Ihaate ya kutala ya
Yohana
Ilidzwi ilya wuumi
1
1 Tukuvadalikila imola dza uyo ye ali Lidzwi lya wuumi, ye aali pwali ukuhumila pe lisinaa ligawa ilidugulu.a Uneefwe twamupuliike nu kumuwona na miiho geesu yuufwe, twamulolaga nu kumupamya na mawoko geesu. 2 Uyo ye wuumi, aawoniike, na yuufwe twamuweene. Lino tukuvoolela nu kuvadalikila imola dza uyo ye akutupeela uwuumi uwa mbeepali, ye aali kwa Nguluvi uDadiisu, iiwonekaga ukwesu.b 3 Tukuvadalikila dze túdziweene nu kupulika, ukuta uluhangano lwe tuli nalo nu Nguluvi uDadiisu nu Muswamuve uYesu Kilisiti, unyeenye ndeeni muvedzage nu luhangano luulo pamwinga naafwe. 4 Tukuvasimbila idzi, ukuta ulukeelo lwesu lukwile.Ukugenda mu lumuli
5 Kuli lidzwi lye twapuliike kwa Yesu, lye lyene lye tukuvadalikila unyeenye ukutigila, uNguluvi munofu ngita lumuli, kangi mugati umwakwe mwahela wuhosi wuwuvedzaga ngita ikiisi kikivedzaga ikisili mu lumuli. 6 Lino, ngana twitigila tuli nu luhangano nu Nguluvi, kuno tupigina ukugendela imiikalile igya wuhosi, apo twilonga wudesi, kangi tusiigendela ulwa ndakyene. 7 Neke kangi, ngana tukwikala mu lumuli, ngita uNguluvi kye ali mu lumuli, apo twivedza nu luhangano yuufwe mwa yuufwe, ni danda ya Yesu uMuswamuve, yikutuvaladza indzanangifu dzeesu dzonda.
8 Lino, ngana twitigila tungaya ndzanangifu, tukwidzanga yuufwe, kwe kutigila tusiyidzeeliye indakyene. 9 Neke kangi, ngana twikwidika ukutigila, túlimile indzanangifu nu kupela, apo uNguluvi akutuwodzehedza indzanangifu nu kutuvaladza uwuviifu wonda, pakuva umwene ye muhuuvilwa kangi mugolofu. 10 Ngana twitigila, tusilimile indzanangifu, tukumuhambula uNguluvi ukutigila mudesi, kangi ilidzwi lyakwe mwahela mugati umwesu.