Ihaate ya kavili ya Pawulo kwa
Timoti
Uluhungilo
1
1 Ihaate iyi yíhumile ukwangu neene nde Pawulo. Uneene ndili mutume va Kilisiti Yesu wugendela wa mikeelelele gya Nguluvi. Ndítumiilwe ukuta nditagalidzage imola iya wuumi. UNguluvi aahuuviidze ukutigila, uwuumi uwo wiiwoneka wugendela wa kumufuuwa uKilisiti Yesu. 2 Ndikukusimbila uveeve Timoti, ye uli ngita muswamu-vangu mwende. Ulusungu, ulupyana nu lutengamaso ukuhuma kwa Nguluvi uDaada nu kwa Kilisiti Yesu uMutwa veesu, fivedzage naave.UPawulo akumukangadza uTimoti
3 Ndikumuhongedza uNguluvi, ye ndikumutovela iligendwa lino mu lwikagulo lunofu, ngita kye vamulimiye avakuuhu. Kangi ndikumuhongedza, pe ndikukwiwuka mu ndapangilo dzangu, ikilo nu muunyi. 4 Pe ndiikwiwuka amoohodzi gaako umusika pe twilagana, ndiidoboka hiilo ukutaangʼana naave, ukuta ndimemywe ulukeelo. 5 Kangi ndiikwiwuka ulufuuwo lwako lwa ndakyene. Ulufuuwo ulo, aali nalo upaapo uLoyisi nu yuuwo uEwunike, ndiidzeela ukutigila, na yuuve uli nalo. 6 Wiimila wa ulo, ndikukwiwusa ukutigila, ugimbage ukufungidza ikipeelwa kyako, ukuta kyakage ngita mooto, ikipeelwa ikyo akupeeliye uNguluvi wugendela wa kukuviikila amawoko gangu, pe ndakwimiike mu malimo ga Nguluvi. 7 Pakuva uMubepo uMwimike ye atupeeliye uNguluvi si va woogofi, nda haamu, va ngufu, uwende nu kwiwopa.
8 Lino utanage ukuwona nyoni ukoolela imola ya Mutwa veesu uYesu Kilisiti, nambe kuwona nyoni pakuva ndili mu ndinde wiimila waakwe. Nda haamu, uhangage naane mu mumuko wiimila wa Mola iNofu, wugendela wa ngufu ye wiikwanukila ukuhuma kwa Nguluvi. 9 Umwene atupokile nu kutukemeelela ku miikalile imiimike. Asaalimile ulo wiimila wa malimo geesu amanofu, nda haamu, aalimile wiimila wa mikeelelele gyakwe nu lusungu lwakwe. Ulusungu ulo, atupeeliye wugendela mwa Kilisiti Yesu, ukuhuma pe kisinaa kigawa kikivedzaga. 10 Lino uNguluvi ávilatuwe ulusungu lwakwe ukwesu, wugendela wa kwadza uMupoki veesu uKilisiti Yesu. Uyo ádelwidze ingufu dza fuwa, kangi wugendela wa Mola iNofu, áwoneesiidze uwuumi uwa mbeepali.
11 Wiimila wa Mola iNofu iyo, áanyaaguwe ndivedzage mudalisi, mutume, kangi muwulanidzi. 12 Lwe lwene ndiipumuka mu idzi, neke kangi sindiiwona nyoni, pakuva ndímudzeeliye ye ndikumufuuwa. Kangi ndiidzeela ndakyene ukutigila, uKilisiti ali ni ngufu iya kuloleela wunofu iMola iNofu ye áameeliye ukufikila ikigono kye alaapiluka. 13 Imbulanidzo dza ndakyene dze ndakuwulaniidze, idzo ukolaatidzage wunofu mu lufuuwo nu wende uwuli mwa Kilisiti Yesu. 14 IMola iNofu ye úpeeliilwe, uyiloleelage mu ngufu dza Mubepo uMwimike ye akwikala mugati umwesu.
15 Timoti, wiidzeela ukutigila, avafuuwa voloofu va mugoola gwa Asya váandekile. Mugati umwawo mwali uFugelo nu Helimogene. 16 UMutwa Yesu avapyanilage ava mu nyumba iya Onesifolo, pakuva ayikeeledzaga inumbula yangu nyakoloofu. Kangi asaaweene nyoni ukwadza mu kuundola pe ndili mu ndinde, 17 nda haamu, umusika pe aadzile ku wudzenge wa Loma, aagimbile ukuunemula ukufikila pe akuumbona. 18 UMutwa Yesu aali amupeelage ulupyana uOnesifolo pa kigono ikya luhigo kila. Na yuuve wiidzeela wunofu mu ndzoloofu dze aanangile ku wudzenge wa Efeso.