UNguluvi iilumbwa
19
1 Umusika pe dzíhelaniidze idzo, ndiipulikaga isawuti ndzoloofu ngita dza lilugu likomi uko kukyanya. Isawuti idzo, dziinuswaga dziitigila,“Haleluya!
Uwupoki, indolo ni ngufu fya Nguluvi veesu,
2 pakuva uluhigo lwakwe lwa ndakyene, kangi lwa wugolofu.
Ámuhigile umugendakyaka mukomi,
ye aaheniidze inyi mu wugoni waakwe.
UNguluvi ámulumbiye mukole,
wiimila wa danda ya vatovela-ligendwa vaakwe.”
3 Ulwa kavili viikwinusaga isawuti viitigilaga,
“Haleluya!
Ilyosi ukuhuma kwa mugendakyaka,
liikwinuka kukyanya mbeepali.”
4 Neke avavaha makyumi gavili na vatayi (24) vala ni figawa fitayi fila, viigwisage kinyalileme, vamugondamilage uNguluvi ye íikalile pa kideego kya wutwa, vatigilage, “Eena! Haleluya!”
5 Neke ndipulikage isawuti ukuhuma ku kideego kya wutwa yiitigila,
“Mumulumbage uNguluvi veesu, unyeenye nye vatovela-ligendwa vaakwe.
Mumulumbage unyeenye ye mukumoogopa,
unyeenye nye vatambule na avasili vatambule!”
6 Neke ndipulikage isawuti ngita sawuti ya lilugu likomi, ngita kyuyililo kya lulenga loloofu, kangi ngita fyuyililo na mabalamusi, yiitigila,
“Haleluya!
Pakuva uMutwa Nguluvi veesu uMunya Ngufu Dzonda iitema.
7 Na yuufwe tukeelage,
tuheeyage nu kumupeela indolo.
Umusika gwa noolane ya Kaanangʼolo gúfikile,
nu mudala va noolane vaakwe íigelaniidze.
8 Umwene umudala va noolane ápeeliilwe imyenda gya lutogo, mivalafu,
igiingʼalita kangi minofu mbandu, ukuta afwale.”
Imyenda gya lutogo igyo ge malimo magolofu ga viimike.
9 Umunyamwandza yula akuundongelaga iitigilaga, “Usimbe amadzwi aga: Váfuunyiliilwe vonda ávalaaliikwe ku lukeelanilo lwa noolane ya Kaanangʼolo ulo.” Kangi akuundongelaga iitigilaga, “Idzo dze ndílongile ge madzwi ga ndakyene ya Nguluvi.” 10 Neke ndiigwisage kinyalileme pa magulu ga munyamwandza uyo, nu kumugondamila. Neke kangi aandongelage atigilage, “Utane ukulima ewo! Uneene ndili mutovela-ligendwa muyago, pamwinga na vafuuwa vayago aviikwinatila uwoolesi wa Yesu. Umugondamilage uNguluvi mwene! Pakuva uwoolesi wa Yesu wiilongodza uwuvidzi.”
Amagoha kukyanya
11 Neke ndikuwonage kukyanya kúdindwike. Ndikuyiwonaga ifwalasi mbalafu nu muunu yumwinga áyihovile ye aatambulwaga Muhuuvilwa, kangi Ndakyene. Uyo iihiga nu kuhomana amagoha wugendela wa wugolofu. 12 Amiiho gaakwe gaali ngita lulambo lwa mooto, kangi ku mutuwe kwakwe aafwalile ingeela ndzoloofu. Aasimbiilwe ilitaawa lye vasilidzeeliye avangi, nda haamu, yumwene swe. 13 Aali áfwalile umwingila umudzabike mu danda. Ilitaawa lyakwe ye Lidzwi lya Nguluvi. 14 Amalugu ga kukyanya gaafwalile imyenda gya lutogo, mivalafu kangi minofu, gamuniniilaga gáhovile ifwalasi imbalafu. 15 Ilipanga ilinya wuugi lyahumaga mu mulomo gwakwe, ukuta wugendela wa ilyo, avadeludze avaanu va nyi dzonda, nave “alaatema avaanu wugendela wa musagi gwa kyuma.”a Kangi iilivata ilidodeeledzelo lya sabibu, ilidodeeledzelo ilyo lye ligooga lya Nguluvi uMunya Ngufu Dzonda. 16 Pa mwingila gwakwe, ulubali lwa pakyanya pa liteeka, paasimbiilwe ilitaawa ili:
umutwa va vatwa nu mulugu va valugu
17 Neke ndimuwonage umunyamwandza yumwinga íimile pakyanya pa lidzuwa. Umunyamwandza uyo iikwinusaga isawuti, iikemeelaga amadege gonda agiiguluka kukyanya, iitigilaga, “Mwadze mulundane pa lukeelanilo lukomi lwa Nguluvi, 18 ukuta muliye inyama dza vatwa, idza vavina va vakolakyanda na dza vakolakyanda, idza fwalasi na vahova-fwalasi, inyama dza vaanu vonda, avaawule na vasutu, avatambule na si vatambule.”
19 Neke ndiliwonage ilikooko lila lye ndaliweene pa kutala,b na vatwa va nyi na malugu gaawo, válundiine pamwinga ukuhomana na uyo ye áhovile pakyanya pa fwalasi imbalafu pamwinga ni lilugu lyakwe. 20 Neke kangi ilikooko ilyo, pamwinga nu muvidzi va wudesi, viibatwage. Umuvidzi va wudesi uyo, aali áhuufiidze ifimanyilo wiimila wa likooko. Kangi, wugendela wa fimanyilo ifyo, aali ávadzangile avo avaali vátonyiilwe indonya ya likooko ilyo, na aviifuunyaga ku kihwano kyakwe. Vonda vavili avo aviibiitwe, viitoodzwaga vuumi mu liseela ilya mooto mukali hiilo. 21 Avakolakyanda avo avaasigiye, vaakomiilwe ni lipanga ilyahumile mu mulomo gwa uyo ye áhovile pakyanya pa fwalasi mbalafu. Amadege gonda giiliyaga inyama idzo nu kwiguta mbandu.