Ulutipulo lwa wudzenge wa Babeli
18
1 Umusika pe dzíhelaniidze idzo, ndikumuwonaga umunyamwandza uyungi umunya wutawulilwe wukomi, iikwika ukuhuma kukyanya, ni nyi yiimulikwaga ni mingʼaalile gyakwe. 2 Nave iikwinusaga isawuti ngomi hiilo, iitigilaga,“ ‘Wúguwe! Uwudzenge wukomi wa Babeli wúguwe!’a
Lino wúhambwike wiikalo wa mibepo imiviifu ni mibepo imilamafu.
Wiikalo wa kufihama imidege imilamafu nu kuviifya.
3 Pakuva avaanu va nyi dzonda ványuwe, vágaalile idifwayi ingʼali ya wugoni waakwe,
avatwa va nyi válimile uwugoni nave.
Na vagula-wugudzi va nyi
vámotiye mu wiinoome waakwe uwungaya kigelelo.”
4 Neke ndipulikage isawuti iyingi ukuhuma kukyanya yiitigila,
“ ‘Vaanu vangu, muhume mu wudzenge uwo,’b
ukuta mutane ukuhanga ukulima indzanangifu dzaakwe
nu kutigila, inipulo dzaakwe dzitane ukuvafika.
5 Pakuva indzanangifu dzaakwe dzílundiine,
ukufikila kukyanya,
uNguluvi iigelaniidze ukumuhiga wiimila wa malimo gaakwe amaviifu.
6 Mumulimile umwene ngita kye avalimiye avangi.
Kangi alimilwe nyakavili pa wuhosi we avalimiye avangi.
Munyamulage ikinywelo kyakwe,
mumusopelage nyakavili ya ikyo kye avasopiye unyeenye.
7 Mumupeelage imumuko nu luhugumililo, mu kigelelo kya kwiginiya nu wiinoome we akwipeela yumwene.
Pakuva umwene akwinunumula mu numbula yaakwe, iitigila,
‘Ndíikalile mu kutema ngita mutwa mwayuuva, kangi uneene sindili mufwile nu mugoosi, sindiihugumilila nambi!’c
8 Wiimila wa ulo, inipulo dzonda dzilamufika mu kigono kimwinga,
ifuwa, ukuhugumilila ni ndzala.
Alaapiilila ngʼaani mu mooto,
pakuva uMutwa Nguluvi uMunya Ngufu ye akumuhiga.”
9 Avatwa va nyi avadumuwe inoolane nave nu kuhanga uwumosi waakwe, valaavemba nu kuwuhugumilila uwudzenge uwo umusika pe viilola ilyosi lya kupiya kwakwe. 10 Avatwa avo valiima pataali nu wudzenge uwo pa koogopa imumuko dzaakwe. Valaavemba viitigila,
“Lukali, lukali uwudzenge wukomi ve Babeli,
uwudzenge uwunya ngufu!
Uluhigo lwako lúkufikiye mu musika gwa kivalilo kimwinga.”
11 Avagula-wugudzi va nyi, navo valamuvembela nu kuhugumilila, pakuva sikwali umuunu uva kugula ifiinu fyawo, 12 kwe kutigila ifya sahabu na magoobeli, indzambo nambe maganga ga wutalamu, imyenda iminofu gya lutogo, imyenda iminofu gya mulangalanga, igya halili ni miduungʼu. Kangi sikwali umuunu uva kugula ifiinu ífiwuyiipwe ni mbawo inalamu, nambe fiinu ífiwuyiipwe ni membe dza ndembwe, ífiwuyiipwe ni mbawo dza magoobeli goloofu, nambe fya saba, kyuma ni malumalu. 13 Sikwali umuunu uva kugula umudalasini, ifihato, uwufumba, imanemane enewuli uwubani, nambe difwayi, amafuta ga seyituni, uwutine wunofu, ni ngana. Kangi sikwali umuunu uva kugula isenga, ingʼolo, ifwalasi, umutuka gwa kukwegwa ni fwalasi, nambe vasutu.
14 Neke avagula-wugudzi avo valaatigila, “Ifiveleko fye waadobokaga hiilo, fíyagile. Uwumosi ni ndolo dzaako dzonda fíyagile, kangi fisilaawoneka mbeepali.” 15 Avagula-wugudzi avaamotiye ukwakwe, valiima pataali ulwa koogopa imumuko dzaakwe, valaavemba nu kuhugumilila. 16 Valaatigila,
“Lukali, lukali uwudzenge wukomi,
waafwalaga imyenda minofu hiilo gya lutogo,
igya mulangalanga ni miduungʼu,
Wiipombiye ni sahabu,
amaganga ga wutalamu ni ndzambo.
17 Lino uwumosi wonda uwo
wútipuliilwe mu kivalilo kimwinga hela.”
Avagendzi-meli vonda, avanya lugendo vonda, avalima-malimo vonda va meli, na vonda aviimotela pa nyandza, valiima pataali. 18 Umusika pe viilola ilyosi lya kupiya kwakwe, valiinusa isawuti viitigila, “Sikoowuli uwudzenge uwungi uwukomi ngita uwudzenge uwo!” 19 Avaanu avo, valiitiimulila ilifuuna pakyanya pa mituwe gyawo, viivemba nu kuhugumilila ni sawuti viitigila,
“Lukali, lukali uwudzenge wukomi,
uko avanya meli vonda mu nyandza víimosiidze wugendela wa wumosi waakwe.
Lino kangi uwudzenge wonda
wútipuliilwe mu kivalilo kimwinga hela.”
20 Mukeelage unyeenye ye mukwikala kukyanya, wiimila wa lutipulo lwakwe.
Mukeelage nye viimike, vatume na vavidzi,
pakuva uNguluvi álamuwe ukuwuhiga uwudzenge uwo,
mu dzila dze vávalimiye unyeenye.
21 Neke ahumilage umunyamwandza umunya ngufu, iinamulage iliganga likomi ilili ngita lwala, atoodzage mu nyandza atigilage,
“Ngana ewo,
uwudzenge wukomi wa Babeli wulaatoodzwa paanyi ni ngufu,
nu kuyagila ngʼaani.
22 Na mu wudzenge umo, sikulaavedza nambi sawuti dza vaanu aviikwimba,
ukutova iligombo, isawuti dza lulandzi, ni ngʼwalimba,
ukupulisa umwako kangi.
Sikulaavedza nambi mukoola ye avedzaga ukuwoneka kangi,
nambe kupulisa ulwala lwihaalula kangi!
23 Ulumuli lwa tala,
lusilaamulikaga nambi kangi umwako.
Sikulaavedza nambi sawuti ya mugoosi va noolane ni ya mudala va noolane,
ukupulisa kangi umwako mu noolane.
Uwudzenge wa Babeli wulaalimilwa ewo,
pakuva avagula-wugudzi vaako vaali vakomi mu nyi.
Kangi, mu wuhavi waako, wavaheniidze avaanu va nyi dzonda,
vaali ve vaanu vatambule va nyi.
Na vaanu vonda va nyi vaadzangiilwe nu wuhavi wa wudzenge uwo.
24 Mu wudzenge umo, yaawoniike idanda ya vavidzi ni danda ya viimike,
pamwinga ni danda ya vaanu vonda avaakomiilwe ku nyi.”