Ulutalamu ulwa kululeka ulufuuwo
6
1 Neke lino, tutanage ukusigala hela ni mbulanidzo idzo dze twiwulaniidze pa wutalilo ulwa Kilisiti, nda haamu, tuginage ukwiwulanidza nu kukula ukufikila pe twikangala mu lufuuwo. Tutanage ukwiwulanidza kangi ulwa kupela amalimo amaviifu agiileeta ifuwa, na ngita kye twamufuuviilwe uNguluvi. 2 Kangi tutanage ukupilukila ukwiwulanidza ulwa mbulanidzo idza ludzabiko, idza kuvaviikila amawoko avaanu, idza kudzulubuka ávafuwe ni dza lupedzo lwa mbeepali na mbeepali. 3 Ngana uNguluvi akeele, tuhadza twigina ukukula nu kukangala mu lufuuwo.4 Mu ulo, poovali avaanu avaawulaniidzwe indakyene ya Nguluvi, vágedziidze uluwonolo ukuhuma kukyanya, vávedzile nu luhangano mwa Mubepo uMwimike. 5 Kangi vágedziidze uwunofu wa lidzwi ilya Nguluvi, ni ngufu dzaakwe mu musika umupiya ugwa wutemi waakwe. 6 Avaanu avo, ngana viileka ukumufuuwa uNguluvi, lwilema ukuvapilusa vapele kangi, pakuva vakumutovelelela uMuswamuve va Nguluvi ulwa kavili pa kipindulihidzo nu kumuyeyewusa pa weelu. 7 Umuganga ugwinyuwa ululenga lwa ndoonya nu kukudza ifimelo ifinya luwumbulilo kwa mulimi, uNguluvi akugufuunyilila umuganga ugo. 8 Neke kangi umuganga ugwikudza imiifwa ni linya wuledzi, gusikumuwumbulila kikivedzaga umulimi, uNguluvi akugulekela ululeko. Uwusililo waakwe gwikodzwa mu mooto.
9 Nye vende veesuanye! Nde luvedze túvasimbiye mu madzwi amatalamu, twidzeela ukutigila, mwilima inofu idziiwoneesa ukutigila, múpokiilwe. 10 Pakuva uNguluvi munya wugolofu, asilaaseemwa amalimo geenyo manofu na kye múwoneesiidze uwende weenyo ukwakwe, wugendela wa kuvatanga aviifuuwa vayeenyo ukuvangila pa wutalilo ukufikila lino. 11 Twidoboka mbandu ukutigila, nayula umwenyo aginage ukuwoneesa mu wupifu uwende uwo ukufikila pa wusililo, ukuta mudzaanukile dzonda dze mukudzihuuvila. 12 Mutanage ukuvedza vagata, nda haamu, mwigage ku vaanu aviikwanukila fye avahuuviidze uNguluvi wugendela wa lufuuwo lwawo nu wisamutima.
Uluhuuvidzo lwa Nguluvi lwa ndakyene
13 Pakataali, uNguluvi pe amuhuuviidze uAbulahamu, iiyiigiye mu litaawa lyakwe yumwene, pakuva asaali kooyuli uyungi ye aali mukomi ukumulutila umwene. 14 UNguluvi aayiigile iitigilaga, “Ndakyene ndihadza ndikukufuunyilila, mu kipelela kyako avaanu vahadza viikooloka.”a 15 Ndeeni, uAbulahamu aadzindiye nu kwigugumidza ukufikila pe iikwanukila lula lwe aali áhuuviidzwe nu Nguluvi.
16 Ngana avaanu viiyiiga, vaaviyiigila mu litaawa lya mukomi yula ukulutila aveene, ukoolela ukutigila dzila idziilongwa dza ndakyene. Pa kulima ewo kwimala imbeedzi. 17 UNguluvi ooleliye uluhuuvidzo lwakwe wugendela wa kuyiiga, pakuva aasakaga avawoneese pa weelu avaanu avalaanukila inyuuvidzo dzaakwe ukutigila, uwugulume waakwe si wa kupituka-pituka. 18 UNguluvi atupeeliye inyuuvidzo dzaakwe nu luyiigo lwakwe. Ifiinu fivili ifyo fisiipituka, pakuva uNguluvi asiilonga wudesi. UNguluvi aalimile ifivili ifyo, ukuta tukangadzwe inumbula, uneefwe ye túmunyililiye nu kuumiilila uluhuuvilo lwe aaviikile kuwutalo ukwesu.
19 Uluhuuvilo ulo, lwe tuli nalo mu numbula, lukutwimidza sipi ngita nanga iyiikoleeledza imeli yitane ukupugwa ni livelo. Uluhuuvilo ulo, ye Yesu ye iingiye aPiimike pa Piimike kukyanya kugendela pa libupa lya mwenda. 20 UYesu atulonguwe ukwingila apo wiimila weesu. Umwene ávedzile Muteekedzi uMuvina mbeepali na mbeepali ngita kye aali uMelekisediki.