Avoolesi vavili va Nguluvi
11
1 Neke ndipeelwage ililaasi ilyali ngita lubiki lwa kugelela. Ndiilongelwaga ukutigila, “Uhelele ukagele aPiimike pa tembeli ni kiteekelelo. Kangi uvalilage avaanu vonda avakwifuunya umo. 2 Neke kangi utane ukuligela ilipaala lya Piimike pa tembeli, pakuva válekeliilwe avaanu avasikumufuuwa uNguluvi. Navo valaatema mu wukalia uwudzenge wiimike mu musika gwa myedzi makyumi gatayi ni givili (42). 3 Uneene ndikuvatuma avoolesi vangu vavili, nu kuvapeela uwutawulilwe. Navo valaavila uwuvidzi mu musika gwa figono mbilima yimwinga magana gavili na makyumi mutanda (1,260), kuno váfwalile ifigunila ukuwoneesa uwuhuguvafu.”4 Avoolesi vavili avo, gye miseyituni givili ni finenevekelo fivili ifiivedza pawutalo pa Nguluvi, uMutwa va nyi.b 5 Ngana umuunu ye avedzaga iisaka ukuvalemadza, ahadza iinyaanywa nu mooto ugwihuma mu milomo gyawo. Luli ewo, umuunu ye avedzaga ye iisaka ukuvalemadza, iivagila ukukomwa. 6 Avoolesi vavili avo, vanya wutawulilwe uwa kudinda ikyanya, ukuta indoonya yitane ukutoonya umusika pe viivila. Nu musika guguvedzaga gwe viisaka, vali nu wutawulilwe ulwa kuhambusa ululenga luvedze danda, nu kuleeta inipulo dzidzivedzaga mwe naanyi umusika guguvedzaga gwe vákeeliye.
7 Umusika pe viivedza vámalile ukoolela uwoolesi waawo, ilikooko ililaahuma mu lilindi ilya ku wulungu, lilaatovana navo, neke livadeludze nu kuvakoma. 8 Imifimba gyawo gilaavedza mu likaasi lya wudzenge wukomi, we weene mu luselengo wiitambulwa Sodoma ni Misili. Apo pe peene pa kipindulihidzo pe aatoveleliilwe uMutwa vaawo. 9 Avaanu ukuhuma mu vaanu vonda, nyi dzonda, fipelela fyonda, ni ndongele dzonda, valaalola imifimba igyo mu figono fidatu nu mupingulo (3 1/2). Wiimila wa ligooga lyawo vasiliidika ukuvasiila. 10 Avaanu avasikumufuuwa uNguluvi mwe naanyi umu, valaakeela wiimila wa kufuwa kwa vavidzi vavili avo avavapumwise, kangi valaaheeya nu kwipeela uluwonolo.
11 Neke kangi pe fyaviye fídzumbile ifigono fidatu nu mupingulo, uNguluvi akuvapuulilaga umuuya gwa wuumi, avavidzi avo viikwimaga na magulu gaawo. Neke vonda avavaloleelaga voogopage hiilo. 12 Pambele avavidzi vavili avo, viipulikaga isawuti ngomi ukuhuma kukyanya yiitigilaga, “Mwadze kukyanya kuno!” Navo viikwinukaga kukyanya mu lifunde, kuno avatavangwa vaawo pe valola. 13 Umusika guugo, kwihumilaga ikilindima kikomi, ulubali lumwinga mu likyumi (1/10) lwa wudzenge lwimamukaga. Avaanu mbilima mufungʼati (7,000) viifuwaga mu kilindima ikyo, na vangi vonda avaasigiye kikuvamemaga ikitulo, vakumupeelaga indolo uNguluvi va kukyanya.
14 Lino ulukali lwa kavili lúhelaniidze, lolage ulukali lwa kadatu lwikwadza kisaatu.
Umunyamwandza va mufungʼati iitova ulukwalimba lwakwe
15 Umunyamwandza va mufungʼati (7) iitovaga ulukwalimba lwakwe. Neke isawuti ngomi kukyanya dzipulisage dzitigilage,
“Uwutwa wa lidugulu wúvedzile wa Mutwa Nguluvi veesu,
nu Mesiya vaakwe,
umwene uMutwa alaatema mbeepali na mbeepali.”
16 Neke avavaha makyumi gavili na vatayi (24) avaali víikalile mu fideego fyawo fya wutwa pawutalo pa Nguluvi, viigwisage kinyalileme, vamugondamilage uNguluvi 17 vatigilage,
“Tukukuhongedza ve Mutwa Nguluvi uMunya Ngufu Dzonda,
ye uli pwali, ye waali pwali.
Pakuva úwoneesiidze ingufu dzaako ngomi,
na liilino wiitema.
18 Avaanu avasikukudzeela vaaviipile,
lino umusika gwa ligooga lyako gúfikile.
Gwe gwene umusika gwa kuvahiga avaanu avaafuwe.
Gwe gwene umusika gwa kuvahomba avatovela-ligendwa vaako avavidzi,
na viimike vaako vonda,
avakuliginiya ilitaawa lyako, avaanu vakomi ku vadebe.
Kangi gwe gwene umusika gwa kuvatipula
vala avakuyaananga inyi.”
19 Neke aPiimike pa Piimike pa tembeli ya Nguluvi kukyanya padindukage. Mugati mwa Piimike pa Piimike yiiwonekaga isanduka ya Nguluvi iya lufingo.c Ndiiwonaga imuli dza mapamba, ifyuyililo na mabalamusi. Inyi yiilindimaga, kangi kwivedzaga ni ndoonya ingomi ya maganga.