Ihaate ya Pawulo kwa
Tito
Uluhungilo
1
1 Ihaate iyi yíhumile ukwangu neene nde Pawulo. Uneene ye ndili mutovela-ligendwa va Nguluvi, kangi ndili mutume va Yesu Kilisiti. Uneene ndítumiilwe ndivalagile avahaagulwa va Nguluvi, ukuta vamufuuwe nu kuyidzeela indakyene wiimila wa Yesu Kilisiti. Indakyene iyo yikuvalongodza ukumuginiya uNguluvi, 2 nu kuvapeela uluhuuvilo lwa wuumi uwa mbeepali. UNguluvi aahuuviidze idzo ukuhuma pe kisinaa kigawa kikivedzaga, kangi umwene asiilonga wudesi. 3 Lino umusika gwe aahaaguwe ugwa kudzivilatula idzo gúfikile, wugendela wa mola dze áameeliye uNguluvi uMupoki veesu, nu kuundagidza ndidalikage. 4 Ndikukusimbila uveeve Tito, ye uli muswamu-vangu va ndakyene mu luhangano lwa lufuuwo. Ulusungu nu lutengamaso ukuhuma kwa Nguluvi uDadiisu, nu kwa Kilisiti Yesu uMupoki veesu, fivedzage naave.Amalimo ga Tito ku Kilete
5 Ndakulekile ku Kilete, ukuta uwuyape amadzwi agangiye mu lukombesoa lwa vafuuwa, nu kuvahaagula avavaha mu ndzenge dzonda ngita kye ndakulagiidze. 6 Umuvaha va lukombeso, iisakulwa avedzage muunu ye angaya lugomehedzo luluvedzaga. Avedzage mugoosi va mudala yumwinga,b avaana vaakwe vavedzage vafuuwa, vatanage ukuvedza vagalagala enewuli avasiikwidika. 7 Pakuva umwimiilidzi ye ápeeliilwe amalimo ga Nguluvi, iisakulwa avedzage muunu ye angaya lugomehedzo luluvedzaga. Atanage ukuvedza munya kidada, mupeefu va ligooga, mugaadzi, munya mabaatu, kangi atanage ukuvedza mudzandzi, ukuta iisavile imaale. 8 Nda haamu, avedzage musandzi ku vagendzi, ye iikeeledzwa ni nofu, umunya kwiwopa, mugolofu, mwimike kangi muwunge. 9 Avedzage munya kwinatila wunofu iMola iNofu ngita kye aawulaniidzwe, ukuta avedzage nu ludali ulwa kuvakangadza avaanu ni mbulanidzo dza ndakyene, nu kuvadwedza aviibeedza imbulanidzo idzo.
10 Ndiilonga idzo, pakuva koovali voloofu avasiikwidika, aviilonga amadzwi agangaya luwumbulilo, kangi vadzandzi, hiilo aVayahudi avafuuwa aviikangadza imivedzehedze gyawo gya wusinge.c 11 Avaanu avo vakaanidzwage ukuwulanidza, pakuva viikwananga ulufuuwo lwa vaanu mu nyumba ndzoloofu. Viiwulanidza amadzwi agasivagiye, ukuta vaanukile amagoobeli wugendela wa wudzandzi. 12 Nu muyaawo yumwinga viiwona ngita muvidzi, aalongile ukutigila, “Avakilete vadesi mbeepali, vakali ngita makooko ga mudaasi, valiya hiilo, kangi vagata.” 13 Uwoolesi uwu wa ndakyene. Wiimila wa ulo, uvakenyelage hiilo, ukuta vavedzage nu wumasimike mu lufuuwo. 14 Valekage ukupulikidza isimo dzaahela idza Vayahudi nambe ndagi dza vaanu aviikaana indakyene.
15 Ku vaanu avagolofu, ifiinu fyonda fívaliidzwe. Neke kangi ku vaanu avalamafu na avasiifuuwa, ifiinu fyonda lupumba, ndiweene amahoodzo gaawo nu lwikagulo lwawo, fímemile uwulamafu. 16 Viitigila vámudzeeliye uNguluvi, neke kangi mu migendele gyawo vakumukaana. Avo ve veene avakumuviifya uNguluvi, vagalusi, vasiivagila ukulima ulukaani lunofu nambe lumwinga.