AKaanangʼolo na vaanu vaakwe
14
1 Neke ndilolage, ndiwonage aKaanangʼolo kíimile pakyanya pa kidunda Sayuni pamwinga na vaanu ligana limwinga makyumi gatayi na vatayi mbilima (144,000). Avaanu avo vaasimbiilwe pa mbumila ilitaawa lya Kaanangʼolo ni litaawa lya Daadiye. 2 Ndiipulikaga ikyuyililo ukuhuma kukyanya ngita lihaata lya lulenga loloofu, ngita libalamusi. Kangi kyapuliise ngita kya vatova magombo voloofu aviitova pamwinga. 3 Avaanu ligana limwinga na makyumi gatayi ni dzitayi mbilima avo, viimile pawutalo pa kideego kya wutwa, na pawutalo pa figawa fitayi ifyumi fila na vavaha makyumi gavili na vatayi (24) vala. Viimbaga ulwimbo lupiya, kangi sikwali uyungi ye aaluwuwe ukwimba ulwimbo ulo nda, va vala swe ligana limwinga makyumi gatayi na vatayi mbilima avaakombwidzwe ukuhuma ku nyi.4 Avaanu avo ve veene avasiilamiidze mu vamwayuuva. Avo vakukaniniila aKaanangʼolo konda kwe kiihelela. Avo vákombwidzwe ukuhuma mu vaanu, navo vali ngita wusembe wa mbene ya kutala kwa Nguluvi na Kaanangʼolo. 5 Navo vasiilonga wudesi, kangi vangaya lugomehedzo luluvedzaga.
Avanyamwandza vadatu viihumya imola ya Nguluvi
6 Neke ndimuwonage umunyamwandza uyungi iiguluka pagatinagati ya kyanya. Umunyamwandza uyo, aali ni mola inofu ya mbeepali ukuvadalikila avaanu aviikalaga ku nyi, avaanu ukuhuma mu vaanu vonda, nyi dzonda, fipelela fyonda, ni ndongele dzonda. 7 Umunyamwandza uyo iikwinusaga isawuti iitigilaga, “Mumoogopage uNguluvi nu kumupeela indolo, pakuva umusika gwa kuhiga avaanu gúfikile. Mumugondamilage ye aagavile ikyanya, inyi, inyandza ni fidwiwuli fya lulenga.”
8 Umunyamwandza va kavili akumuniniilaga uyo uva kutala, iitigilaga, “Wúguwe! Uwudzenge uwukomi wa Babelia wúguwe! Uwudzenge uwo wúhulile avaanu va nyi idzingi ukuniniila imigendele gyakwe gya wugoni nu kuvaheniya, ngita ványwesiidzwe difwayi.”b
9 Umunyamwandza va kadatu akuvaniniilaga avangi avo. Nave iilongaga mu sawuti ngomi iitigilaga, “Ngana umuunu akwifuunya ku likooko ilyo ni kihwano kyakwe, nu kutonywa indonya pa mbumila enewuli mu mawoko, 10 umuunu uyo alaanyuwa iligooga lya Nguluvi. Iligooga ilyo lilaavedza likali ngita difwayi ngʼali iyisihandziidzwe nu lulenga. UNguluvi yumwene alamumiminila umuunu uyo anyuwe mu kinywelo kya ligooga lyakwe uNguluvi. Wuhumila wa ulo, alaapumuswa mu mooto mukali hiilo, pa miiho ga vanyamwandza aviimike na pa miiho ga Kaanangʼolo. 11 Ilyosi ilya mooto ugo, liikwinukaga kukyanya mbeepali na mbeepali. Kuli mumuko ikilo nu muunyi ngaya kupola, ku vaanu avo avakwifuunya ku likooko ni kihwano kyakwe, nu kutonywa indonya ya litaawa lyakwe.”
12 Lino, aviimike avakudziidika indagi dzaakwe nu kumufuuwa uYesu, viisakulwa ukwigugumidza kitaduma.
13 Ndiipulikaga ilidzwi ukuhuma kukyanya liitigila, “Simbe idzi! Ukuvangila lino, avaanu vonda aviifuwa kuno vakumufuuwa uMutwa Yesu, váfuunyiliilwe.”
Nayu Mubepo uMwimike iitigila, “ Ndakyene valaapola ukuhuma mu wupifu wa malimo gaawo, pakuva amalimo gaawo manofu galaagendasa navo.”
Imbene ya nyi
14 Neke ndilolage, ndiliwonage ilifunde livalafu. Pakyanya pa lifunde ilyo, íikalile umuunu ngita Muswamuve va Muunu,c pa mutuwe gwakwe áfwalile ingeela ya sahabu. Mu mawoko gaakwe íibiite isendzi ngʼali hiilo.
15 Umunyamwandza uyungi iihumaga aPiimike mu tembeli uko kukyanya, iikwinusaga isawuti, akumulongelaga uyo ye íikalile pakyanya pa lifunde iitigilaga, “Nyamule isendzi yaako ukabene, pakuva imbene ya nyi yíkangiye, nu musika gwa kubena gúfikile.” 16 Neke uyo ye íikalile pakyanya pa lifunde, atoodzage isendzi yaakwe ku nyi, abenage imbene ya nyi yonda iyo.
17 Neke umunyamwandza uyungi ahumage aPiimike mu tembeli uko kukyanya, nave íibiite isendzi indzugi. 18 Kangi umunyamwandza uyungi, umwimiilidzi va mooto gwa pa kiteekelelo, iihegaga pa kiteekelelo, iikwinusaga isawuti, akumulongelaga umunyamwandza umunya sendzi indzugi iitigilaga, “Nyamule isendzi yaako indzugi, upete ifiveleko fya sabibu dza nyi, pakuva fítungʼwine.” 19 Neke umunyamwandza uyo anyamulage isendzi yaakwe, apetage isabibu dza nyi, asopage mu lidodeeledzelo likomi. Ilidodeeledzelo ilyo lye ligooga lya Nguluvi.d 20 Isabibu idzo dzaahuudziilwe mu lidodeeledzelo kwivala ya wudzenge wa Yelusalemu. Dziihumyaga idanda, iyo yiivedzaga mukoga mutaali. Uwutaali waakwe waali kilometa magana gadatu (300), nu wiina uwa ngambo yimwinga nu mupingulo (1 1/2).