Ihaate iyi yaasimbiilwe nu mutume Pawulo. Lwiwoneka ukutigila, uPawulo aasimbile ihaate iyi umwaka gwa makyumi mutanda ni gihaanu (65), ukuhuma pe iiholwa uYesu Kilisiti. Amusimbiye umunyigendwa vaakwe ye aatambulwaga Timoti, ukuhuma ku wudzenge wa Lisitila. UPawulo aali ni midzeelanile mbandu nu Timoti, lwe lwene amutambulaga ukutigila, muswamuve (1:2, 18). UTimoti aali muswamuve va mwayuuva Muyahudi, nu daadiye aali Mugiliki (Malimo ga Vatume 16:1). Mu ngendo dzaakwe, uPawulo aaheliye ku Lisitila, mu lugendo ulwa kavili akumuhaagulaga uTimoti, vaheleengʼase ukudalika iMola iNofu (Malimo ga Vatume 16:1-5). Pambele uPawulo amupeeliye uTimoti amalimo ga kwimiilila ulukombeso lwa vafuuwa mu wudzenge wa Efeso (1:3).

Ihaate iyi yili ni ndagiilidzo ndzoloofu hiilo ulwa lwifuunyo lwa lukombeso (2:1-15), ulwisakulwa ku avo aviilongodza ulukombeso (3:1-13), na mawungo ulwa vawulanidzi va wudesi (1:3-11; 4:1-5; 6:3-5). UPawulo akumulagidza uTimoti kye lwivagila ukuvahaagula avimiilidzi na vatangilidzi avanofu va lukombeso nu kuvapeela imbulanidzo (5:1–6:2), kangi iisimiilidza ukutigila, uTimoti akaanage imbulanidzo dzonda idza wudesi. UPawulo akumukangadza uTimoti mu malimo gaakwe ga kulongodza ulukombeso, kangi avedzage kyoledzi kinofu mu migendele gyakwe ku vafuuwa (4:12).