Umwayuuva ni liyoka
12
1 Neke ndikiwonage ikimanyilo kikomi kya kudzumwa uko kukyanya. Kwali nu mwayuuva ye áfwaliidzwe ilidzuwa, umwedzi nago gwali paanyi pa magulu gaakwe. Kangi ku mutuwe gwakwe aafwalile ingeela iya wutwa iyinya nondwe dzinyikyumi ni dzivili (12). 2 Umwayuuva uyo aali nu wuvaha, iivembaga pakuva aali nu wuvafi wa kuhola umwana.3 Neke ndikiwonage ikimanyilo ikingi uko kukyanya. Mu kimanyilo ikyo, ndikuliwonaga ilihato likomi hiilo liduungʼu, lili ni mituwe mufungʼati (7) ni membe likyumi limwinga (10), imituwe igyo, nagula guli ni ngeela. 4 Nu mukila gwakwe gwikwegaga lubali lumwinga mu wudatu (1/3) lwa nondwe, nu kudzigwisa ukuhuma kukyanya ukufikila pe naanyi. Ilihato ilyo liikwimaga pawutalo pa mwayuuva ye aali biihi ukuhola, ukuta limuliye umwana umusika guugo pe iiholwa. 5 Neke umwayuuva uyo aholage umwana mudiimi, ye ahadza iitema inyi yonda wugendela wa musagi gwa kyuma.a Ilihato ilyo pe lisinaa limuliya, umwana uyo iinyagidzwaga kuhelela kutemasa nu Nguluvi pa kideego kya wutwa. 6 Suwe umwayuuva uyo iinyililaga ku lungʼalangʼala, apoono pe aagelanidziilwe nu Nguluvi ukuta amusangilile apo, figono mbilima yimwinga magana gavili na makyumi mutanda (1,260).
7 Neke kuhumilage amagoha kukyanya. Umunyamwandza umukomi, ye iitambulwa Mikaheli,b na vanyamwandza vaakwe viitovanaga ni lihato ilyo. Nalyo liitovanaga navo pamwinga na vanyamwandza vaakwe. 8 Neke kangi ilihato na vanyamwandza vaakwe valemwage, vayadzage uwiikalo waawo kukyanya. 9 UMikaheli na vanyamwandza vaakwe, vakulitoodzaga ilihato ilyo paanyi pa nyi. Ili lye liyoka ilya kataali iliitambulwa Muhosi enewuli Setano, ye iidzanga avaanu vonda va mu nyi.c Ilihato ilyo na vanyamwandza vaakwe, vonda viitoodzwaga paanyi.
10 Neke ndipulikage isawuti ngomi ukuhuma kukyanya yitigilage,
“Lino uNguluvi veesu ávapokile avaanu vaakwe,
aawoneesiidze ingufu dzaakwe nu wutemi wa wutwa waakwe.
Kangi uMesiya vaakwe aawoneesiidze uwutawulilwe waakwe mu lidugulu lyonda,
pakuva umunya kuvataaha kwa Nguluvi avafuuwa vayiisu ikilo nu muunyi,
átoodziidzwe paanyi ukuhuma kukyanya.
11 Avafuuwa vayiisu vámudelwidze wugendela wa danda ya Kaanangʼolo,
nu wugendela wa lidzwi ilya woolesi waawo.
Avo vasaaweene kiinu imiikalile gyawo,
viitawuwe ukufuwa wiimila wa kumufuuwa uYesu.
12 Neke lino, mukeelage,
unyeenye nyivonda ye mukwikala uko kukyanya!
Vali nu lukali avakwikala mu nyi na mu nyandza,
pakuva uSetano átoodziidzwe paanyi pe mugenda unyeenye,
áviipile hiilo pakuva iidzeela ukutigila, ifigono fyakwe fikeefu.”
13 Ilihato ilyo pe lyaweene lítoodziidzwe mu nyi, likumufwimaga umwayuuva uyo ye aali áholile umwana mudiimi. 14 Neke kangi umwayuuva apeelwage amapabatilo gavili ga lingasimula likomi, ukuta aguluke ukuhelela ku lungʼalangʼala uko, apoono pe aagelanidziilwe nu Nguluvi, ukuta avedze pataali ni ndzoka. Uko ahadza iisangililwa mu figono mbilima yimwinga magana gavili na makyumi mutanda.d
15 Indzoka yiihumyaga ululenga loloofu ngita mukoga ukuhuma mu mulomo gwakwe, ukuta lumukwege umwayuuva uyo, ahelelage nu lulenga lwa wulava. 16 Neke kangi inyi yimutangage umwayuuva uyo, yahamulage ngita mulomo, nu kumila ululenga londa ukuhuma mu mulomo gwa lihato. 17 Ilihato ilyo likumuviipilaga hiilo umwayuuva uyo, liihelelaga kutovana na vaana vaakwe avangi ávasigiye. Avaana avo ve veene aviikwidika indagi dza Nguluvi, nu kwinatila uwoolesi wa Yesu. Apo, ilihato liikwimaga pa ngʼumbungʼumbu ya nyandza.