Umugendakyaka umukomi ni likooko
17
1 Yumwinga mu vanyamwandza mufungʼati (7) avo avaali ni nyaludzo mufungʼati idzo, iikwadzaga ukwangu, akuundongelaga iitigilaga, “Waadze, ndikukuwoneesa ulupedzo lwa mugendakyaka ye íikalile pa lulenga loloofu yula. 2 Avatwa va nyi válimile uwugoni nave, na vaanu va nyi navo vágaalile idifwayi ya wugoni waakwe.”3 Neke uMubepo va Nguluvi aandzadzilage, nayu munyamwandza aandongodzage ukufikila ku lungʼalangʼala. Uko, ndikumuwonaga umwayuuva áhovile pakyanya pa likooko liduungʼu. Ilikooko ilyo lili ni mituwe mufungʼati, ni membe likyumi limwinga (10). Límemile amataawa goloofu ga kumulonga fivi uNguluvi. 4 Umwayuuva uyo, aafwalile umwenda munofu gwa mulangalanga nu muduungʼu. Kangi íipombiye isahabu, amaganga ga wutalamu ni ndzambo. Mu liwoko lyakwe, íibiite ikinywelo kya sahabu, íkimemile ifinya lugagi ni fiinu ifilamafu ifya wugoni waakwe uwo. 5 Lyasimbiilwe ilitaawa pa mbumila yaakwe, ikiganulo kyakwe kífihiilwe. Ilitaawa ilyene, lye ili,
wudzenge wukomi wa babeli,
ungʼina va vagendakyaka
nadzi dzinya lugagi dza nyi.
6 Ndikumuwonaga umwayuuva uyo ágaalile idanda ya viimike, avaakomiilwe wiimila wa kumoolela uYesu.
Pe ndamuweene, ndiidzumaga hiilo. 7 Neke kangi umunyamwandza uyo aambuudzage atigilage, “Kye kiki wiidzuma? Leke ndikulongele ikiganulo kya mwayuuva uyo ni likooko lye áhovile, ilinya mituwe mufungʼati ni membe likyumi limwinga. 8 Ilikooko ilyo lye waliweene lyumi, lino lífuwe. Neke kangi lili biihi ukuhuma mu lilindi ilya ku wulungu, uNguluvi alalitipula. Na vaanu vonda va nyi, avanya mataawa gaawo agasisimbiilwe mu kitabu kya wuumi ukuhumila pe yisinaa yigawa inyi, valaadzuma ukuliwona ilikooko ilyo, pakuva lyali lyumi pa kutala, lino lífuwe, neke kangi lilaavedza lyumi.
9 “Lino ulukaani ulu lwisakulwa kuvedza nu luhalawukagudzi. Imituwe mufungʼati igyo, giikwimila pa fidunda mufungʼati fye íikaliye umwayuuva uyo. Kangi imituwe mufungʼati igyo, ve vatwa mufungʼati. 10 Mu vatwa avo, vahaanu váfuwe, yumwinga aave pe atema, nu yungi iisakulwa ateme pambele. Umutwa uyo ye iitema pambele, iisakulwa ateme musika mukeefu hela. 11 Ilikooko ilyo ilyali lyumi pa kutala lino lífuwe, ilyo ye mutwa va munaana (8). Uyo ye yumwinga mu vatwa mufungʼati avo, kangi uNguluvi alamutipula nave.
12 “Imembe likyumi limwinga idzo dze údziweene, ve vatwa likyumi limwinga avaave vasinaa vatema. Vonda avo valaapeelwa uwutawulilwe wa kutemasa ni likooko ilyo, umusika gwa kivalilo kimwinga hela. 13 Avatwa likyumi limwinga avo, vápuliingʼiine ukulipeela ilikooko ilyo uwutawulilwe waawo ni ngufu dzaawo dzonda. 14 Pamwinga ni likooko ilyo, avo valaahomana amagoha na Kaanangʼolo. Neke kangi aKaanangʼolo kalavadeludza, pakuva akeene ye Mutwa va vatwa nu Mulugu va valugu. Akeene kalaavedzasa na vaanu vaakwe ve kavakemeeliye nu kuvahaagula, navo ve vafuuwa.”
15 Umunyamwandza akuundongelaga iitigilaga, “Ululenga lwe ukaluweene pala pe akiikalile umugendakyaka yula, ge malugu malugu ga vaanu va nyi dzonda ni ndongele dzonda.
16 “Imembe likyumi limwinga dzila dze wadziweene ni likooko ilyo, valamuviipila umugendakyaka uyo. Valaanyamula ifiinu fyakwe fyonda nu kumuleka wufuula. Valaaliya inyama yaakwe, kangi ifilekeelelwa filaanyaanywa mu mooto. 17 Pakuva uNguluvi yumwene, ávaviikile mu numbula dzaawo ukutigila, vavedze nu wugulume wumwinga uwa kulipeela ilikooko ilyo ingufu dzaawo dza kutema. Avo valaalima ewo, ukufikila umusika pe wiikwila uwugulume wa Nguluvi. 18 Umwayuuva uyo ye wamuweene, we wudzenge wukomi uwo uwiitema avatwa vonda va nyi.”