Umusimbi va haate iyi asiikagulika. Avakoola va lidzwi lya Nguluvi viilonga ukutigila, umusimbi va haate iyi apangi ye mutume yumwinga ye aali nu wutawulilwe mu lukombeso. Lwiwoneka ukutigila, ihaate iyi yaasimbiilwe umusika itembeli iya wudzenge wa Yelusalemu pe yaali yisinaa yimamulwa, umwaka gwa makyumi mufungʼati (70), ukuhuma pe iiholwa uYesu Kilisiti. Umusimbi avasimbiye avafuuwa aVayahudi avaapumuswaga (10:32-34; 12:4), kangi vaagemywaga ukululeka ulufuuwo mwa Yesu (2:1; 4:14), nu kupiluka ku migendzehedze igya Vayahudi (9:10; 13:9). Vasalufikile ukutigila, uYesu ákwiliidze dzonda dze aahuuviidze uNguluvi mu lufingo ululovela.

Uwugulume wa musimbi waali wa kuwoneesa ukutigila, uNguluvi avapeeliye ingʼaasi imiya iya kumuhegelela, wugendela wa danda ya Yesu pe iitawuwe ukuvedza wusembe nyakamwinga swe (9:1–10:25). Akuvawulanidza ukutigila, uYesu ye muteepudzi va lufingo ulupiya, muteepudzi umukomi ukulutila vonda avamulonguwe, nde vavedze vanyamwandza, nde vavedze vavidzi, enewuli nde vavedze vateekedzi (1:1–7:28), pakuva umwene ye muteekedzi umuvina (8:1-13). Umusimbi akuvasimiilidzila ukutigila, viigugumidzage mu lufuuwo lwawo, akuviiwusa ngita avakuhwawo kye vaaginaga ukumufuuwa uNguluvi nu kwigugumidza, ngita uYesu yumwene. Akuvawulanidza ukutigila, uNguluvi akuvawunga avaana vaakwe ukumwidika nu kumupulikidza (10:32–12:29). Iimaliidza nu wulagidze mu migendele gyawo, nu kuvawunga kangi ulwa kitawiila imigendzehedze igya Vayahudi (13:1-25).