Ulwimbo lwa Kaanangʼolo nu Mose
15
1 Neke ndikiwonage ikimanyilo ikingi kukyanya. Ikyo kyali kikomi, kangi kya kudzumwa. Mu kimanyilo ikyo, ndikuvawonaga avanyamwandza mufungʼati (7) vali ni nipulo mufungʼati dza wusililo. Inipulo idzo dzaali dza kukwilidza iligooga lya Nguluvi. 2 Kangi ndikukiwonaga ikiinu ikyali ngita nyandza ya kinyawiilole, íyihandzingʼiine nu mooto. Na pa ngʼumbungʼumbu ya nyandza, viimile avaanu avo avalidelwidze ilikooko ilyo, ikihwano kyakwe, pamwinga ni mbalilo ya litaawa lyakwe. Avaanu avo, vaakoleeliye mu mawoko gaawo amagombo ge vaapeeliilwe nu Nguluvi. 3 Viimbaga ulwimbo lwa Mosea umulimila-vangi va Nguluvi, nu lwimbo lwa Kaanangʼolo viitigila,“Ve Mutwa Nguluvi, ve Munya Ngufu Dzonda,
amalimo gaako makomi, kangi ga kudzumwa.
Uveeve ve Mutwa va nyi dzonda,
ingʼaasi dzaako ngolofu, kangi dza ndakyene.
4 Mutwave, ye ani umungaya woogofi,
nambe ye asikuliginiya ilitaawa lyako?
Pakuva uveeve wimwene ye uli mwimike.
Avaanu va nyi dzonda valaadza ukwako nu kwifuunya,
pakuva amalimo gaako ga wugolofu gásiikwike.”
5 Apo pe dzíhelaniidze idzo ndiilolaga, ndiiwonaga aPiimike pa Piimike mugati mu liheema lya kutaangʼanilab kukyanya, pádindwike. 6 Neke avanyamwandza mufungʼati, avali ni nipulo mufungʼati, vahumage umo váfwalile imyenda imivalafu igiingʼaala, víipinyile imikandalo gya sahabu mu mambaga dzaawo. 7 Kimwinga mu figawa fitayi ifyo, kikuvapeelaga avanyamwandza mufungʼati avo nayula inyaludzo ya sahabu, íyimemile iligooga lya Nguluvi ye ali muumi mbeepali. 8 Ilyosi ukuhuma mu ndolo dza Nguluvi ni ngufu dzaakwe, lyamemile aPiimike pa Piimike. Sikwali ye aali nu ludali lwa kwingila aPiimike pa Piimike, ukufikila inipulo mufungʼati idzo dza vanyamwandza avo pe dziikwila.