Ihaate iyi yaasimbiilwe nu mutume Yohana. Akwitambudza ngita muvaha va lukombeso kitatambula ilitaawa lyakwe. Uyo ye musimbi va Mola iNofu ya Yesu Kilisiti, kangi ihaate iya kutala ni ya kadatu iyiitambulwa mu litaawa lyakwe pamwinga nu Luvilatulo lwa Yesu Kilisiti. Amadzwi agali mu haate ya Yohana iya kavili, giihwanana hiilo na gala agali mu Mola iNofu ya Yesu Kilisiti, hiilo pe iisimiilidza ululagi lwa Yesu ulwa kwiyenda, na kye iihwananidza ukumwenda uYesu nu kudzininiila indagi dzaakwe (5-6; Yohana 15:9-10). Ihaate iyi yaasimbiilwe ngita umwaka gwa makyumi ligondza (90), ukuhuma pe iiholwa uYesu Kilisiti.

UYohana aasimbile ihaate iyi kwa mwayuuva umuhaagulwa pamwinga na vaana vaakwe. Mu madzwi ago, aalongaga ulwa lukombeso. Aasimbile ihaate iyi wiimila wa vafuuwa vonda. Uwugulume wa Yohana uwa kusimba ihaate iyi waali wa kuvakangadza inumbula avaanu mu lukombeso, kangi ukuvawunga wiimila wa vawulanidzi va wudesi kye vavoogofyaga.