Ihaate ya kavili ya
Yohana
Uluhungilo
1
1 Uneene muvaha va lukombeso,a ndikukusimbila uveeve mwayuuva muhaagulwa, pamwinga na vaana vaakob ve ndikuveenda mu ndakyene. Si yuune ndimwene ye ndikuveenda, nda haamu, na vangi vonda ávayidzeeliye indakyene, navo vakuveenda unyeenye, 2 pakuva túyidzeeliye indakyene iyikwikala mugati umwesu, kangi iyiigina ukuvedza naafwe mbeepali.3 Ulusungu, ulupyana nu lutengamaso ukuhuma kwa Nguluvi uDaada nu kwa Muswamuve uYesu Kilisiti, fihadza fiivedza naafwe mu ndakyene na mu wende.
Indakyene nu wende
4 Ndaakeeliye hiilo, pe ndaapuliike ukutigila, avaana vaako vamwinga vakwikala mu ndakyene, ngita uNguluvi uDaada kye atulagiidze. 5 Neke kangi lino, uveeve yuuva mwende, ndikukunyilika ukutigila, twiyendage twe vafuuwa vonda. Ululagi ulu lwe ndikuvasimbila si lupiya, nda haamu, lwe lulagi lwe twali nalo ukuvangila pe twafuuviilwe.c 6 Uwu we wende, ukutigila twikalage pa kudziidika indagi dza Nguluvi. Mwapuliike ululagi ulo ukuhuma pe mwavangile ukufuuwa, ukutigila mwiyendage.
Indagiilidzo wiimila wa vabeedza-Kilisiti
7 Ndiilonga ewo, pakuva avadzandzi voloofu váhumiye mwe naanyi, avasiifuuwa kangi vasiidzova pa weelu ukutigila, uYesu Kilisiti aadzile mwe naanyi, iivedzaga nu muvili gwa wumuunu. Umuunu ye iilonga ewo, uyo ye mudzandzi kangi mubeedza-Kilisiti. 8 Lino mwiyangalilage navo, ukuta amalimo ge múlimile gatane ukuyaga hela, kangi uNguluvi avawonolage. 9 Umuunu ye avedzaga ye asiikwinatila imbulanidzo dza Kilisiti, kangi iikoongeledza idziiluwa ni ndakyene iyo, uyo asikwikala mugati mwa Nguluvi. Neke kangi umuunu ye avedzaga ye iikwinatila imbulanidzo dza Kilisiti, uyo akwikala mugati mwa Daada nu Muswamuve. 10 Ngana umuunu iikwadza ukwenyo kuwulanidza imbulanidzo idziiluwa ni ndakyene, mutanage ukumwanukila nambe kumulaalika mu nyumba dzeenyo, 11 pakuva ye avedzaga ye akumwanukila umuunu ngita uyo, iihanga mu malimo gaakwe ga wuhosi.
Amadzwi ga wusililo
12 Ndili na madzwi goloofu ge ndikiisakaga ukuvalongela. Neke kangi ndilema ukusimba ago mu kalataasi, pakuva ndiihuuvila ukwadza ukwenyo tulongane mulomo nu mulomo, ukuta ulukeelo lwesu lukwile.
13 Avaana va muhaadzawo umuhaagulwa, vakukuhungila.