UKilisiti ye mwene ye akutulapangilila
2
1 Vaana vangu, ndikuvasimbila imola idzo ukuta mutanage ukulima indzanangifu. Neke kangi nde avedze umuunu iilima indzanangifu, tuli nave yumwinga ye akutulapangilila kwa Nguluvi uDadiisu. Uyo ye Yesu Kilisiti uMugolofu ye akutukengela. 2 Umwene we wusembe wiimila wa ndzanangifu dzeesu, nu wusembe waakwe wukututeepudza nu Nguluvi.a Asaalimile ewo ulwa ndzanangifu dzeesu hela, nda haamu, ni ndzanangifu dza vaanu vonda mwe naanyi.3 Ngana twikwidika indagi dza Nguluvi, apo twidzeela ukutigila, túmudzeeliye umwene. 4 Umuunu ye iitigila ámudzeeliye uNguluvi, neke kangi asikudziidika indagi dzaakwe, uyo mudesi, asiyidzeeliye indakyene. 5 Neke kangi umuunu ye avedzaga ye iikwidika ilidzwi lyakwe, lwiwoneesa ndakyene ukutigila, uwende wa muunu uyo kwa Nguluvi, wúkwiliye.b Ingʼaasi ya kudzeela ukutigila, tukwikala mugati mwa Nguluvi, ye iyi. 6 Umuunu ye iitigila akwikala mugati mwa Nguluvi, iisakulwa ukugendela imigendele giigila gye aagendelaga uYesu.
Ululagi lwa Yesu ulwa kwiyenda
7 Nye vende vanguanye! Ululagi lwe ndikuvasimbila si lupiya, nda haamu, lwe lulagi luulula ululovela lwe mwali nalo pe mwavangile ukufuuwa. Ululagi ulwa kataali ulo, lye lidzwi ilya kwiyenda lye mwalipuliike. 8 Neke kangi ku lubali ulungi, ululagi lwe ndikuvasimbila, lwe lulagi lupiya,c kangi indakyene ya lulagi lwa wende ulo, yiiwoneka mugati mwa Kilisiti na mugati umwenyo, pakuva ikiisi kívangile ukuhega nu lumuli lwa ndakyene lwimulika.
9 Umuunu ye iilonga ukutigila akwikala mu lumuli, kuno akumuviifya umufuuwa muyagwe, uyo apila akwikala mu kiisi. 10 Umuunu ye akumwenda umufuuwa muyagwe, akwikala mu lumuli. Sikookili kikivedzaga mugati umwakwe ikikumuhulila ukulima indzanangifu. 11 Neke kangi umuunu ye akumuviifya umufuuwa umuyagwe, ali mu kiisi. Iigenda mu kiisi kitadzeela kwe iihelela, pakuva ikiisi kíbofwidze amiiho gaakwe.
12 Ndikuvasimbila unyeenye vaana vadebe,
pakuva indzanangifu dzeenyo dzíwodziidzwe mu litaawa lya Yesu Kilisiti.
13 Ndikuvasimbila unyeenye vamwadaada,
pakuva múmudzeeliye uYesu Kilisiti,
ye aali pwali ukuhumila pe lisinaa ligawa ilidugulu.
Ndikuvasimbila unyeenye vavinano,
pakuva múmudwedziidze uSetano.
Ndikuvasimbila unyeenye vaana,
pakuva múmudzeeliye uDaada.
14 Ndikuvasimbila unyeenye vamwadaada,
pakuva múmudzeeliye uYesu Kilisiti,
ye aali pwali ukuhumila pe lisinaa ligawa ilidugulu.
Ndikuvasimbila unyeenye vavinano,
pakuva muli ni ngufu,
mukuliinatila ilidzwi lya Nguluvi,
kangi múmudwedziidze uSetano.
15 Lino mutanage ukuyeenda inyi iyi, enewuli amadzwi agali umo. Ngana umuunu akuyeenda inyi, uyo asikumwenda uDaada. 16 Uwuhosi wa nyi we uwu: uwudobofu uwuviifu wa muvili, uwudobofu wa miiho, ukutigila vavedzage ni fiinu fyonda fye vakufiwona, nu lwinunumulo wiimila wa fiinu fye vali nafyo. Fyonda ifyo fisiihuma kwa Nguluvi uDaada, nda haamu, fiihuma mwe naanyi umu. 17 Inyi pamwinga nu wudobofu waakwe uwuviifu, fiihelanidza. Neke kangi umuunu ye iilima imikeelelele gya Nguluvi, iivedza muumi mbeepali.
Ukwikala miiho na vabeedza-Kilisiti
18 Vaana vangu, ifigono fya wusililo fífikile! Múpuliike ukutigila, umubeedza-Kilisiti iikwadza, na liilino avabeedza-Kilisiti voloofu poovali. Ndeeni, twidzeela ukutigila, tuli mu figono fya wusililo. 19 Avaanu avo váhumile umwesu, neke kangi vasili luhangano lwa ndakyene naafwe. Pakuva, ngana vakali vavedzage vali luhangano lwa ndakyene naafwe, ngali vásigiye muumu. Neke kangi váhegile ukuta luwoneke pa weelu ukutigila, vonda vasili mihanganile naafwe.
20 Nda haamu, uNguluvi ávapeeliye unyeenye uMubepo uMwimike,d lino nyivonda múyidzeeliye indakyene. 21 Ndikuvasimbila ihaate iyi, si pakuva musiyidzeeliye indakyene, nda haamu, pakuva múyidzeeliye. Kangi ndikuvasimbila, pakuva mwidzeela ukutigila, uwudesi wuwuvedzaga wusiihuma mu ndakyene. 22 Umuunu mudesi ye ani? Ye uyo ye iitigila uYesu siye Mesiya.e Umuunu ngita uyo, ye mwene umubeedza-Kilisiti, akumukaana uNguluvi uDaada nu Muswamuve. 23 Ye avedzaga ye akumukaana uMuswamuve, uyo asili luhangano nu Daada. Neke kangi ye avedzaga ye iilonga pa weelu ukutigila, akumufuuwa uMuswamuve, uyo ali luhangano nu Daada.
24 Lino unyeenye, amadzwi gala ge mwapuliike ukuhuma pa wutalilo pe twavadalikiye iMola iNofu, gasigalage mu numbula dzeenyo. Ngana amadzwi ago giisigala mu numbula dzeenyo, apo na yuunye muhadza mwigina ukusigala mwa Daada nu Muswamuve. 25 Idzo dze dzeene dze atuhuuviidze uMuswamuve, kwe kutigila uwuumi uwa mbeepali.
26 Ndikuvasimbila amadzwi ago ukuvawunga ulwa vaanu avo aviisaka ukuvaheniya. 27 Neke kangi uNguluvi ávapeeliye uMubepo uMwimike, ye akwikala mugati umwenyo. Uyo ye mwene ye iiwulanidza dzonda, imbulanidzo dzaakwe dza ndakyene, si dza wudesi.f Lwe lwene, lusiisakulwa umuunu uyungi avawulanidze. Ngita kye avawulaniidze uMubepo uMwimike, lino musigalage mugati mwa Kilisiti.
Ukwikala ngita vaana va Nguluvi
28 Lino vaana vangu, musigalage mugati mwa Kilisiti, ukuta umusika pe iipiluka kangi, tukavedze vakangafu na vangaya nyoni pa miiho gaakwe.
29 Pakuva mwidzeela ukutigila uKilisiti mugolofu, muludzeelage ukutigila, ye avedzaga ye iilima ingolofu, uyo ye mwana va Nguluvi.