Ulufuuwo mwa Yesu Kilisiti
5
1 Umuunu ye avedzaga ye iifuuwa ukutigila, uYesu ye Mesiya, uyo ye mwene ye áholiilwe ukuhuma kwa Nguluvi. Umuunu ye avedzaga ye akumwenda umuvegadzi, akumwenda nayu mwana va muvegadzi uyo. 2 Ingʼaasi ye twidzeelelela ukutigila, tukuveenda avaana va Nguluvi ye iyi, wugendela wa kumwenda uNguluvi, nu kudziidika indagi dzaakwe. 3 Ukumwenda uNguluvi kwe kwene ukudziidika indagi dzaakwe, kangi indagi dzaakwe si nalamu ukudziidika, 4 pakuva ye avedzaga ye áholiilwe ukuhuma kwa Nguluvi, iideludza ingʼaani dza mwe naanyi. Uwudeludzi weesu uwa dza mwe naanyi, wiiwonekela mu lufuuwo lwesu. 5 Ye ani ye iideludza idza mwe naanyi? Ye yula ye iifuuwa ukutigila, uYesu ye Muswamuve va Nguluvi.Uwoolesi wiimila wa Yesu Kilisiti
6 Umwana uyo ye aadzile wugendela wa lulenga ni danda,a ye Yesu Kilisiti. Ndeeni, atuwoneesiidze ukutigila, umwene ye Muswamuve va Nguluvi.b Asatuwoneesiidze idzo wugendela wa lulenga hela, nda haamu, wugendela wa lulenga ni danda. 7 Nayu Mubepo uMwimike akutoolela ukutigila, idzo dza ndakyene, pakuva uMubepo uMwimike ye ndakyene.c 8 Lino kuli vadatu aviikoolela uwoolesi wa Yesu [kukyanya, uDaada, uLidzwi nu Mubepo uMwimike, na vadatu avo viikwidiingʼana. 9 Neke kuli vadatu aviikoolela mwe naanyi],d uMubepo uMwimike, ululenga ni danda, na vadatu avo viikwidiingʼana. Ngana tukuwufuuwa uwoolesi wa vaanu, uwoolesi wa Nguluvi we wukomi kulutila, pakuva uwo we woolesi wa Nguluvi we ooleliye wiimila wa Muswamuve.
10 Umuunu ye akumufuuwa uYesu ukutigila, Muswamuve va Nguluvi, uyo iikwidika nu kwinatila uwoolesi wa Nguluvi uwo. Neke kangi ye asikumufuuwa uNguluvi, ámuhambwise uNguluvi ukutigila mudesi, pakuva asinaa awufuuwa uwoolesi we aatawuwe uNguluvi wiimila wa Muswamuve. 11 Uwoolesi uwo we uwu. UNguluvi átupeeliye uwuumi uwa mbeepali. Uwuumi uwo, twánukiye wugendela mwa Muswamuve. 12 Umuunu ye akwikala mugati mwa Muswamuve va Nguluvi, ali nu wuumi uwo. Neke kangi ye asikwikala mugati mwa Muswamuve va Nguluvi, angaya wuumi uwo.
Uwuumi uwa mbeepali
13 Ndikuvasimbila amadzwi ago, unyeenye ye mwifuuwa ilitaawa lya Muswamuve va Nguluvi, ukuta mudzeele ukutigila, muli nu wuumi uwa mbeepali. 14 Tuli nu wukangafu pa miiho ga Nguluvi, pakuva twidzeela ukutigila, akutupulika ngana twilapangila luluvedzaga mu mikeelelele gyakwe. 15 Ngana twidzeela ukutigila, akutupulika mu luluvedzaga lwe twilapangila, twidzeela ukutigila, akutupeela fyonda fye twilapangila.
16 Koodzili indzanangifu idzisikumubaagula umuunu nu Nguluvi mbeepali na mbeepali. Ngana umuunu akumuwona umufuuwa muyagwe iilima indzanangifu ngita idzo, alapangilage kwa Nguluvi, ukuta amupeele uwuumi uwa mbeepali. Neke kangi kooyili indzanangifu iyikumubaagula umuunu nu Nguluvi mbeepali na mbeepali. Uneene sindiilonga ukutigila, amulapangililage kwa Nguluvi wiimila wa ndzanangifu iyo. 17 Amalimo gonda ga wuhosi dze ndzanangifu pa miiho ga Nguluvi. Neke kangi pamwinga na ulo, kuli ndzanangifu idzisikumuhulila umuunu abaagulwe nu Nguluvi.
18 Twidzeela ukutigila, umuunu ye avedzaga ye áholiilwe ukuhuma kwa Nguluvi, asiigina ukulima indzanangifu, pakuva uMuswamuve va Nguluvi akumuloleela, nayu Setano iilemwa ukumulemadza.e 19 Kangi twidzeela ukutigila, uneefwe tuli vaana va Nguluvi na vaanu avangi vonda mwe naanyi viilongodzwa nu Setano. 20 Napo kangi twidzeela ukutigila, uMuswamuve va Nguluvi aadzile, atupeeliye uluhala ukuta tumudzeelage uNguluvi va ndakyene. Apo tuli mugati mwa Nguluvi va ndakyene, wugendela wa kuvedza mugati mwa Muswamuve uYesu Kilisiti. Uyu ye Nguluvi va ndakyene, kangi ye kiwumbuko kya wuumi uwa mbeepali.
21 Vaana vangu, mwigelage, mutanage ukwifuunya ku fihwananguluvi.f