Ihaate ku lukombeso lwa Efeso
2
1 Umuunu uyo ye aali ngita Muswamuve va Muunu, iiginaga ukuundongela iitigilaga, “Umusimbile umunyamwandza va lukombesoa lwa Efeso ukutigila,Aga ge madzwi ga mwene ye íibiite inondwe mufungʼati (7) mu liwoko lyakwe ilya kundiyo, ye iigenda pagati pa finenevekelo mufungʼati ifya sahabu fya kuviikila imuli.
2 Ndígadzeeliye amalimo geenyo, uwupifu weenyo nu lwigugumidzo lwenyo wiimila wangu. Kangi ndiidzeela ukutigila, musiikwidiingʼana na vaanu avahosi. Mwavagelile avakwikemeela vatume humbe nambi, mwidzeelaga ukutigila, vaali va wudesi. 3 Mwígugumiidze nu kwikangadza kitaduma enewuli kudendewuka wiimila wangu.
4 Napo kangi, ndili ni lidzwi lye sindiikwidiingʼana naanye. Nalyo lye ili, múwulekile uwende we mwali nawo ukwangu pa kutala. 5 Mwiwukage dze mwalimaga apo pa wutalilo wa kufuuwa kwenyo. Mupele, mulimage dzila dze mwalimaga pa kutala. Ngana simwipela, ndiikwadza mu kuhedza ikinenevekelo kyenyo ikya kuviikila ulumuli pe kigenda. 6 Neke kangi kuli kiinu kimwinga kye mwilima wunofu. Mukugaviipila amalimo ga Vanikolayib ndawuli na yuune kye ndikugaviipila.
7 Ye ali na masiikidza, apulikage idzo dze iilonga uMubepo uMwimike ku ngʼombeso. Umuunu ye avedzaga ye iideludza uwuhosi, ndilamupeela ukuliya ifiveleko fya mubiki gwa wuumi mugati mu Paladisoc ya Nguluvi.”
Ihaate ku lukombeso lwa Similina
8 Umuunu uyo ye aali ngita Muswamuve va Muunu, iiginaga ukuundongela iitigilaga, “Umusimbile umunyamwandza va lukombeso lwa Similina ukutigila,
Aga ge madzwi ga mwene ye ali va kutala nu va wusililo, kangi ye aafuwe nu kudzulubuka, lino ali muumi!
9 Ndídzidzeeliye imumuko dzeenyo nu wuhangala weenyo. Napo kangi ndakyene unyeenye muli vamosi! Kangi ndiidzeela kye mwiligwa na avo avakwitambula Vayahudi. Humbe nambi, nda haamu, avo vaniniilidzi va Setano. 10 Mutanage ukoogopa imumuko idzikuvaadzila. Mupulikidzage! USetano ahadza akuvahulila avayeenyo avangi ukudindilwa mu ndinde, ukuta avapeele ingemyo. Muhadza mwipumuka ifigono likyumi limwinga (10). Mwinatilage ulufuuwo lwenyo nde kuvedze kufuwa, uneene ndilavapeela ingeela, ye yeene ye wuumi uwa mbeepali.
11 Ye ali na masiikidza, apulikage idzo dze iilonga uMubepo uMwimike ku ngʼombeso. Umuunu ye avedzaga ye iideludza uwuhosi, asilaalemadzwa nambe padebe nu mooto ugusiidzima mbeepali. Umooto ugo ye fuwa ya kavili.”d
Ihaate ku lukombeso lwa Peligamo
12 Umuunu uyo ye aali ngita Muswamuve va Muunu, iiginaga ukuundongela iitigilaga, “Umusimbile umunyamwandza va lukombeso lwa Peligamo ukutigila,
Aga ge madzwi ga mwene ye ali ni lipanga ilinya wuugi imbali dzonda dzivili.
13 Ndípadzeeliye pe mukwikala, apo pe iitema uSetano. Napo kangi mwikuumiilila wunofu ilitaawa lyangu, nambe musika gula umoolesi vangu uAndipasi muhuuvilwa, ye aakomiilwe ku wudzenge weenyo pe akwikala uSetano, musakaanile ukuufuuwa uneene.
14 Napo kangi, ndili na madzwi makeefu ge sindiikwidiingʼana naanye. Moovali avangi umwenyo aviininiila imbulanidzo dza Balamu. Uyo, amuwulaniidze uBalaki avategedze aVaisilaheli, ukuta valime indzanangifu pa kuliya ifyakuliya ifyateekeliilwe ku fihwananguluvi, nu kulima uwugoni.e 15 Ndeeni, moovali avangi umwenyo aviininiila imbulanidzo dza Vanikolayi. 16 Lino mupelage! Ngana simwipela, ndiikwadza kisaatu ukuta ndihomane na vaanu avo, ni lipanga iliihuma mu mulomo gwangu.
17 Ye ali na masiikidza, apulikage idzo dze iilonga uMubepo uMwimike ku ngʼombeso. Umuunu ye avedzaga ye iideludza uwuhosi, ndilamupeela imana iyaafihiilwe.f Kangi ndilamupeela iliganga ilivalafu ililaavedza lísimbiilwe ilitaawa lipiya. Sikwali umuunu ye akulidzeela ilitaawa ilyo, yumwene swe ye akulyanukila iliganga lila.”
Ihaate ku lukombeso lwa Tyatila
18 Umuunu uyo ye aali ngita Muswamuve va Muunu, iiginaga ukuundongela iitigilaga, “Umusimbile umunyamwandza va lukombeso lwa Tyatila ukutigila,
Amadzwi aga iilonga uMuswamuve va Nguluvi, ye ali na miiho ngita lulambo lwa mooto, na magulu agiingʼalita ngita madini ga saba íyivaliidzwe nu mooto.
19 Ndígadzeeliye amalimo geenyo. Ndíwudzeeliye uwende weenyo, ulufuuwo lwenyo, uwulimila-vangi weenyo, nu lwigugumidzo lwenyo. Kangi ndikuvawona unyeenye ukutigila, lino mwilima wunofu hiilo ukulutila pa kutala. 20 Napo kangi ndili ni lidzwi lye sindiikwidiingʼana naanye. Mwikwidika imbulanidzo dza Yesebeli,g umwayuuva uyo ye akwitambudza muvidzi. Uyo akuvadzanga avatovela-ligendwa vangu valimage uwugoni, nu kuliya ifyakuliya ifyateekeliilwe ku fihwananguluvi. 21 Ndímupeeliye umusika gwa kupela indzanangifu dzaakwe, neke kangi alema ukuwuleka uwugoni waakwe. 22 Mupulikidzage! Wiimila wa ulo, ndihadza ndikumupeela uwutamwa, ukuta apumuke pa wulili. Na vonda aviilima nave uwudumuli-noolane, ndihadza ndikuvapeela imumuko ngʼali hiilo, ngana vasiipela uwuhosi we viilima nave. 23 Kangi ndihadza ndikuvakoma vonda avakumuniniila. Apo pe peene avaanu va ngʼombeso dzonda pe valaadzeela ukutigila, uneene ndiikomandza inumbula na mahoodzo ga muunu yumwinga yumwinga. Kangi ndilamuhomba nayula umwenyo ukulingʼaana na malimo gaakwe.
24 Lino poovali avangi umwenyo mu Tyatila avasiininiila imbulanidzo dza Yesebeli uyo. Kangi vasinaa viiwulanidza idzo dze viitigila, ifinyele fya mugati. Ndakyene ifinyele ifyo dze mbulanidzo dza Setano! Ndikuvalongela unyeenye ukutigila, sindivatwika ikitegulo kingi. 25 Nda haamu, ndikuvalongela ukutigila, musigalage ukuufuuwa uneene ukufikila pe ndiikwadza.
26 Umuunu ye avedzaga ye iideludza uwuhosi nu kugina ukulima imikeelelele gyangu ukufikila uwusililo,
‘Ndilamupeela uwutawulilwe wa kutema avaanu va nyi dzonda.
27 Umwene alaatema avaanu wugendela wa musagi gwa kyuma,
alavahangʼanyula ndawuli fiviya fya lilongo.’h
Umuunu ye avedzaga ye iideludza uwuhosi, alaapeelwa uwutawulilwe ngita kye ndaanukiye ukuhuma kwa Daada. 28 Kangi ndilamupeela ulutondwe lwa pa nyavambula.i
29 Ye ali na masiikidza, apulikage idzo dze iilonga uMubepo uMwimike ku ngʼombeso.”