Ihaate iyi yaasimbiilwe nu mutume Pawulo, pe aali ku Makedoniya (1:1, 4). Lwiwoneka aasimbile ngita umwaka gwa makyumi mutanda ni gihaanu (65), ukuhuma pe iiholwa uYesu Kilisiti. Amusimbiye umuunu ye aatambulwaga Tito, ye aali ku ligunguli lya Kilete uko. Uyo aali Mugiliki ye aapitukiye uWukilisiti (1:4; Vagalatya 2:3). Aagendasaga nu Pawulo nyakoloofu, ukumutanga mu malimo gaakwe ga kudalika iMola iNofu. Umusika mudoodo pe asinaa asimba ihaate iyi, vaalimiise amalimo ku ligunguli lya Kilete. UPawulo akumulekaga baaho uTito iimiililage ingʼombeso.

Uwugulume wa Pawulo uwa kusimba ihaate iyi, waali wa kumulagidza ngita kye iivagila ukuhaagula avimiilidzi va lukombeso nu kuvapeela imbulanidzo (1:5-9). Ihaate dzaakwe kwa Timoti dziihwanana ni haate iyi mu ndagiilidzo idzo na mawungo ulwa vawulanidzi va wudesi (1:10-16). Akumulagidza uTito avahaagulage avimiilidzi aviilongwa wunofu. Kangi akumulagidza ulwa kuwulanidza ifipuga fya vafuuwa, kwe kutigila, avagogolo, avamwadaada na vamwayuuva, avavinano na vasutu (2:1-15). Akumusimiilidzila uTito ukutigila, akolaatidzage imbulanidzo dza ndakyene, aviiwusage avafuuwa ukwikala mu lutengamaso nu kwiyefya mu mbeedzi (3:1-11).