelela ku mugoola gwa Makedoniya. Ku Efeso uko kuli vaanu aviiwulanidza imbulanidzo dza wudesi, uvakaanidzage avaanu avo. 4 Vatanage ukukolaatidza isimo dzaahela, nu mufudiingʼano gwa mataawa ga ngʼolo idza kataali. Ifyo fye fyene ifiihula imbeedzi, kangi fisikuvatanga avaanu ukumufuuwa uNguluvi, ngita kye wugenda uwugulume waakwe uwa kuvapoka avaanu. 5 Uwugulume wa lulagi ulu we wende, ukuta avafuuwa viiyendage uluhuma mu numbula indzelu, ulwikagulo ulunofu, nu lufuuwo lwa ndakyene. 6 Avaanu avangi vádzilekile idzo, vápitukiye mu kulonga amadzwi agangaya luwumbulilo. 7 Viisaka ukuvedza vawulanidzi va milagililwe gya Mose, nde luvedze vasiidzeela dze viilonga, nambe kukangadza.
8 Twidzeela ukutigila, imilagililwe gya Mose minofu ngana umuunu akugininiila ngita uNguluvi kye aagulumiye. 9 Ndakyene imilagililwe sigyaviikiilwe wiimila wa vagolofu, nda haamu, wiimila wa vaanu avasiikwidika imilagililwe, na vagalusi avasikumoogopa uNguluvi na vanya ndzanangifu, si viimike na avasikwifuunya kwa Nguluvi, aviikoma avadadaawo na vangʼinaawo, na avo aviikoma avaanu avangi. 10 Kangi gyaviikiilwe wiimila wa vagoni na vagoosi avakwigona vagoosi kwa vagoosi, navo avakuvagudza avasutu, avadesi, na aviiyiiga mu wudesi, pamwinga ni dzingi dzonda idziiluwa ni mbulanidzo dza ndakyene. 11 Imbulanidzo idzo idzili mu Mola iNofu, yiiwoneesa indolo dza Nguluvi ye iilumbwa. Iyo ye yeene ye áameeliye uNguluvi ndiyidalikage.
Ulusungu lwa Mutwa kwa Pawulo
12 Ndikumuhongedza uKilisiti Yesu uMutwa veesu ye áameeliye ingufu, pakuva áambwene ukutigila, ndili mutovela-ligendwa muhuuvilwa, akuumbiikaga mu malimo gaakwe. 13 Pa wutalilo ndaali mulonga fivi, ndavapumusaga nu kuvaviifya avaanu vaakwe, napo kangi umwene aamyaniye, pakuva ndaalimaga idzo mu wupuva nu wungaya lufuuwo. 14 Ndakyene uMutwa veesu aamboniye lusungu loloofu hiilo, akuumeelaga ulufuuwo nu wende uwuli mwa Kilisiti Yesu.
15 Ilidzwi ili lya ndakyene, kangi liivagila ukwidikilwa ngʼaani ukutigila, “UKilisiti Yesu aadzile mwe naanyi ukuvapoka avahosi.” Na yuune ndili muhosi ukulutila avanya ndzanangifu vonda. 16 Napo kangi uKilisiti Yesu aamyaniye uneene! Aawoneesiidze uwisamutima waakwe ukwangu nde munya ndzanangifu ukulutila vonda, ukuta ndivedzage kyoledzi ku vonda avahadza vakumufuuwa nu kwanukila uwuumi uwa mbeepali. 17 Lino uwuginalifu ni ndolo apeelwage umwene ifigono fyonda, uMutwa va mbeepali, ye asiifuwa kangi asiiwoneka, ye Nguluvi mwene. Eena.
UPawulo akumulagidza uTimoti
18 Muswamu-vangu Timoti, uwulagidze uwo we ndikukupeela, wíimiye mu madzwi ga wuvidzi agaalongiilwe wiimila waako. Wiinatilage amadzwi ago, ukuta gakutangage ukuhoma amagoha amanofu. 19 Unywilidzage ulufuuwo nu lwikagulo lunofu. Avaanu avangi vákaanile ukudzilima idzo, neke ulo lúvahuliye ukululeka ulufuuwo lwawo. 20 Mu vaanu avo mwali uHimenayo nu Alekisanda, avo ndímulekiye uSetano,a avawundze, ukuta vatane ukumulonga fivi uNguluvi.