Umukolakyanda umunofu
2
1 Lino uveeve muswamu-vangu, uvedzage ni ngufu wugendela wa lusungu lwa Kilisiti Yesu. 2 Ukiipulikaga imbulanidzo dze ndikiiwulanidzaga pa miiho ga voolesi voloofu, lino idzo uvapeelage avaanu aviihuuvilwa, ukuta vavawulanidzage ndeeni avangi. 3 Wiigugumidzage mu mumuko pamwinga naane, uko kwe kwene ukuvedza mukolakyanda munofu va Kilisiti Yesu. 4 Umukolakyanda pe ali mu malimo ga wukolakyanda, akwiyefya ukulima amalimo agasili ga wukolakyanda, ukuta amukeeledze umukomi vaakwe. 5 Ndeeni, umuunu ye iihanga ingwila ya mikino, asiipeelwa ingeela ya ngwila ngana asiinatiye imigendzehedze gya ngwila. 6 Umuunu ye iikangala pigimilo, iivagila ukuvedza va kutala ukwanukila ulubali lwa mbene. 7 Udzihoodzage mbandu idzo dze ndiilonga, pakuva uMutwa ahadza akukupeela uluhala ulwa kudzidzeela dzonda.8 Umwiwukage uYesu Kilisiti va kipelela kya mutwa Dawudi,a ye aadzulubwiswe nu Nguluvi ukuhuma ku wulungu. Iyo, ye yeene iMola iNofu ye ndiidalika. 9 Wiimila wa ulo, uneene ndiipumuka pa kupingwa ni minyololo ngita ndili mwanandzi. Nda haamu, ilidzwi lya Nguluvi lisiipingwa nda. 10 Neke lino, uneene ndikwigugumidza mu malimo gonda wiimila wa vahaagulwa va Nguluvi, ukuta navo vaanukile uwupoki uwuli mwa Kilisiti Yesu, pamwinga ni ndolo dza mbeepali.
11 Ilidzwi ili ilya ndakyene ukutigila,
“Ngana twafwiliise nu Kilisiti,
kangi tulaavedza vuumi pamwinga nave.
12 Ngana tukwigugumidza,
tulaatemasa nave.
Nde tumukaane,
nave alatukaana.
13 Uneefwe ngana tusiihuuvilwa,
umwene iisigala ukuvedza muhuuvilwa ifigono fyonda,
pakuva umwene asikwikaana mwene.”
Umulima-malimo umunofu
14 Uviiwusage avaanu amadzwi ago nu kuvawunga pa miiho ga Nguluvi, valekage ukwibeedza wiimila wa madzwi agangaya luwumbulilo. Imbeedzi idzo dzingaya luwumbulilo, dzikuvaananga hela aviipulikidza. 15 Ugimbage ukuvedza mulima-malimo munofu ye iikwidikwa nu Nguluvi, kwe kutigila umulima-malimo umungaya nyoni, ye iiwulanidza indakyene ya lidzwi ilya Nguluvi ngita kye yiisakulwa.
16 Wiiyefyage mu madzwi gaahela agasikumuginiya uNguluvi, pakuva ago giigina ukuvaviika avaanu kutaali nu Nguluvi. 17 Imbulanidzo dzaawo dziitagalila ngita likoongʼo iliiwodza umuvili. Mu avo mwali uHimenayo nu Fileto, 18 avo váyagile mbandu, váyilekile indakyene. Viikwananga ulufuuwo lwa vaanu avangi pe viitigila, uludzulubuko lwa ávafuwe lukapihumila. 19 Neke kangi avaanu aviikwima sipi, vali ngita waalo uwukangafu úwuviikiilwe nu Nguluvi. Pakyanya pa waalo uwo, gásimbiilwe amadzwi aga,
“UMutwa ávadzeeliye avaakwe,”b
kangi,
“Umuunu ye avedzaga ye akwitambula ukutigila, umwene va Mutwa,
apitukage ukuhuma ku wuhosi.”c
20 Mu nyumba iya mumosi, moofili ifikoongʼolo ifya fyuma ni fya sahabu, ifiilimilwa mu malimo ga luginiyo. Kangi moofili ifikoongʼolo ifya lilongo ni fya mabiki ifya kulimila amalimo agangaya luginiyo. 21 Ndeeni, ngana umuunu iivaladze pa kuwuleka uwuhosi wonda uwo, ahadza iivedza kikoongʼolo ikihaagule íkivaliidzwe, kangi ahadza iivagila kwa Mutwa, iimikwe ku malimo gonda amanofu.
22 Wiiyefyage nu wudobofu uwa wubuhu, ufwimage uwugolofu, uvedzage nu lufuuwo, uwende nu lutengamaso. Wiinatilage idzo pamwinga na vonda avakumutambula uMutwa ulunya numbula ndzelu. 23 Wiiyefyage mu mbeedzi idza wupuva idzingaya luwumbulilo, pakuva wiidzeela ukutigila, idzo dziihula mabaatu. 24 Umutovela-ligendwa va Mutwa asiikwidikwa ukuvedza munya mabaatu. Nda haamu, avedzage muleele ku vaanu vonda, adzeelage ukuwulanidza nu munya lwigugumidzo. 25 Kangi avawungage mu wuleele avakwibeedza nu mwene, ukuta ngana luhwane uNguluvi avapeele ukupela nu kuyidzeela indakyene. 26 Apo uluhala lwawo luhadza lukuvapilukila, vahadza viipokwa ku mutego gwa Setano ye ávakamuliidze, ukuta valimage lwe iisaka umwene.