Ukugikagula imilekanile mu dza wudesi ni dza ndakyene
4
1 Nye vende vanguanye! Pakuva avavidzi voloofu va wudesi váhumiye mwe naanyi, mutanage ukumufuuwa umuunu ye avedzaga ye iitigila, ali nu Mubepo va Nguluvi. Nda haamu, mulolage wunofu ngana umuunu uyo iilongodzwa nu Mubepo va Nguluvi enewuli nambi. 2 Ingʼaasi ya kukagula ukutigila, umuunu iilongodzwa nu Mubepo va Nguluvi ye iyi. Ye avedzaga ye iilonga pa weelu ukutigila, uYesu Kilisiti aadzile mwe naanyi, iivedzaga nu muvili gwa wumuunu, uyo ye mwene ye iilongodzwa nu Mubepo va Nguluvi. 3 Neke kangi umuunu ye avedzaga ye asiilonga pa weelu ukutigila, uYesu ye Kilisiti, uyo asiilongodzwa nu Mubepo va Nguluvi. Umuunu uyo, iilongodzwa nu mubepo va mubeedza-Kilisiti. Na yuunye, múpuliike ukutigila, umubeedza-Kilisiti uyo iikwadza, lino áadzile ali mwe naanyi.4 Neke kangi vaana vanguanye, unyeenye muli vaanu va Nguluvi, múvadelwidze avavidzi va wudesi avo wiimila wa Mubepo vaakwe ye agenda mugati umwenyo, pakuva uyo ali ni ngufu ukulutila uSetano ye iitema avaanu mwe naanyi. 5 Avavidzi va wudesi avo ve veene va mwe naanyi, amadzwi gaawo giihuma mu mahoodzo ga mwe naanyi, kangi avaanu va umo vakuvapulikidza aveene. 6 Neke kangi uneefwe tuli vaanu va Nguluvi. Umuunu ye ámudzeeliye uNguluvi, akutupulikidza, umuunu ye asili va Nguluvi, asikutupulikidza uneefwe.
Ndeeni luli ewo, twikagula imilekanile gya vaanu aviilongodzwa nu Mubepo ye iivilatula indakyene, ni gya vala aviilongodzwa nu mubepo va wudesi.
Uwende wa Nguluvi
7 Nye vende vanguanye, twiyendage! Pakuva uwende wiihuma kwa Nguluvi. Umuunu ye avedzaga ye akuveenda avayagwe, uyo ye mwana va Nguluvi, kangi ámudzeeliye uNguluvi. 8 Neke kangi umuunu ye asikuveenda avayagwe, asimudzeeliye uNguluvi, pakuva uNguluvi ye wende. 9 UNguluvi yumwene atuwoneesiidze uwende waakwe wugendela wa kumutuma uMuswamuve uMunyakimwinga pe naanyi apa, ukuta twanukile uwuumi wugendela mwa mwene. 10 Uwu we wende, si kutigila ye neefwe ye twatalile ukumwenda uNguluvi, nda haamu, umwene ye mwene ye aatalile ukutwenda uneefwe. Lwe lwene lwe amutumile uMuswamuve, ukuta avedzage wusembe wa kututeepula nu Nguluvi wugendela wa kuwodza indzanangifu dzeesu.
11 Nye vende vanguanye! Pakuva uNguluvi atwendile uneefwe ewo, apo na yuufwe twisakulwa ukwiyenda. 12 Sikwali umuunu ye avedzaga ye amuweene uNguluvi. Neke kangi, ngana tukwiyenda, lwiwoneka ukutigila uNguluvi akwikala mugati umwesu, kangi ákwiliidze uwende waakwe mugati umwesu.
13 Twidzeela ukutigila, tukwikala mugati mwa Nguluvi, uNguluvi nave akwikala mugati umwesu, pakuva átupeeliye uMubepo vaakwe. 14 Uneefwe túlolile nu koolela ku vangi ukutigila, uNguluvi uDaada ámutumile uMuswamuve pe naanyi, ukuta avedze Mupoki va vaanu vonda. 15 Umuunu ye avedzaga ye iilonga pa weelu ukutigila, uYesu ye Muswamuve va Nguluvi, uNguluvi akwikala mugati umwakwe, nave akwikala mugati mwa Nguluvi. 16 Lino, uneefwe twidzeela nu kufuuwa ukutigila, uNguluvi akutwenda.
UNguluvi ye wende, ye avedzaga ye iigina ukwikala mu wende, uyo akwikala mugati mwa Nguluvi, uNguluvi nave akwikala mugati umwakwe. 17 Wugendela uwo, uNguluvi ákwiliidze uwende waakwe mugati umwesu, ukuta tuvedze nu wukangafu pa kigono ikya luhigo. Tuli nu wukangafu, pakuva mu nyi iyi twigendela ndawuli uYesu kye aagendelaga. 18 Uwende ngita uwo wungaya kyoga, pakuva uwende we aakwiliidze uNguluvi mugati umwesu, wiihedzehedza ngʼaani ikyoga kya luhigo. Ngana umuunu ali ni kyoga kya kupedzwa, lwiwoneesa uwende wa Nguluvi wusinaa wukwila mugati umwakwe.
19 Uneefwe twikwenda, pakuva uNguluvi yumwene aatalile ukutwenda. 20 Ngana umuunu iitigila, akumwenda uNguluvi, kuno akumusuula umufuuwa muyagwe, uyo mudesi, pakuva ye asikumwenda umufuuwa muyagwe ye akumuwona, apo iilemwa ukumwenda uNguluvi ye asikumuwona. 21 UNguluvi atupeeliye ululagi ukutigila, umuunu ye avedzaga ye akumwenda uNguluvi, apo amwendage nayu mufuuwa muyagwe.a