Yoob 13

M làá mɔ̄tì m-ba pu Unimbɔti nimbiin

1 Tiŋman, m-nimbigbɔŋu ká tíǹ gbanti kɔkɔ,

m-tafal gbìl̄ ní ki gbìl̄ taapu.

2 Tin kɔkɔ ni nyée, ma mun nyí-tì,

naa jítiǹ-mi!

3 Ama Unimbɔti Mpɔŋkɔdaan ní m là kí sòoǹ nì,

úǹ cee ní m làá mɔ̄tì m-ba pu.

4 Nimbee, ni cáá inyimɔn ki bìintí ibaamɔn pu,

ni-kɔkɔ sá inyimɔn nyɔkɔdambi ní.

5 Ni yaa bàà ŋūǹ kí nīn ŋmí!

Bi bàà yíì-ni biciŋfitiibi ní.

6 Pīlifìmaan tin m cáá kí sòoǹ kí mɔ̄tì m-ba puee,

kpòom̄maan ni-tafaliŋ kí pīlifì m-yaliŋkii.

7 Ni dàkafī yii Unimbɔti ní ni mɔ́ntáaa?

Ni làá dū inyimɔn ní kí mɔ̄tì u-puɔɔɔ?

8 Ni là kí lì yii ni bí Unimbɔti jandi pú deeyaa!

Ni ŋūǹ kí mɔ̄tì Unimbɔti puɔɔɔ?

9 Unimbɔti yaa cɔ́ŋkì-ni, ni làá nyāaa?

Àá ni là kí mɔ̄ntì-u kii bi nín mɔ́ntí unil puee ní?

10 Ni yaa lēē kí taa nīn bí deedee dibalinee,

see ú dāá pée wòoǹ-ni.

11 U nín sá ukpaan puee kaa fàantí-naaa?

U nín cáá tifaandi puee kaa làá fàtīí lítí ni-puɔɔɔ?

12 Ni-dàkatam kaa cáá kunyampoou kii ŋfantamee ní,

anyɔɔbun ŋin ni cáa mɔ́tí ni-ba puee pɔ̀fì kii kuyɔkɔuee ní.

13 Ŋmīĺmaan kí yàntī ḿ sòoǹ,

ní tin làá bàń m-puee ń bàń!

14 M bɔ́ntì ki cí tin kɔkɔ làá bàń m-puee,

báà an yaa sá ŋkúm.

15 Báà Unimbɔti yaa là ú kpɔ̀-mi,

maa ti pée cáá dimákal diba dee.

Ama m làá mɔ̄tì m-saŋkindi pu u-nimbiin.

16 M yaa ŋúń ki ŋá mimmee, m làá ká difiil,

di sá yii unikpiti ubɔ kaa ŋūǹ kí yūĺ Unimbɔti nimbiin.

17 Pīlifìmaan tiŋan tin m cáá kí sòoǹee,

yàntīmaan tin m làá cántí taapu nee ń kɔ́ ni-tafaliŋin.

18 M bíi bɔ́ntí kí yíiń ibeeyiin,

ní m nyí tiŋan pu yii man ní bi làá pɔ̀.

19 Ŋma bí ki làá kɔ̄kɔl̀-mi?

M-bɔti yaa tí kpíìyaaa, m kíí kí ŋmīĺ kí kpú.

20 M-Nimbɔtiu, kàkatī tiwan tili kí wàatī-mi,

niinee maa ti làá dū m-ba kí báĺ-si.

21 Nyìkitī a-ŋal ŋun nyìkī m-pu nee,

gbèen̄ kí taa ti kɔ́ǹ-mi dinyoondi.

22 Míǹ boonee, a yaa yíiń-mi m làá kíí-si,

àá m làá sòoǹ ní á kíí-mi.

23 M ŋá-si ikpiti ki yīntiǹ-si ŋfunyɔm miŋa pu ní?

Yàntī ḿ béé m-kpitii nì m-yìntitam.

24 Ba pu ní a fàtī a-boon ki tìì-mi ní?

Ba pu ní a ŋáań-mi kii m sá a-nannanliuee ní?

25 Ba ní a fàantí ní? Kufaau kun kubuŋu yòontée?

Ba ní a jì ní? Kumɔkuliŋuaaa?

26 A sòon̄ m-bɔti min pɔ̄ɔ̄yee ki ŋmàn̄ ki ŋá kugbɔŋun,

a bíi pà-mi m-naacimpɔntin kpitii paati.

27 A bá-mi abaa,

ní a-nimbikpeeŋu pée cɔ́ tin kɔkɔ m ŋáańee pu,

áli gba a fíkití ki kpèé m-tabɔbiliŋ kɔkɔ!

28 M-wunti bíi sù kii ndɔ nín sù puee,

a lì kii akoosibil nín ŋmóò tiwampeeŋkaal puee.