Luvilatulo
lwa Yesu Kilisiti kwa Yohana
Uwoolesi wa kitabu iki
1
1 Ulu lwe luvilatulo lwa Yesu Kilisiti lwe aapeeliilwe nu Nguluvi, ukuta avawoneese avatovela-ligendwa vaakwe amadzwi agiisakulwa gahumile umusika mukeefu ugwikwadza. UYesu nave amuwoneesiidze umutovela-ligendwa vaakwe uYohana uluvilatulo ulo wugendela wa munyamwandza va Nguluvi. 2 UYohana ooleliye dzonda dze adziweene. Uwo we woolesi wa Yesu Kilisiti, kangi lye lidzwi ilya Nguluvi.3 Lino áfuunyiliilwe umuunu ye akuviimbila avangi amadzwi ga wuvidzi ágasimbiilwe umu. Kangi váfuunyiliilwe avakugapulikidza nu kugiidika, pakuva umusika gwa kuhumila amadzwi ago gúhegeliye.
Uluhungilo
4 Ihaate iyi yíhumile ukwangu neene nde Yohana. Ndívasimbiye avafuuwa va Yesu va ngʼombeso mufungʼati (7) idzili mu nyi ya Asya.
Ulusungu nu lutengamaso fivedzage naanye ukuhuma kwa Nguluvi, umwene ye aali pwali, ye ali pwali, na ye iikwadza, kangi ukuhuma kwa Mibepo mufungʼatia igigenda pawutalo pa kideego kyakwe kya wutwa, 5 nu kuhuma kwa Yesu Kilisiti. Uyo ye mwene umoolesi va ndakyene va Nguluvi. Aali va kutala ukudzulubuka ukuhuma ku wulungu, kangi ye Mutwa va vatwa vonda mu nyi.
UYesu ye mwene akutwenda, kangi átwawuwe ukuhuma mu ndzanangifu dzeesu wugendela wa danda yaakwe. 6 Átuhambwise tuvedzage wutwa waakwe na vateekedzi,b ukuta tumutovelage iligendwa uNguluvi uDaadiye. Indolo ni ngufu fivedzage ukwakwe uYesu mbeepali na mbeepali! Eena.
7 “Lolage! Iikwadza na mafunde!”c
Kangi, “Avaanu vonda valamuwona,
nava vaanu vala avamuhomile, navo valamuwona.
Ifipelela fyonda mu nyi filaavemba wiimila waakwe.”d
Luvedzage ewo! Eena.
8 UMutwa Nguluvi iitigila, “Uneene ye Alufwa nu Omega.e Ndaali pwali, ndili pwali, ye ndiikwadza, kangi ye Munya Ngufu Dzonda.”
UYohana akumuwona uYesu mu kiwoneko
9 Uneene Yohana mufuuwa muyeenyo. Ndiihanga naanye mu wutwa wa Nguluvi, na mu mumuko pamwinga nu lwigugumidzo wiimila wa kumuniniila uYesu. Ndaadindiilwe ku ligunguli iliitambulwa Patimo wiimila wa kudalika ilidzwi lya Nguluvi nu woolesi wa Yesu. 10 Ikigono kimwinga ikya Mutwa,f pe ndímemiidzwe uMubepo uMwimike, ndiipulikaga isawuti ngomi ngita ya lukwalimba kumbele ukwangu. 11 Isawuti iyo yiitigilaga, “Usimbe mu haate amadzwi gonda ge ukugawona, utume ku ngʼombeso mufungʼati idzili mu ndzenge dza Efeso, Similina, Peligamo, Tyatila, Salidi, Filadelifya ni Lawodikya.”
12 Neke ndiseedukage, ndilole uyo ye iilonga naane. Pe ndíseedwike, ndikufiwonaga ifinenevekelo mufungʼati fya sahabu fya kuviikila imuli. 13 Pagatinagati pa finenevekelo fya muli ifyo, ndikumuwonaga umuunu yumwinga ngita Muswamuve va Muunu,g áfwalile umwingila mutaali ukufikila mu ndzayo nu mukandalo gwa sahabu pa mambaga. 14 Umutuwe ni fwili dzaakwe fyali fivalafu ngita lwage lwa ngʼolo imbalafu, kangi ngita maseve mavalafu hiilo. Amiiho gaakwe gaali ngita lulambo lwa mooto. 15 Amagulu gaakwe gaangʼalitaga hiilo ngita madini ga saba íyivaliidzwe nu mooto. Isawuti yaakwe yaali ngita lihaata lya lulenga loloofu. 16 Mu liwoko lyakwe ilya kundiyo aakoleeliye inondwe mufungʼati, na mu mulomo gwakwe lyahumaga ilipanga linya wuugi imbali dzonda dzivili. Ku miiho kwakwe kwangʼalitaga ndawuli lidzuwa likali.
17 Pe ndamuweene, ndikwigwisaga pa magulu gaakwe ngita ndífuwe. Neke aviike iliwoko lyakwe ilya kundiyo pakyanya apangu, aandongelage atigilage, “Utane ukoogopa! Uneene ye va kutala, kangi va wusililo. 18 Uneene ye Munya wuumi. Ndaafuwe, lino lolage, ndili muumi mbeepali na mbeepali. Uneene ndili nafyo ifidindulilo fya fuwa ni fya ku wulungu.
19 “Lino usimbe dzonda dze ukudziwona, idziihumila lino ni idzihadza dziihumila pambele. 20 Ukaweene ndíkoleeliye inondwe mufungʼati mu liwoko lyangu ilya kundiyo. Kangi ukafiweene ifinenevekelo mufungʼati fya sahabu ifya kuviikila imuli. Ikinyele kya madzwi ago kye iki. Inondwe mufungʼati ve vanyamwandza va ngʼombeso mufungʼati. Ifinenevekelo mufungʼati fya sahabu fya kuviikila imuli, dze ngʼombeso mufungʼati.”